ASSAM RIFLES AN CHHUAK DAWN TAIN A LANG

Kum 1997 vel aṭanga Mizoram politics-a hmun eng emaw luah ve tia sawi theih, Aizawl khawpui chhung aṭanga Assam Rifles chhuah leh chhuah loh chungchang thu chuan a vawrtawp thlengin March ni 15, 2025 khan Assam Rifles chuan an ram hlanna map chu Mizoram sorkar hnenah Union Minister, Amit Shah-a awm laiin an hlan ta a. Mizoram sorkar pawhin Zokhawsanga an awmna tur ram map an hlan ve bawk. Heti hi chuan kum sawmthum vel lai kalta aṭanga kan lo nghah leh kan beisei, Assam Rifles chu Aizawl khawpui laili lai tak aṭangin an lo chhuak dawn ta ngeiah ngaih theih a ni ta a, kan veiin kan nghakhlel bawk a, tunah chuan thawk huaina tur a ni ta.

Assam Rifles chhuah tur thuah hian politics lama hamṭhatna lak tumnate pawh awm theiin a lang a. A chhuahtir theitu nih pawh kan duh hlawm hlein a lang a. Mahse tunah hian rik luih luih leh eng emawti taka a titu nih theihna sawi hleih theih lohvin an chhuak dawn ta a, a ziaawm angreng phian mai.

A bul inṭanna deuh ber kha kan hre pha ve a. Kum 1987 vel lai khan Assam Rifles te khan lammual bulah hian Civil mi an kap chiam mai a, nunna chan leh hliam pawh an awm bawk a. Khata ṭang khan khawpui chhunga Assam Rifles awm hi hnawk kan ti thar ta em em a. Khatih laia Chief Minister kha Pu Laldenga a ni. Khata tang khan Assam Rifles te hi khawpui aṭang hian chhuak se tiin kan sorkar pawhin a nawr ṭhin a, ruahmannate pawh thui tak a kal a, mahse an chhuah hun tur thute a changin kan sawi hnai lutuk deuh va, sawi sual changte pawh kan nei nawk nite pawhin a lang.

Assam Rifles te Aizawl khawpui laili lai aṭanga an chhuak tur hi a lawmawmin a thawventhlak em em a, an hmun chhuahsan hi mipuiin kan mamawh nasat em avangin kan hman dik thiam phawt chuan Aizawl khawpui tan chhenfakawm tak tur a ni a. Tu pawh sorkar se, ṭha takin an hmun chhuahsan hi thil ṭangkaiah mipuite tan an hman a rinawm. Kan State khawpui ber ve ta fam chu kan ṭangkaipui dan tur hi sawiin a siak lo. Mahse ṭhenkhat duh dan ang hi chuan tu sorkar mahin an chhuah tak tak bawk lovin a rinawm. A chhan pawh kan duhdan a inang lo deuh vek a, kan sorkar hotu mi tlem te pawh hi an duhdan a inang vek hauh lo vang. Mahse an sorkar lai a nih si avangin tu remruatna pawhin kal se lungawi lohna lantir emaw, sawisel emaw a rem lo va, an ngawi mai mai emaw a ni ve ngei ang.

Mi tam takin henglai hmun hi mi thiltithei ṭhenkhatin engtin tin emaw anmahni mimal tan an nei mai ang tih hi hlauh namen lovin an hlau va. An hlauhthawnna hi thil àwm lo leh dik lo pawh a ni vek lo. Tun hmain sorkar lama thiltithei ṭhenkhatin vantlang hmun ni maia kan ngaih ṭhin kha mimal tan an lo nei zauh zauh tawh tlat a. Chumi hre pha ṭhenkhat chu an thla a phang a, chutiang thil chu a thleng leh mai palh ang tih an hlau a ni. Chuvang chuan a hmanna tur thu-hlaah ṭhenkhat chuan a tihdan tur eng eng emawte an han sawi a, an duhdante an sawi nasa hlein a lang. A ṭhenin khawih che lovin heti hian hmun awl leh zalen tak hian awm se an ti a, a ṭhenin chumi khami chu hetah hian awm se an ti a, a ṭhenin chuti khati chuan kawng kal se te an ti a. Thu leh hla a tam angreng viau mai. Mahse heng zawng zawng hi ṭhahnemngaih thil a ni a, hetianga duhthu samtute hi an demawm lo. A ṭhenin motor leh a dahna kan ngai pawimawh a, a ṭhenin Park nuam ve deuh kan duh a, a ṭhenin sorkar hmunhma mawihnai leh remchang kan ngai pawimawh thung mai a ni.

Rilrua awm lian ber chu a lawmawmna hi a ni. Hmunhma kan mamawh avangin hetiang ram kan han neih belh tur hi a lawmawm ngawih ngawih mai a, tapchal lungthu tlawha bang chhak lam hawi chunga a khat tawk a, ‘A lawmawm mang e aw,’ tih leh ṭhin tlak hial niin ka hria. Kan khelmual hmingthang ber leh laili ber maia duhthua kan han lut thei lo ringawt mai te, helai chhehvela eng emawti taka kan ṭi deuh tlat maite hi a ninawm tawh hrim hrim a. Kan khawpui laili laiah zalenna kan han neih belh tur hi a lawmawm takzet mai.

Kei ka lo ngaih ve dan chuan tu politician tan mah helai ram huam chhungah hian hmunhma neih ngamna tur a ni lovin ka hria a. Lo ngam palh an awm pawhin an thlahte tan thleng pawha nuam lo khawpa awm zuina tur a ni. Tun hma kha chuan, ‘Mipui hian an sawi rei peih lo,’ ti angreng khan kan awm a. Tun hnuah hi chuan tun hmaa kan ram hruaitute chet dan anga chet kha chu a ngamawm tawh lo vang tih hi ka ngaihdan a ni. Mi ṭhenkhat tan ngaihthlak a nawm loh palh chuan min lo ngaidam se la, mimal tu mah hming kan lam ri lem lo bawk a, hmanah kha chuan kan ram hruaitute pawhin vantlang (Mizoram House leh khawi khawiah emaw) hmuh phakah zû te kha an rui chiam ngam a. Mipui pawh khan kan en liam deuh mai a. Mahse tun hnu hi chuan khatiang chezia kha tihlan ngam a ni tawh lovin ka hria. In hmun lo ram chungchangah pawh tun hma anga mipui laka tlangnel viau mai chu a finthlak loh lehzual tawh viauin a rinawm.

Kan hotute hian ngaihtuahna fim tak hmangin heng Assam Rifles hmun kalsan hi Mizoram tana ṭha ber tur anga an ngaih angin han cheibawl zui se la, kan architech-ten ruahmanna han siamin ruahmanna hrang hrangte han khaikhin kual se la, kan ṭangkaipui dan tur takin ṭha takin kan chhuah ngei ang tih ka ring tlat a. Hetiang kawngah hi chuan keini aia thiam hi an tamin an ngaihtuahna pawh a thuiin ka hria a. A thlamuanthlak khawp mai.

Kan ram buaite kan han tawng a, chutah kan rambuai reh lai takte kan hmu a, kum sangbi tharte kan han hmu a, sorkarin thlai thar a leite kan hmu a, Assam Rifles ten Aizawl khawpui an chhuahsan laite kan han hmu a, kan dam chhung hian thil chi hrang hrang lian pui pui, Mizoramin a tawng kan han hmu hi chu kan vannei ve ngawt mai.