YOUTUBE! AW....... YOUTUBE!

Mi ṭhenkhat tan chuan tuna Youtube han sawi thar leh ngawt pawh hi a chawhnu mah mah ngeiin a rinawm. An hmelhriatna a rei tawh lutukin ṭhenkhat phei chu Youtube nena piang rual an ni tawh hial awm si a.

Keimah tak phei hi chuan Youtube hi ka en tam ta viau mai. Lehkha chhiar lamah harsatna te han neih deuh a, tun hma lam han phak loh deuh chuan a ena en lam te, a ngaihthlaka han ngaihthlakte a lo awlsamna zawk chin a awm a, kan ngaithlain kan en ve ta mai ṭhin zawng a nih hi. Han en han en takah chuan a ṭangkaina leh a lawmawmna tam tak hmuh chhuah tur a awmin ka hre ṭhin a, a chang chuan lawmawm ka ti tak meuh meuh mai.

Mizorama thil thleng leh thil awm, nunphung pangngai, mi thusawi leh chanchinbu aṭanga kan hriat phak hauh loh tur thil tam tak Youtube-ah hian en tur a awm a. Kut hnathawktute hmalakna hrang hrang han hmuhte hian ṭhuthmun aṭangin beiseina kan lo nei thar ve leh a, ṭhuthmun aṭangin kan thla a muang thar a, ṭhuthmun aṭangin kan lo lawm ve ṭhin. Hetia lawmna kan han neih a, beiseina kan han neih thar theihna tura hmuh theiha thil awm dan rawn tarlangtu, Youtuber ṭhenkhat hi chu an lawmawm ka tiin awmhmun aṭangin lawmthu kan hrilh mawlh mawlh a ni ber mai.

Youtuber chi hrang hrang an awm a, ṭhenkhat chuan thil thleng thar hrim hrim, leimin te, chetsualnate leh mipui punkhawmna lam te an thlur a. Heng te hian min tibengvar ve hle mai a, lawmawm tak an ni. Mahse heng zinga ṭhenkhatte hi chu rawn tarlang lem lo mah se hriat lohva pawi lem lo te pawh a awm ve thei. Beiseina kan neih phah lo va, lawmna kan chhar belh lem lo va, hma han sawnpui tur pawh a awm lem lo. Chuti chung chuan ṭanpui ngai ṭhenkhatte chuan ṭanpuinate an dawn phah ang a, khawngaihtu leh lainattute zarah sum leh paiah pawh an lo hlawk phah thei a, fimkhurnate pawh mi ṭhenkhat chuan kan chhar thar phah ve thei bawk.

Kut hnathawktute hmalakna hi a hmuhnawm ṭhin a, a lawmawm bawk. Han en han en takah chuan awmphung pangngaia kan lo ngaihsak lem loh, KVK te hi an fakawm ta riauvin ka hria a. Hmun hrang hrangah Officer fel leh kut hnathawktute tana ṭangkai leh mahni hnaa ṭhahnemngai tak tak an awm ni te hian ka hria a. A lawmawm ka ti ngawt mai. Sorkar hnathawk, mahni hna ngaihsak lo leh ngai pawimawh lo thawm riva leh an hmel hi hmuh a ninawm a, hnathawktu (sorkar hnathawk pawh), mahni hna ngaihlu leh ngai pawimawh te chanchin te, an hmelte hi a ngaihnawmin a hmuhnawm ṭhin. Sorkar department ṭhenkhat, thlalak dawna inbuatsaih der chiam maite hi awm theih a ni a, thlalak tur hrim hrima inbuatsaih a, lemchang ta chiam chiam pawh awm ve theih a ni. KVK te hi chu chutiang an ni lovin ka hria a, an sulhnu hian mit leh beng a tihahdam viau hlawm mai. An sulhnu ṭha leh a hmuhnawm laite chu an thlang chhuak ve bawk ngei ang tih ring mah ila, sorkar department ṭhenkhat hi chu a tak hmuh tur awm lem lo, office lamin an buaipui dan te, a pawisa an sawi chhuah dan te, an ruahman dante leh thil dang dang, tute emaw tilawm thei thil tam tak sawi theih a ni ve tho mai. Mahse KVK te hi chu an rah chhuak aṭanga lang ni deuh hian ka hria a. A lawmawm ka ti ngawt mai.

Thawnthu phuahchawp ngau ngau, han ngaihtuaha a tak tak ang thei vak lo, ṭawngkam dik lo deuh leh chhiar thiam chiang mang lova ti ngat ngat pawlte pawh an awm ve bawkin a lang a. Hmasawnna lam leh zir tur engmah awm lem lo, thawnthu tawp thei mang lo, phuahchawp belh zel chite pawh ngaihthlak tur a awm a. Hengte hi chu a ngaina bik leh a ngaithlatu pawl awm deuh nite hian a lang bawk. Hengte hi chu a ṭangkaina lam aiin a ṭangkai lohna lamte pawh awm thei a ni. Kan hnam chanchin tikhawbaw thei thil te pawh niin a lang. Ṭhangthar tam tak chuan heng hi thutakah an ngai mai ang tih a hlauhawm.

Mi chhuanawm leh fak tlak kawmna te, Pathian thute leh thil chi hrang hrang a tam ve ta hle a. A lawmawm lam zelah ngai mai ila. Ṭhenkhat phei chuan Pathian thu lam lo chu ngaihthlak an tum lo hrim hrim mai awm mang e tih theih a ni a, thlarau lam ngaihtuah pawhin kan Youtube hi chu a ṭha ve ngawt mai.

Fiamthu lam a awm nual bawk a. Mizoramah hian fiamthu thiam kan nei nual a, a lawmawm ka ti ṭhin. LPS Network lamin fiamthu inelna an han buatsaih ṭhinte hi thil lawmawm tak a ni. Fiamthute hi a lo hausa tih hi kan hre chhuak thar zel zawng a nih hi. Ho te te anga lang hian tun hmaa kan la hriat ngai loh thil nuihzatthlak tak tak chhawp chhuah tur hre thei zel mai an awm a. Hla phuah ang deuhvin fiamthu hian tawp chin a nei dawn takngial lo tih a chiang viau. Thangkura, Mapuia, Mastea te an fakawm. Hetia hming tlem té ka’n lam chhuah nachhan pawh a fakawm zual nia ka hriatte an nih vang a ni. Anni lo pawh fakawm tak tak an awm a, fiamthu tel lo hian hnam a kim thei lo. Kan puipunna hmunahte hian fiamthu thiam, min awi tleitute hi kan mamawh viauin ka hre ṭhin. Zai hi ngaihnawm ka ti hle a, mahse a tam ta lu deuhte hian ka hria a. Kalkhawmna hmun tam takah chuan Thusawi-solo-thusawi-solo-thusawi... a ni fo.

Politics thilah te mawlh hian kan ṭangkaipuiin a lang. Tun hma anga duh duh tak meuh meuh sawi chiam chiam kha a rem tawh chiah lo. Kum khat hnu te, kum thum hnu leh kum sawm hnu thlenga miin kan thusawi an rawn phawrh chhuah hian a hun laia lo fimkhur loh chuan fuh lo thei a awm. Hei hian kan politics kalkawngah mi tam tak chu a tifimkhur ngei ang a, a fimkhur thiam lo tan pawh chan a chhiat phah thei. Sawi thiam inti deuhva a hunlaia kan sawi hi a lang a changin miin an rawn phawrh leh ang a, ‘Ka sawi lo,’ tia ṭan khawh ngaihna a awm dawn lo tih hriaa fimkhur thiam chu ngai ve tak a ni ta. Hemi kawnga kan changkan phahna hi rin aiin a nasate hian ka ring ṭhin. Tun hma ang a, sawi tawh reng pawh, ‘Ka ti lo reng reng,’ tih kha a rem lohna chin a tam ta viau.

Youtube pawh a ṭha vek bik hauh lo. Thu belh chian dawl lem lo, lehlam thusawi ringawt ringa tlangzarh vakna atan Youtube te hi a remchang phian a. Mipui rilru a hruai kawi thei a, ngaihdan dik lo tak mai a darh vak thei. Chu chauh ni lovin ṭhenkhat chuan Youtube-a tarlan zawng zawng hi an ring tlur mai ang tih pawh a hlauhawm. Eng lai pawha kan ngaihtuah ve reng tur chu, ‘Engkim mai hi a lutuk chu a ṭha lo ve,’ tih hi a ni.