OFFICER

Sorkar hnathawktu zingah a lal chin deuh hi Officer kan ti ṭhin a. Chumi avang chuan ‘Officer’ han tih chu kan duh hle mai a. Duh awm tak pawh a ni reng a ni. Block Development Officer, Circle Education Officer, Project Officer leh a dang te a tam ang.

Officer te chu an hlawh bi a sang bik a, Gazetted Officer chu sorkarin Officer puitlinga a pawm chin tihna a ni deuh ber ang chu maw. Officer rau rau zingah Gazetted lo chu tlemte an awm chauh awm e. Kan kohhran pawhin a ngaisang hle ni a a rin theih nachhan chu Synod hnuaiah hian Officer Meeting an nei hranpa bik a. Chu mite thukhawm thuchhuak chu OM thuchhuak (Officer Meeting thuchhuak) an ti a. Anmahni huang chhungah chuan a lar phian.

Sorkar Officer zingah an Designation a Officer tih tel lo, lal tak tak an awm a. Officer tih tel hi chu a lal lo chin deuh tihna a ni zawk mah hial ang. Sorkar hnathawk zinga a lal ber chu Chief Secretary a ni a. A hnuaiah Secretary an intlar thla diah diah a. Secretariat a Secretary hnuaihnung ber chu Under Secretary an ti a. Sorkar thuchhuak hi Under Secretary hminga chhuah a tam ber.

Officer tam tak chu an hmingah Officer tih awm mahse Gazetted an nih loh avangin pindan hrang te, anmahni a thuneihna te nei lem lo an ni a. Mawhphurhna bil, an huang chhungah pawh anmahni thua thu han vuak thlak theihna tur an nei lem lova, an hmingah Officer tih kha a bet ve mai angin a ngaih theih.

Eng pawh ni se, sorkar Officer te hi an hlawh chin aṭanga Officer nihna te bithliah a ni tlangpui a. Officer leh Officer han tling pha lo te chu kawng hrang hrangah an danglam ti ila a sual lovang.

Sorkar Officer te hi sorkar a mawhphurtu lian tak an ni tlangpui a. Kan sorkar Officer te hawiher leh invawn dan te, awmdan te a awm a. Chu chu ‘Officer Quality’ ti pawhin a sawi theih awm e. Kan sorkar Officer te quality a zirin anmahni hna bil zela thawh tur kha thawhin a awm tlangpui. BDO fel hnuaiah chuan hmasawnna hna a chak a, BDO fel lo hnuaiah chuan hmasawnna hna a thuanawp vek ti ila a sual lovang. Chutiang bawkin Engineering Deptt. lamah E.E leh SDO fel hnuaiah chuan hna a fel a, hmasawnna hmel a lang thin. Hetianga bial bik neia hnathawktu Field Officer te hi a kip a kawiin thunun hleih theih an ni tawh lova. A thuin pawisa pek an ni a, anni’n a taka pawisa chu an hman tak avangin an hman dan chu hriatpui vek theih a ni tawh lo. A khat tawka endik leh venpui hram hram bak chu tih theih a vâng phian.

Officer tam tak (a bikin Field Officer) te hi thenkhat chu an fel hle a. Fel pawh a awl phian. A chhan pawh mawhphurtu ber dinhmuna han din takah chuan mihring hi fel a lo awl hle a. Mahni kova thil zawng zawng a tlak takah chuan fel taka tih tum hi mihring kalphung lian tak a ni. Chutihlai chuan Officer ṭhenkhat chu quality nei lo, ho te nena zu in tel tel tawk leh zahawm lo taka awm chi an awm ve zauh zauhva. Ṭhenkhat lah incheina aṭanga kawng kaldan thlenga ‘quality’ nei lo an awm ve bawk.

Officer tam tak tlakchham ni a ka rin chu hriatna tlem lutuk hi a ni mai awmin ka ring. Officer ṭhenkhat chuan an hnuaia mite hrem dan hi an hriat ka ring lo. Engkim hi dan lo anga chinfel vek tum a, chuta an hlawhchham chuan, ‘A buaithlak em mai, min sawnsak rawh u,’ ti ngawt mai an niin ka hmu a. Peon pawh, Clerk pawh, an hnuaia Field Staff pawh hrem thiam lo an awm niin a lang a. Heng mite hian mipui pawi an sawi a. Hnathawk tura chhawr theih loh mihring, an hrem thiam si loh te chu a chang leh an maimitchhinsan a, thawk ṭha duh tam tak karah hnathawk tha duh hauh lo, tihngaihna an hriat bawk si loh an kawl a. Chumi te avang chuan hnathawk tha duhte rilru a na a, ṭhenkhatin an thik a, an inthik kual zel a, Sorkar Office hnathawk hlei thei lo kan kawl nualin a lang.

An motor-ah te, an kawngka lu chungah te an Designation tar chu an thatho hle a, mahse an enkawlna hnuaia Staff awm tlem te, an chunga thu an neihna turah chuan thu nei thei tlat lovin an inhria a. A awlsam zawnga chung mite chu hotuten dah sawn a, anmahni hnenah chuan chutiang aia tha Staff neihdan chu an zawng ringawt a. Chutiang hnathawktu fel lo chu vawithum vel an sawn kual a, an lo tawng ve theih viau si chuan Officer hnathiam vak lo leh dawihzep deuh tam tak chuan ‘Chumi te, chumi te pawh chuan tihngaihna an hre tawh lova, a hremtu bik nih chu....’ an ti leh tlat tawh a.

Tumah hrem ngam lo Officer chuan a hnuaia mite pawh an ACR an ziah hunah “Outstanding” te chu pek dan an hre leh lova. A sual leh a tha lo ber leh a fel ber chawpin, “Very Good” an hmu leh zung zung hlawm a. Hetiang inthlah chhawng kan nih avang hian kan sorkar hna hian hma a sawn thei lo ni te pawhin a lang. Hrem thiam lo, lawmman pe thiam lo Officer te hi sorkarin a tihngaihna zawng sela. Department tinah hian a fel lo zual pathum thlan chhuah a, Special Training pek emaw, enthlak emaw te hi sorkar hian kalpui se a tha hialin a rinawm. Anmahni mimalin quality an neih loh pawhin dan anga an tihtur hi bithliahsak deuh an ngaiin a lang. Chu chu kan State tan hmasawnna a nih a beiseiawm.