SAK AIIN THIAH A HLAWK EM?

Tunhnaiah Aizawl daia Dihmunzawl an tih thin hmuna PHE in sak hluihlawn tawh, SIPMIU kuta an hlan, SIPMIU-in an thiahtir chungchangin mipui beng a verh hle mai a. Kan sorkar hian engtin tak nge a tih zel dawn hriat chakin mi tam takin an thlir thup ni maiin a lang a. Amah Pu Harry Khiangte te thuchang takin, ‘I lo thlir ang!’

Remchang tak maiin hetihlai vek hian Aizawl Capital Complex a Governor chenna tura an bangla sak tawh chu sorkarin a thiahtir ve mek bawk a. Keia pawisa nei lo chunga in sa ve pek hian an bungraw hluihlawn tawh hi ka va lei ve chhen a. Ka kal ka kal mai a. Thil awmdan ka’n zawh chuan Governor chenna tura an in sak tawh an thiah dan kalhmang leh bungrua ka lei theihdan chu hetiang hi a lo ni.

In thiah tur kha Tender-in nge an tih engtinnge an tih tak chu ka zu hre phak lova, mahse a thiattu te khan pawisa chawiin in sak sa hrang hrang kha a thiah hna an thawk a. A bungraw hlui, Iron rod te, in chung rangva te, kawngkhar te, an marble phah tawh sa leh Granite phek an phah te kha an kar khawk a, an hralh leh a. Chutia an tih chuan a then chuan pawisa te pawh an la hlawh a, an la hlawk zawk a ni.

Hetiang hian tunhma aṭangin sorkar building hi thiah a lo ni fo tawh thin a. Sorkar building hlui hi, ‘A chhe tawh em mai, thiah tur a ni,’ tiin mahni thu thu a thiah ngawt pawh a thiang lova, a dan leh hrai a awm vek bawk. Chutiang tak chuan an lo thiat a, mi tam takin sorkar in hlui thiah hi pawisa engemawzat chawiin an lo ti tawh thin a. Chutiang chu Engineer pangngai chuan hriat vek awm tak a ni satliah lova, an hnaa tel tlat a nih avangin khawi aṭanga phalna lak tur nge, engtinnge sorkar tana hlawk thei tura thiah a nih ang tih te ngaihtuah a, dan leh hrai te ngaihtuah dip dep tur a ni. Chuti a nih loh chuan dan bawhchhiatna te a awm thei ngei ang.

Dihmunzawl in thiah nan hian cheng nuai 62 nge an tih nuai 63 zawk sen a ni a. A titute insawifiahna thenkhatah chuan, ‘Chuti zat zat a ni lo, a thiahna tak chu cheng nuai sawmthum leh chuti khati a ni a. A dang hi chu chutiang khatiang a ni e,’ te an ti ni awm takin kan lo hria a. ‘Engah nge helaia kan chhang dah kha i ei zawh vek?’ ‘Ka ei zawh a ni bik lo, chumi pawh chuan a ei ve,’ tih aiin a la chhangchhe hretin ka hria.

An insawi fiahna hi chu an insawi fiahna a ni tawh a. ‘A phurh bona man,’ te an ti a ni awm e. A enga pawh ni se rapthlak tham tak thil hi chu a thleng a, a zung nena phoro tur phei chuan an Bill Detail emaw, engemaw hmuh a chakawm et et mai. Hetia thil mak pui mai kan kawmthlang maia a thlen tak si chuan Social Media lama thu hrawmhraw pui pui vawrh chhuak thin te, thu hrawmhraw lem lo vawrh chhuak thin leh mi awm cheuh cheuh, mahni kohhrana rinawmna leh dikna dil a tawngtai fo thin te, ram leh hnam vei anga inhlawm hrang leh titi siah siah thin te leh mahni tapchhak kila thu lo sawi ve khauh khauh (keini te hi kan ni mai ang em?) zawng zawng hian zu en hut hut awm tak a ni.

Cheng nuai hi tam tak a ni a, cheng nuai senga vuak chhiat tur phei chuan in hi a len a ngai viau ang a, a thiah te pawh hautak tak tur a ni. Nuai satliah chungchang kan sawi lova, kan sawi hi nuai 30 te, nuai 60 chungchang te a ni. JCB kan tih mai, Excavator hi darkar khat hman hman cheng sang chuang te a ni a, darkar sawm chhung Excavator-in a khawn tlauh tlauh a, chhe lo tur in hi sak a huphurhawm hle laiin a pawisa a zawng chuan nilenga Excavator hman man hi cheng singhnih thum lek (nuai sawmruk aṭanga teh chuan) a ni a. A vaw chhetu khawl rawih nan cheng nuai hnih seng ila ni thum chhungin a vuak chhiat vek mai a rinawm a. Chu ni thum hlawh chu cheng nuai hnih aiin a tam thei lovin a rinawm. Mihring lo ruai chhunzawm leh ta ila, mi 30 ruai ila, chung mi 30 te chuan cheng 400 theuh pawh ni khatah hlawh se an ni khat hlawh chu cheng 12,000/- chauh a la ni. Chawlhkar khat bei ta se cheng 72,000/- chauh an hlawh ang.

Eng ti zawng pawh hian nuai sawmthum hi a tam lutuk tlat a, he pawisa sawifiahna dang hi a pawmawm thei lo.

Chu chauh a la ni lo, chuti a nih chuan a bungraw hlui, midangin chumi denchhena man an chawi duh hialna tham kha khawnge a awm tak ang? Cheng nuai 60 senga thiah ngai inah khan bungraw hlui cheng sanghnih khat man lek a awm a, a zuzi ta mai em ni?

He Dihmunzawl in thiah hian kan hna thawh mek leh a enkawltute rintlakna (credibility) a khawih lo thei em? Hetianga titu hi pawisa chunga thunei thei tura rawih zel tlak a ni em?

Ngaihtuah tur a va tam em! Heng hi kan ngaihtuah ngei ngei a ngai a, sorkar phei chuan thil awmdan dik tak hi a chhui fiah a, hrem tur dik a hrem lo a nih chuan a zung hi a zam pawnlang hle a, he lamah a lo kual chhuak daih a ni tihna ni ngeiah a ngaih theih.

Heti a nih chuan contract lam hna thawk thin tan chuan in sak ai chuan in thiah hi a hlawk zawk fe tihna a ni.