COVID-19 ZAR

Hripui rapthlak tak maiin min nuai a. Kan sorkar leh mi thahnemngai te zarah a hlauhawm ang hu aiin tun thleng chuan nunna chân kan la tlem rih a, a lawmawm ngawt mai. 

Kawng tam taka kan tawrh nasatzia leh mi tam takin eizawnna kawnga harsatna an tawh nasatzia hi sawiin a siak lova. Kan tawrhna lam hian eng chen nge min la nghawng zui dawn pawh keini ang duang chuan kan hrethiam phak lo. 

Hripui avanga thatchhiatna kawnga kal ringawt pawh hi sawi tham fe a awm a. Kan sorkar pisa lamin an tihtur pawimawh leh mipui tana thil tangkai an tihtur tha fe fe an tih tak loh pawh hi a chhut ngawt chuan chhut chhuah zawh a ni hial lovang. Hripui avanga chhungkaw khawsak kal tluang tur kal tluang ta lo te, zirna kawnga buai chuar zo ta vek te, zirna bansan chhunzawm ta mai te leh sikul kal tluang ve hle hle tur, sawngkawn zo ta vek te hi han ngaihtuah chuan a nghawng hi na tak a ni. Chhiat tawh thu-hlaa thin na te leh lungdam hlei thei lo, hnemtu tur thenrual tha leh laina te inkiltawihna zawng zawng te hi pawisaa chantir chi pawh a ni lo. Chutiang bawkin thatni thuah pawh damchhunga ni nghahfak ve ber a duhdan ang lo hlira awm ngai ta mai te pawh kan tam hle bawk ang.

Hetih lai hian heti a nih tak rau rau si-ah chuan a thim zawng hlira thlir lovin a êng zawngin kan vanduaina hi thlir ta hram hram ila. Kan tihdanglam theih loh chu a thawhpui thiam dan kawng zawng ila kan hlawkpui berin a rinawm. Heng ngaihtuahna te hi kan hripuiin kan duhdan lo anga min hrek behna atanga kan chher chhuah a ni tih hre theuh ila a tha awm e. 

Hripui avangin thihna thuah kan tihdan phung pangngai lo takin kan intawiawm hut hut lova. Hei hian that zawkna a nei thei. Kan thi a, lu kan sun a, kan lungngai a. Mahse mihring pawngpaw punkhawm tam ngawt hian min hnem chuang lo thei. Min hnem chuang lo mah se kan tihdan a lo nih tawh avangin hripui len hma kha chuan pawngpaw kalsan ngawt theih a ni lova. Tawngkhawlo ni suh se, tuarpui lem lo, mahse kan lan ve loh chuan tlangrel kan phur ang tih hlauh vanga kal ringawt, lusun chhungten min thlamuanpui hauh si loh mihring kha kan pungkhawm chiam chiam a. Hei hi hnam changkang te leh hnam dang tihdan pawh a ni chiah lo. A hnem thei tur chin deuh leh mitthi chhungten an hmel an hmuh a an thlamuanpui theih tur chin deuh an kal khawm mai a. Mahse keini chuan kan la kaihlai ta lutuk a, hnam tihdan anga kalpuiin a khaw nawtin kan chim ta thin a. Chu chu hripui chuan a phal ta lova. A ro nei thei chin leh a kal tur leh a tel ve tur chin ngawih ngawih zingah pawh a loh theih loh takmeuh meuh chin chauh kal ve theih a ni ta. 

Thatni lamah pawh inneihnaah a khawtlang hraiin kan inhrai a. Tam tak tan chuan a huphurhawm ta ut ut mai a. Inneih duh si, a sum leh pai lam harsatna avanga tihdan hre lo tam tak leh mi lungngai tam tak kan awm tain a lang a. Ruai han buatsaih loh ngawt chu ni thei a hre si lo, han buatsaih dawn a mahni tlin baka tih a ngai dawn tih ngaihtuah si mi tam tak an awm. Hripui len laia innei thenkhat chu lawm taka hripui kian hma ngeia inneih duh an awm tih mit ngeiin ka hmu. Theih ni se hripui kian hnuah pawh he inneih sawngbawlna hi chu danglam chhunzawm zel se a tha zawkin ka hre hial. Mahse heng thil hi sawi lawk theih a ni lova, a tha kan tih chuan kan chhunzawm zel ang a, a tha lo kan tih miau chuan kan tihdan ngaiah kan let leh ang. Kan Kristian dan pangngai taka inneih duh, mahse kan kalphung pangngaia tih ve chu tlin a inhre si lo kan tam chuan hripui hi kawng tam taka anchhia a nih laiin inneih thuah chuan Mizo hnam tan malsawmna a ni thei.

Mi tam takin kan kohhran inkhawm hi a tam lutuk tih thu kan sawi a. Mahse kohhran inrelbawlna lailum a awm, a thibeh pha chin tan kohhran inrelbawlna kalphung pangngai chu na taka do theih a ni lova, tihdanglam tum tlat pawh a harsa — mahni pian chhuahna kohhran kalphung do chu khirh tak a ni. Mahse khawvel dang leh kan khawvel hmasawn dan te ngaihtuah a, hmun danga an tihdan te ngaihtuah chuan kan kohhran inkhawm hi a tam lutuk chuan a lang. A tang laklawh te lahin, ‘Heti chung pawha heti kan nih chuan heti hi ni lo phei ila heti hi kan ni lovang,’ an ti miau a. In pheh thlak chu harsa ve tak a ni. Mahse mak tak maiin inkhawm loh kan han ti a, lungleng hmel hi duh ang tawkin a tam ta lo tlat a. Hun bik leh chawlhni te lo phei chuan inkhawm chak hmel hi rin aiin a tlem em maw ni chu a tih theih. Ngaihtuah tur tam tak a awm tih a hriat khawp mai. Khati em em a inkhawm nasa kha inkhawm hetia kan han bansan thut hi chuan darh zawh vek hial awm a ni a, kan darh mang chuang lova a lang hian ngaihtuah a tithui khawp mai.

Kan sorkar Office tam takah an inkal chhawk a, kan buai zo vek chuang lovin a lang a. Chuti a nih chuan kan Office lamah hian a thawk tur atana mamawh tawk aia tam kan lo thawk em maw ni dawn tih hi ngaihtuah tham tak a ni bawk. Mimal thilah chuan chhiatpui fe fe an awm tih a lang sa nghal mai a. Kan sorkar office lam hi chu en chian phahna tham tak niin a lang. 

Eng pawh ni se kan dan zawh tak loh rau rau chuan he kan hripui hian eng thil tha nge min thlen theih tih hi i ngaihtuah tlang teh ang u.