KAN THAWNTHU

Kan hringnun thawn-thu hi kan ziak mek a, mitinin nitinin kan ziak a. A then chuan uluk em emin kan ziak a, a then chuan kan ziak mai mai a. Mahse kan ziak theuh a ni. Kan thawnthu tawp hun chu tumahin kan hre lova, eng chena sei nge kan ziah dawn kan hre lo vek. Thenkhat chu an han thi a, an thawnthu chu a lo lar tan dawn chauhva. A rei tulh tulh a, an thawnthu chu a arh tial tial a. An ziah hun chhung zawngin tumahin an ngaihsak lo hial emaw tihtur a ni a. Mahse an thusawi te, an sulhnu te chu hunin a chawi lar tial tial a, an thih hnu te chuan an dam dawn chauh ni te pawhin a hriat thin. Chung zingah chuan Mahatma Gandhi te, Mother Teresa te, Sigmund Freud te, Taitesena te, Vanapa te kha an tel ang a. Kan hmuh phakah pawh Brig. T.Sailo te, Rokunga te, Zirsangzela Hnamte te pawh an tel ta ve ang. Mi tam tak, an dam laia hriat hlawh pawha lang lo kha an thusawi te, an nun te kha an hai ril tulh tulh a, an dam rei ta em em mai a. Vincent Van Gogh te pawhin lem a ziak thin a, a dam laiin a lemziak pakhat chauh a hralh a. Mahse a thih hnu chuan a lemziak 800 zet chu khawvel hian a inchuh ral ta vek a, a Sun Flower te phei chu to pa makin a to ta mai a.

Kan hmuh ve phakah pawh mi thawm na pui pui leh ri rum rum tam tak he Mizoramah hian an lo awm ve ta. A hun lai na na na chuan mi thenkhat chu an ropui tih loh rual an ni lo. An motor-ah India Flag an han tar a, motor tam takin an zui a, anmahni zuitute pawh keini ang mi pawimawh lo tan chuan lo biak ve mai mai ngam pawh an ni meuh lo. A zuitute an hrawl em avangin an zui mek phei chu an hrawl tih hai rual a ni lo. Lalna leh thuneihnaa thuam an ni miau alawm. An thlen chin chinah hmuaktu an intlar tiar tuar a, an laina nih kan inchuh luih luih a, vawikhat min han sawipui zeuh se michhe tana din chhuahna khawp thu phuh chhuak thei hialin an mawi thin.

Mahse chutiang mi ropui tak anga lang thenkhat chu he khawvel leh Mizoram hian a hre zui lo fova, an sulhnu lah hmuh tur mumal a lo awm reng reng lova. An bul hnaia awm te pawhin an sulhnu belh tlak han theh chhuah tur hriat loh chang an nei fur mai. An ropui lai leh an vanglai na na chuan sorkar motor tha ber berah chuangin an hawina lam ami apiangin, ‘Sir,’ an ti tak tluar tluar a. An beng hriatah thiam tak takin an ropuizia leh an fel em em thu te chu mi khabe themthiam thenkhatin an fah chamchi a. An ngaihthlaknawm tih loh zawng chu thudik leh thu tha pawh ni se a sawitu chu mi mawl an ni a, mi khabe themtlaw tihdan a ni. Thenkhat thusawi thiam lo ve tak tak te pawh an thusawi thiamzia te an awih zawng taka an han sawi chuan ka thiam tak tak emaw ti a an nui lai hmel leh a sawitu an duhsak lai te pawh ka lo hmu ve tawh thin.

Kan hringnun thawnthu hi engtikah nge a tawp dawn kan hre lova. Mi fing Socrates chu vawiin thlengin kan la hria a, kan la zir a, kan la ngaihven a. Albert Einstein-a te nungchang te leh Vawmphunga thukhawchang te pawh kan la ngaihven zel a. Mahse thawnthu ropui tak min hrilh tur ni a kan rin thenkhat chu an thawnthu sawi ngaihthlak tur a awm ta hauh lova. Heng mite hian thawnthu inhlan chhawn tlak min hnutchhiah lo satliah a ni lova, a tam ber chuan sawichhawn tlak loh thawnthu min lo hnutchhiah avangin anmahni hrechiangtuten an chanchin sawi an duh lo vek a lo ni ve thei a. An hun laia ropui anga an ngaih leh an tihdan kha a lo ropui awzawng lo a ni.

Dinhmun a san poh leh mawhphurhna a sang a, thiltih that leh thiltih that loh a langsar a. Ram hruaitute lek phei chu an thiltih tam tak hian hnam kalphung a hril thin. Kan Aizawl khawpui hi eng vanga heti em ema lo chawrhnawk ta nge tih thuah tlema han chhui deuh chuan tu te hunlai emawa thil thlen dan kha sawi that duh loh chin a lo awm thuai thuai mai. Kan mipui rilru sukthlek lo danglam chhoh zelna kawngah hian thil hrang hrang han chhuiin tu te emaw hi chu kawh bing neih a awl hle. Thenkhat chu an hringnun thawnthu han sawisak dawn ila, sawisak thei awm tak takin ngawih chuh tlat chin an nei thin.

Mi te hi an fel a, mi chanchin chhe lai te hi rin aiin an lo sawi duh lo hle zawkin a lang a. Tam tak hi chu kan chanchin kipkawi hi kan thih hnuah tuin emaw sawi ta phiar mai se kan lawm hauh lovang a. Keimahni ziah ngei kan thawnthu chu tha ka ti kher lovang a. Mi naran leh hruaitu dinhmuna ding ve lem lo te, mawhphurhna neia miin an ngaih lem loh te hi chu lo fimkhur lo deuh pawh ni ila a tha chuang lo nain a hriatthiam dan dan a la awm. Mahse mipui laka mawhphurhna nei tura ngaih, hna sang pui pui chelh leh ram hruaitute bik phei chu fimkhur a tul a. Mipui thatna tur ngeia khawsak leh rorel hi a bata an bat a ni bawk.

Vawiina kan thuneihna leh kan thiltih theihna hmanga kan tih thenkhat hi chu engtikah emaw miin an hriat chhuah hun a lo thlen tikah chuan kan hringnun thawnthu chu kan duh loh danin kan duh loh hunah an la rawn sawi ang a. Miin an hre dawn lo emaw kan tih hi an la rawn hre chho zel ang. Mimal nuna kan tlin lohna te chu min ngaidamin min haidersak thei mahse, mipui laka kan pawi khawih leh mipui laka kan bat, kan hlen chhuah tak loh te chu min la hai chhuahsak thiang a ni tih hriatreng tur a ni.