AZAWL MUNICIPAL CORPORATION (AMC)

Mizote tana Jerusaalem, Aizawl khawpui hi Mizoram tan a pawimawhzia sawiin a siak lo. Ram tam takah an khawpui bik chu awm mah se, chumi tluk deuhthaw chu hmun dangah a awm nual thin. Ram thenkhatah phei chuan an khawpui ber aia mihring cheng tamna zawk te a awm a, ram thenkhat chu an khawpui ber aia sumdawnna lama lian zawk te a awm a. Kawng hrang hranga a khawpui ber aia chungnunna nei khawpui a awm nual thin. Aizawl erawh Mizoramah chuan khaw dang lakah chuan kawng tinrengah a chungnung larh mai a. Chuti a nih avang chuan Aizawl hi kan ram hmel lanna a ni lo thei lova, kan khawsak dan leh kan ngaihtuahna tam tak hian Aizawl hi a tinzawn reng ti ila kan sawi sual lovang. ‘Aizawlah chuan,’ ‘Aizawlah pawh,’ tih hi mi tam tak rilrua thu awmsa riak reng ang a ni. Chuvang chuan kan Aizawl khawpui kan enkawl dan hi a pawimawh em em a ni tih kan hre thei. Tun hnaiah kan PWD Minister-in, ‘Aizawl khawpui chhung kawng hi a tha phawt tur a ni,’ ti a a sawi te kha lawmawm ka lo ti em em a. Kawng hrang hrangah hetiang hian Aizawl khawpui inrelbawlna hi fel turah ngai ila, dan te hi Aizawl khawpuiah chuan khauh bik se, veng bilin, ‘Kan vengah chuan,’ ti a khawpui inrelbawlna kalh zawnga thu kan vawthla thin te hi tihbo ni se a tha khawp mai. Aizawl chu Aizawl nihtir reng hi kan vai a tan a tha a ni. Mizoram khawpui dang leh District Headquarters pawh hian an hriat loh hlan thlengin Aizawl hi an entawn dawn tih hi a hriat sa.

Kan Aizawl khawpui enkawl turin dan ang taka mipui thlan chhuah Corporator te kan nei a. Chung chuan Aizawl khawpui enkawl kawngah mawh an phur a ni. Kan Corporator te rilru leh inkaihhruaina ang ang hi kan Aizawl khawpui hmel tur a ni a. A bikin Corporator zawng zawng kilkawi khawmtu, Mayor te an pawimawh hle ang. Mayor thuneihna huam chhungah hian MLA bial engemawzat a awm avangin Mayor te hi a nihna takah chuan dinhmun pawimawh leh mawhphurhna sang tak nei an ni. Mizoram siamthat hi tum ta ila, ‘Minister nih nge i duh Mayor nih?’ min ti ta se Mayor nih hi kei chuan ka thlang hial awm e. Mi ramah pawh Mayor ropui te hi chu an hming te a thang a, an sulhnu avangin khawpuiin a tha zawngin danglamna hmel a hmu thin a, an thawh that a, an thawh thiam phei chuan Mayor dinhmun te pawh kum rei tak tak an chelh thin a, mi zah leh ngaihsan an hlawh thin. Mahse keini chuan Mayor nih ai chuan Minister nih te hi kan châk zawk mai awm mang e tih theih a ni.

Tun dinhmunah chuan kan mamawh tak pakhat chu in sak dan awmze nei, khawpui enkawltute duhdan ang (Building Regulations) kenkawh that hi a ni phawtin a lang. Chu chauh ni lovin kan awmdan ang ang a dan fel tak hnuaia kan inthenawm khawvenna tur te leh sorkar duhdan anga kan awm theihna tur ngaihtuah a ngai. Hemi thuah hian kan AMC te hi ngun taka entute tan chuan duhkhawp an harsa angreng viau mai. Hmun tam takah mimal in sa turin lei laih phalna te an dil a, thal laia lei laih chauh phalsak an ni. Thal lai kan tih chu November - April thla vel a ni a. Ka hriat pakhat chuan September thla velah thal laia lei laih tumin in hmun laih phalna a dil a, AMC lamin phalna an pek meuh chuan a kum leh April thla a lo ni tawh a. Buangbar angreng takin an chet phah ta a. Anmahni dan siam pawh bawhchhe lo thei lovin mipui min siam tihna a ni.

AMC hian in sak hunah ban phun dan tur a siam a, ka hriat sual loh chuan thenawmte nena inramrina atanga fit hnih aia hnai lovah ban phun tur a ni. Mahse chutianga an han phun hnuah chuan mi thenkhat chuan bathlar an han tithlawk leh a, a tawpah meuh chuan thenawmte nena bang insi reng a awm te an awm chhunzawm ta nuai mai a. A then phei chu an bathlar a insulpel hial. Chu chauh ni lovin vantlang kawng chunga bathlar thlawk chhuak te, luikawr kama in sa, an bathlar thlawk chhuak leh luikawr lehlama thenawmte bathlar rawn thlawk chhuak, luikawr chunga bang insi dawn a awm te kan awm ta nuai a. AMC lah chuan engmah an sawi zui tawh lo ni te pawhin a lang. Hemi avanga vantlang leh kan khawpuiin kan tawrhna hi a nasa tham viau mai. In sak chungchangah hian sawi tur tam tak a awm a, AMC tan hmun tina vengtu dinhmun a ding a, tlin tak a vil zui leh indaih taka awm hi thil harsa te pawh a ni thei. Chuti a nih chuan Aizawl khawpui chhunga Local Council te hnenah hian tihtur chin bitukin an thawh tur pe thiam sela a tha hlein a rinawm a, Local Council te hi chhawr thiam sela a zia deuhvin a rinawm a, mawhphurh thu-ah pawh AMC tan insawi thiamna tur a awm ve deuh ang. Chutianga tih a nih chuan thil lo awm leh tur pakhat chu AMC te chuan Local Council te thu thlen leh an duhdan te a ngaihven that a, an kutke an nih ang ngeia an ngaih pawimawh a tul hle dawn a ni. Tuna kan awmdanah hi chuan mimal leh Local Council te hi kan intiat tawk vel reng ni mai te pawh hian a hriat theih.

AMC hna pawimawh tak dang pakhat chu bawlhhlawh leh a sawngbawl dan hi a ni. Tuna kan dinhmunah chuan a paihna lamah remchan lohna a awm avangin kan bawlhhlawh tawih thei leh tawih thei lo te hi mipuiin thliar tehmeuh mah se an paih pawlh leh tho tho niin an sawi a. Tak tak ni maw. Aizawl mipui tan bawlhhlawh thliar hi a buangbarthlak thlawn a, a phurtu tan pawh a thanatthlak a, thliar vel hi thil awmze awm tak tak vak lo niin a lang. Kan bawlhhlawh te hi a enkawltu tur dik tak, AMC hian fel taka enkawl hi an tum ngei tur a ni a, kum nga chhung te chuan awmze neiin kal theih awm tak a ni. Bawlhhlawh paihna tura ruahman belh ni a sawi, Chhimlam (Melriat?) leh Khawthlang lam (Luangmual? Tanhril?) ami pawh vawiin thlengin kan la peih lo niin a lang a. Han ngaihtuah mai pawhin Tuirial bawlhhlawh paihna ringawt a Aizawl khawpui bawlhhlawh paih kan tum chhung chuan kan kawng zim zawng te, kan lirthei inhnawh tawt dan te, Tuirial hmuna a paihna kan neih dan te enin fel ngaihna hi awmin a lang lo viau mai.

AMC hian tun dinhmunah chuan bawlhhlawh (Solid Waste) leh in sa thar te in sak dan (Building Regulations) hi hnapui berah a neih ang a, hemi hi tha taka a kalpui a, khua leh tuiten dan kan zah viau thlenga ama thu chhuak a a din ngam hian kan khawpui chu a ziaawm sawtin a rinawm. Hemi baka eng eng emaw te te ngaih pawimawh ve thova, a ‘ve tho’ lamah te hian kan tui ta zawk a nih phei chuan kan Jerusalem hi a fel lawk dawnin a lang lo.

Local Council dan bu te hi a kimchang lo viau mai a, a buaithlak angreng hle. Local Council te kan han inthlang a, kan invuah fel atang chiah hian a fuh loh dan a awm nghalin a lang. Local Council member thlan tharte chuan Chairman an thlang ang, tiin dan buah a awm a. Mahse chu inthlanna chu tunge ho dawn? Tu kaihhruaina hnuaia inthlan tur nge tih engmah a inziak tawh lova. Chuvang chuan Local Council tam tak chu Party lamin, ‘Hei hi Chairman.....’ an ti mai a. A tir phat atangin Party/Unit thuin Local Council chu a’n kal phawt mai a. Hei hi siamthat a tul thu AMC-ah pawh ka thlen tawh a, vawiin thlengin tihdanglam a la awm lo. Hemi bakah pawh hian hnathawh dan tur te, thuneihna chin te leh tihdan tur inkawhhmuhna a tlem em em a. Local Council te tan hnathawh thiam a harsatna tam tak a awm.

Tuna kan kal dan ang renga AMC hi a kal chuan kan buai chho telh telh thei a. Kan awmdan awmsa dik lo siamthat te phei chu a hla angreng khawp mai. Kalphung awmsa zulzuia kan kal mai mai chuan mahni ram chin baka fit li a bathlar rawn thlawh chhuahtir te, tuihawk luankawr a tui luang tur dal lo thei lova tui lakna pipe PHE lamin an kaltir tlat te, Soak Pit nei lova Septic Tank thli vantlang kawra luan chhuahtir ta mai te, vantlang luikawr tizim rawk khawpa ban phun te hi ‘mi tihdan’ tiin kan en liam ang a. Kan awm zel dan tur hian khawpui fai leh thianghlim lam kawk lovin, ‘Slum’ a ang tawlh tawlh thei. Kalphung thar nena Aizawl khawpui enkawl ngam leh enkawl theih inring AMC kan mamawh hle a ni.