Field vs Station

Kan hna tam ber hlawhchhamna bulpui chu Field (a hmuna a tak tak) a thawktu leh awmhmun atanga lo enkawltu (Station) a awm te inkar rel fel loh leh enkawl kawp thiam loh vang a ni chawk. An inkarah Supervisor a awm ang a, chu Super-visor chuan awmzia a nei tur a ni. Supervisor-in awmzia an neih tawh loh chuan engnge thil awmdan tur sawithiam hleih theih a ni tawh thin lo.

BBC hian an hna hi an uluk khawp a (mi sawi ka hriat danin), Reporter an han tirh hian chu Reporter thiltih dan en zuitu chu an tir leh a, a en zuitu enzui dan chu a rintlak em tih fiah turin midang an tir leh thin e an ti a. Chuti a nih vang chu ni tur a ni, BBC hi rintlak bera khawvelin hei leh chen a lo ngaih ni.

Kan sorkar hna tam tak hi lungchhiatthlak taka enkawl a awm nual mai. Field-ah mi rinawm an awm a, Station-ah mi rinawm an awm chuan engkim hi a tha vek maiin a lang a. Tih theih loh chin chu theih loh a ni mai a, kan phak tawk tha berin hnathawktuten an thawk mai. Mahse Station-ah mi rinawm lo an thut tlat chuan thuthmun atangin mahni hlawh bak hlawkna neih ve an lo tum er teh mai a. Chu chuan thil tha lo pui pui a hring thin. Chutiang hmawr zumin a chhun sil chu hnathawktu an tam mai. Mahni phak tawka thahnemngai taka a hmuna thawh laia hnathawk thei hauh lo tur mihring han inpem buhbel mai te, hnathawktu tha lo han zilhhau dawn a chunglam atanga khawngaihtu lo neih tlat mai te, a sawi ve hauh lo tura ngaih, khawilai emawa a vawnfung vawn ve avanga sawi ve ta tlat mai te avang hian mi thahnemngaite tha a thum zova. ‘E e eee, ka pa ta a ni bik hlei nem,’ tihna rilru a piang fo mai. Kan Mizoram buaina lian tak pakhat, nuihzatthlak leh hautak ve zet si chu sorkar motor hi a la ni reng mai. Field Officer, zin kual a, hmun hran hrana an hnathawh endik a, tihdan tur kawhhmuhtute motor kawl ang hi Station Officer, kum tluana mahni in atanga mahni office chauh pan tur te’n an it ve ta tlat a. Motor dawn leh dawn loh chu hlawh atanga teh tur ni tein an sawi a. Kan sorkar hotute zingah a awih tawk an lo awm ta mai a. A buaithlak ngawt mai. Engti zawng maha motor dawng hauh lo tur, motor kawl ve ta mauh si te vulh nana kan Mizoram pawisa luangral hi thla tinin cheng maktaduai hu a ni hial ang. Chumi thliar fel thiam sorkar chu kan nei lo rei ta hle. Motor chungchang chu thu khat, a tak taka thawktute tana thawh ngaihna awm lo leh awmze nei lova Station atanga kan inthunun thin hi kan hlawhchhamna pakhat a ni.

Department hrang hrang zingah Education Department hi he inawpna fel lo (Field vs Station bikah) a tuar bertu an niin a lang. Tunhmaa School Inspector (Supervisory Officer) pawimawh tak mai thin kha a bo ta daih niin a lang a. Kan politician-ten Supervisory Staff te tangkaina zawng zawng bo vek khawpin Education Deptt. hi an han sawp a. Hmanni lawka an thu chhuakah phei chuan, ‘MLA te hriat lohvin zirtirtu sawn loh tur,’ te an han ti ta mai a. Kan MLA te an ropui a, an zahawm a, an hna a chungnun tehreng nen zirtirtu sawn leh sawn loh chungchanga mawhphurtu-ah an han insiam ta a le, kan chan chu a chau dawn raih raih khawp mai. Field Staff (Supervisory Staff) te thu lova Directorate leh District Office-ten thil an ti thin mah dik loh tih a, siamthat a tul tih tawh mah nak alaiin Directorate leh District Office te inawp dan kalphung duangtu MLA te’n a hring a hrana zirtirtu sawn chungchanga thu an han nei tur chu rora chhu tura Director chin phut ang vel kan ni mai em? Hun a’n kal deuh ang a, inthlan a lo hnai ang a, kan han inthlang zo chiah bawk ang a, thil awmdan tur hi kei chuan rapthlak tham hial turah ka ngai a. Vawiinah chhiatpui rup rupin buai ta chuk chuk lo pawh ni ila he thilin Mizoram Education a nghawng chhoh dan turah hian thil duhawm lam engmah ka hmu thiam ve lo. India ram politics chhe ber mai kha kan la lut ta tihna angah ka ngai a. Kan sawi mek, hna kal tluang pangngaia Field pawimawhna leh Station pawimawhna te chu kan Education Department-ah chuan a sawia sawi chi awzawng a ni ta lo. He thu kher hi chu tidanglam leh se ka va ti em!

Field Staff te inluling lutuk tur ven thiam hi a pawimawh a. Dik tak chuan sorkar hnaa dan tam ber (FR & SR) te, conduct rules te leh thildang pawh hi a thawktu tak takin pawi an khawih lohna tur atana invenna dan a ni hial law maw tihtur a ni. Chumi lo kengkawh tur leh sorkar dan angin a kal em tih te leh Service matter te lo buaipui tur chuan Office lama thawktute hi an awm a. A thawktu tak chu Field ami te an ni a, Field ami te thawh theihna tura buatsaihtu chu Office hmun thu te hi an ni. Dawhkan atangin engmah a tak takin a tih zawh theih loh. A khawi ve ve pawh an inlulin a, pawimawh ber anga an inngaih chuan a fel hauh lo. Ziak fel si lova pawisa hman chiam chu buaina a ni a, ziak fel ringawt a hman dik leh chuan si loh chu tenawm tak a ni. Station Staff thenkhat, ngiat neih avanga File pending ching te ka lo hmu ve tawh a. A manganthlak duh khawp mai. Chutihlaiin Field Staff te endik thiam hauh lo, an sawi apiang awih zo vek zel te ka lo hmu ve tawh bawk a, a manganthlak bawk. Field Staff thenkhat, pawisa neih theihna tur ringawt ngaihtuah, vawi tam tak pek tawh hnu pawha an thawh chhuah lam sawi ngai reng reng lo leh sawi tur nei hauh lo te pawh awm theih a ni. Hetiang mi te hi dan naranin an hmunhma va hmuhpui chiah ila, duat sa lohvin min duat a, an hnathawh lo lamah hun tam tak kan hman theihna tur an ngaihtuah chung duh khawp mai.

Kan sorkar hian sorkar hna tak tak mahni a thawh ai mahin a thawktu te kaihhruai leh vil hi a hna a ni tih hi engtikah tak hre ve ang i maw. Zirtirtu sawn dan tur chu fel tawk lova an hria a nih chuan Posting Norm te siam se, chu aia khauh deuh an duh a nih pawhin Posting Rules te duang se, anmahni takin zirtirtu sawn chu buaipui kher lo se a tha ngawt ang. Field Staff te hnathawh dan tur vilna tur te, mipuite tel vena tur (PPP-mode te chu kan sawi hluai hluai a, mahse a tak kan thleng chuang lem lova) zangkhai deuh te siam se a tha ngawt ang. Tuna kan sorkar hi chu hetiang ti thei tur hian a chak tawk a, Officer rualin an han kil laih laih a buai ta mai tur pawh a ni si lova.