MILLENNIUM CENTRE

Aizawl khawpui chawitu ropui tak leh MNF Sorkar timawitu tak chu kan Millennium Centre hi a ni. Khaw that ni chuan chhunah te leh tlai ni nemah te he hmunah hian mi chi hrang hrang, nula tlangval te, naupang te, nu chhangchhe deuh leh patling te an han thu chawl a. A bathlar kual kawng bul aṭangin mi kal vel te an han thlir a. Hetiang hmun Aizawla a awm hi chu mi tam tak tan chawlh hahdamna remchang tak a ni a, hmun nuam leh inhmuhkhawmna remchang tak a ni. Nula tlangval te he hmuna tui tak maia an han titi bawrh bawrh te, an han thuho dal dal leh zalen tak maia pawn boruak thengthaw hnuaia an han awm hi a va hmuhnawm em!

A kawtzawl remchang laiah Charity thil eng eng emaw an han buatsaih a, zaithiam te an zai a, sumdawng thenkhat lahin an sumdawnna bungrua te an han pho chhuak bawk thin. A hmang tangkai theiten an han hmang tangkai a, chawlh hahdam nana hmangtu ten chawlh nan an hmang hi Aizawl khawpui tan a hlutzia hi sawiin a siak lo.

A chhungah kailawn tawlh thei te a’n awmin inkhai chhohna te a’n awm ve lehzel a. Thingtlang hla tak aṭanga lo kal, khawpui hmun danga la kal ngai lo leh hmun dangah hetiang thil la hmu ngai lote tana a hmuhnawm turzia te, a ropui turzia te leh rilru leh ngaihtuahna a tihchangkan dan tur te hi ngaihtuah tham fe a ni. Kan motor (jeep
ṭawngṭawl tak) hmuh hmasak kha a ropui a, kan car hmuh hmasak kha a nalh a, kan la hmuh ngai loh thil tam tak, vawiina thil pangngaia kan ngaih tak mai kha kan hmuh hmasak leh kan hmuh chhun apiang kha nun tihlimtu a ni.

Millennium Centre chhungah dawr chi hrang hrang a’n awm a. Vairama ‘Mall’ ti tea an sawi, ‘Shopping Complex’ ti tea an sawi dawr changkang inthuahthip ang te kha he Millenium Centre-ah hian kan lo nei ve ta. Sapram leh hmun changkang dangah pawh heng dawr te hian min titlangnel ang a, nasa takin kan rilru a thuam dawn a ni. Vairama awm tam tak aiin a nelawm a, kan tan phei chuan a nuam zawk bawk. He Millenium Centre ang mai hian kan Mizoram hi MNF sorkar khan chawikan a tum a. Changkang tak leh fel thlarhin awm ila tiin suangtuahna tam tak an neiin ka ring thin a. Mahse in pakhat, cheng tam tak senga sak a, a satu tur mithiam rawih thlawp ang ringawtin khaw hrang leh hnathawktu hrang hrang hi enkawl theih a ni ngawt lo tih an hrechhuak tlai deuh a. Chu chauh ni lovin an sorkar kha mite’n an han ‘Sir’ tam tak deuh kha chuan an awmdan an theihnghilh ta ni maiin ka hria. An sorkar tirha an tum chu Millenium Centre ang Mizoram hi a ni ngeiin ka ring.

Kan sorkar hrawn mek hian Zodin Cinema Hall hmunah engemaw ni an din dawn mek ni awm tak a ni a. Eng angin nge a lo chawr chhuah ang a, engnge kan hmuh dawn tih mipuiin kan lo thlir mek a. Eng tak thlir chhuak i maw le? Kum 10 ral hnuah te hian, ‘Keimahni bul tan a nia, kan tumdan chuan chutiang khatiang chu a ni,’ tih te; ‘An tihlawhtling thei lova, an lo tikhawbaw zo vek a, keini hian kan tharthawh leh a ni,’ tih te leh, ‘Kan bul tan sa kha an chhunzawm duh lova, a lo heti ta a, a lungchhiatthlak ngawt mai,’ tih thu te hi a leng nuai nuai thei ve tho mai. Muang leiah Contractor-in a’n sa ngei ang a, a Estimate hi vawi engzat emaw te hi Revise a ngai leh mai ang em? Engtin tin emaw hian a hna hi kan siksawm ang a, sak zawh hmaa tute thahnemngaiin emaw chhut chhiat bur bur te hi a ngai ang em? Nge, kan Millenium Centre hi chu, ‘Ka nau i ni,’ ti thei tur he hmunah hian thil mawi leh duhawm, mipuite tana remchang siamsaktu a lo chhuak ang em?

Mi fate chuan thing phun ngawr ngawr hi an tum tawh lova, ‘thing mawi tak’ phun an tum a. In sak ngawr ngawr an tum tawh lova, ‘in mawi leh nuam’ sak an tum tawh a. Kan Jerusalem, Aizawl khawpui cheimawina rilru te hi kan pu pha ve tawh em? Nge, kan duhsak zawng miin a hna a chan dawn phawt chuan thawk chhe hmingthang pawh ni se kan pe zel ang a, han sawi chhunzawm dawn pawhin mi thil chinchang hre pha chin chuan, ‘A thawktu kha chumi khami chu a nia, a hnathawh tawh kha chuti chu a ni chungin kan sorkar khan a pe lui miau si a, tunge sawi buai peih tawh ang?’ kan ti mai ang?

Millenium Centre ka kal pelh apiang hian MNF sorkar kha ka rilruah an lo lang a. Govt. Complex, Luangmual ka tlawh apiangin Brig. T.Sailo ka rilruah a lo lang thin bawk a. Mizoram a field tam taka Grass kan phah ka en hian kan Congress sorkar hrawn mek hi ka ngaihtuah bawk a. Kan ti thei a kan inrin ang ang hi kan ti zel mai zawng niin ka hria.