CENTRAL SPONSORED SCHEME (CSS)

Kum 1978 vel aṭang khan Mizoramah Central Sponsored Scheme a awm a. Chuta ṭang chuan a dang pawh a rawn awm zel a. Vawiinah chuan CSS hnuaia thawkte chu a sing tel an lo awm ta a. Kan ṭhatpui viau rualin a enkawltu lamah chuan kan buai phah ta viau mai.

CSS rau rau hi a inang lo viau mai a, a thawktu lak dan pawh a inang hek lo. Ṭhenkhat chu sorkar hnathawk lak dan pangngai thlapa lak an ni a, ṭhenkhat chu Unit leh Politician te duh dana lak tak maite an awm a, chu'ng mite chuan sorkar hna dil dan pangngai leh kalphung engmah an zawm ve lo va, ṭhenkhat phei chu chu hna thawk tura thiamna ngai (required qualification) nei lote an ni. Ṭhenkhat chu Officer tuin emaw an lakte pawh an ni ta ve ang. Officer tute emaw hi chu an fel khawp a, anmahni lang mang hauh lo hian an duh chu Politician te an tihtir thei a. Sorkar hna thawktu lak dan hi a pawimawh em em a, dan dik taka lakte chu dan dik lo deuh leh vawikhat thinur vanga ban mai mai theih an ni lo va. Chutianga sorkarin a tih vaih chuan court-ah te an kal chuan thiam an chang mai a, sorkar tan hekna nasa tak a ni. An thawh loh chhung zawng zawng hlawh kha pek leh vek an ngai ṭhin. Chu chauh ni lovin an seniority te pawh an chhawm leh vek theih chang a awm hial. Mahse dan dik lova lak, tuin emaw a duhsak avanga ‘Lo thawk ve rih phawt mai teh,’ an tih satliah hmanga thawkte chu ṭhangkhat lian pawh thawk mah se, an lak dan kha a dik loh chuan englai pawha bantir theih reng an ni.

Mizorama CSS awm hmasa pawl, ICDS-a thawktute hi dan ang thlapa lak an ni a, chutia bantir mai mai theih an ni lo va. CSS ṭhenkhat danga thawkte hi chu Unit President-in a duhsakna bak tehfung awm hauh lova lak emaw, tu Minister-in emaw a recommend-na lehkhathem tak ngial pawh awm lo, ṭawngkaa tute emaw a nawr avanga thawhtirte an ni a, chu'ng mite chuan hnathawktu tura ruat an nihna lehkha (appointment letter) te chu khawi aṭangin emaw nei ve teh meuh mah se sorkarin rawih chhunzawm emaw, dah ngheh emaw a ba lo. An hna chelh mek thawk tura thiamna an neih loh phei chuan ṭanfung tur an nei lo. Chu chauh a ni lo, an laknaah khan hnathawktu lakna tur (sanctioned post) a awm em tih te a awm lehzel a. Hnathawktu chu lo la dawn ta se, sorkarin pawisa a nei thei dawn em (financial sanction) tih te ngaihtuah a la ngai ta zel a. Heti taka sorkar hna lak hi a khirh avang hian Department tam takah indaih lo em em chungin, hnathawktu thi te, hnathawktu kaisang ta te, hnathawktu pension tate hmun ruak luah tur pawhin Department lam aṭanga nawr ngat ngat pawhin, hnathawktu hmun ruak hi hnawh khah lohvin rei tak tak a awm ṭhin.

Sorkar hna pangngai lak danah chuan lak an nihna tura sorkarin advertisement a chhuah a ngai a, chutah chuan an hna thawktu tur chu thiamna tehfung, (B.A/M.A/a hna azirin chutiang khatiang thiamna nei tih te) a awm vek tur a ni a. Chutiang tehfung awm lo, midang tana dil ve theihna tarlan (advertise) loh, a latu tura sorkarin a ruat fel tak (DPC emaw)-in diltu dang zing aṭanga dan dik taka a thlan chhuahna awm hauh lova sorkar hna thawka inngaih ve mai hi thil buaithlak tak a ni. Hnathawk tura lakna (appointment) lehkha fel leh dan ang taka siam awm hauh lova thawk ve ringawt chu sorkar hnathawk tak tak an ni lo va, ban theih loh an nihna pawh a awm hek lo. Chu chauh ni lovin an thawh ṭantirh laiin lak theih tur khawpa kum tling leh upa lutuk lo an nih te pawh a ngai a, hnathawk tura thiamna ngai (qualification) an neih loh pawhin an thawh chhungin chutiang thiamna chu an neih chhunzawm a ngai a, chu thiamna ngai chu an neih chuan thil dang zawng a fel si chuan chuta ṭang chauh chuan dah ngheh dawn pawhin an ‘service’ chu chhiar ṭan tur a ni.

Mi tam tak chuan Minister te leh sorkar hi a lal em avangin an duh duh hi an duhna hmun hmunah an dah thei emaw an ti mai ṭhin a. Chutianga dan dik lova lakte chu an tam tham viau chuan sorkar chu inthlan dawna vauna hmang emaw, inthlan dawn kher lova an tam chhuanga sorkar nawr maite thil awm thei a ni. Mahse an duhdan ang chuan sorkar chu kal ta se Mizoram hi kan buai zual tulh tulh ang. Dan zawm lo leh dan pawisa loten tam chhuanga thil tih theih a nih an rin viau tawh chuan kan Mizoram hi ram hnawk tak leh mumal lo a ni ngei ang.

Centrally Sonponsored Scheme tam tak hi a scheme tawp ruala a thawktute pawh tawp mai tur (co-terminus) an ni a. Dan dik lova lak mi tam tak dah ngheh burh mai chu Mizoram tan thil pawi tak leh sulhnu (precedence) ṭha lo tak hnutchhiahna a ni bawk ang. Chuvangin kan sorkar hi dan dik takin kal se, chu dan dik chu an kenkawh chuan a hnu zela mite tan thaw tivengtu a ni ang a, chuti lova duap a kaih a, dan dik tak lova thil an tih chuan a hnu zela buaina hringtu a ni thei bawk ang.

Mizoram sorkar hnaah hian thil fel lo eng emaw hi a awm leh zauh ṭhin a. Chu chuan a hnu zelah thil pawi tak tak a thlen a. Tarlang vek dawn ila mimal hmingte lam a ngaiin sorkarna chelhtute pawh sawi zel an ngai ang a, a nuam lem lo. Kei aia sorkar hna kalhmang hre zawk daih tam tak hi ṭhuthmunah an rúm lungawi a, ngaihtuah duh lohvahte an tlak mai ṭhin. Mahse hetianga kal hi kan ram tan a ṭha ber lo.

Sorkar hian tute emaw a duhsak dawn pawhin uchuak lovin, hlauhna avang ni lo (without fear) vin, dan bawhchhe lo thei ang berin thil ti se a duhawm ngawt mai. ‘Kan thawk rei tawh,’ ‘Kan tam a; kan hel chuan an buai ve khawp ang,’ tih velte hi chu sorkar hian tehfungah a hman loh hram ka beisei. A chhan pawh eng anga tam pawh inhawr khawm mah se tu emaw, dan dik taka tling ngei tura inring, chumi atana kum eng emaw zat lo inbuatsaih tawhin engtikah emaw, ‘Heng mite avang hian kei hi sorkarah ka lut ve thei lo va. Anni dan dik lova lut, dan dik lova sorkarin a nemngheh an ni,’ tiin Court-ah thil dik lo chu kalpui ta se, Court chuan rorelna dik a ken phawt chuan eng anga thawk rei tawh leh tam pawh a ban leh phiar ang a, sorkar chu a buai fe mai dawn a ni.

Thiamna inang, mark hmuh zat inang rau rauvah eng emaw chen lo thawk tawh chu sorkarin duhsakna a lantir a nih chuan tu mahin an sawi buai lo vang. Mahse dan dik lova lut, thiamna ngai (required qualification) nei si lo, an thawh rei vang leh chutiang mi chu an tam avang ringawta sorkarin a dah ngheh mai chuan sorkar chu ‘without fear’-a hnathawk lo leh hleih nei bik a ni ngei ang.