THAWNTHU HLUI CHANG TA TE

Mizorama thlawhna kan hmelhriat ṭantirh lai kha chuan Mizoram aṭanga thlawhnaa chuang tur chuan Aizawlah thlawhna ticket pe chhuak thei pakhat chauh an awm a, chuta ṭanga thlawhna ticket kan lak chuan thlawhna chuan ṭumin Silchar-ah kan chhuk vang vang a, Silchar Airport-ah kan va kal a, mahni motor nei ve lo tan chuan a hma nia Silchar thlen a ngai ṭhin. Chutah thil a lo awlsam hret a, Vayudoot kha Tuirial Airfield-ah a rawn ṭumin a thlawk chhuak thei ve ta a. Mahse a thlawhna kha a té em mai a, ticket chan kha a har viau. Mahse zin thei leh zin duh kha kan tlem ve lehzel a, a tih ve nawk nawk theih a. A manganthlak lai tak chu an cancel zing lutuk kha a ni. Thlawhna ticket kan neih avangin a thlamuanthlak chuang reng reng lo. An duh hun hunah khan an cancel ni maiin a lang. Vayudoot ticket neih ai chuan Silchar Airport a risk kha a innghahna ngam zawk mah. Silchar Airport a pa te tak té, kal bai seih seih te kha kan hmelhriat viau a nih ngai kha.

Rela chuang tur chuan Silchar emaw, Guwahati emaw pan a ngai a. Silchar aṭanga rel chuan kha tih fuh a har angreng a. Tun hnua ka teh tak ber chu feh haw phurhna motor, khualzin turin lo chân ve ang deuh hi a ni a. Silchar leh Guwahati inkar rela han chuan kha chuan tihfuh loh ṭum chuan manganthlak angreng tak a ni. Rel khan thlen hunbi a nei ve ta lo em maw ni tih hial tur a ni a. A mi chuangte lah kha an tlangnel em em a, keini chuang ve ngai lo chu kan ip chawih chawih reng mai. Guwahati aṭanga rel chhuak kan chuan vena ber kha chu Tinsukia Mail a ni a. Tribal concession leh student concession nen chuan Guwahati aṭanga Delhi thlen nan khan Rs. 35/- a ngaiin ka hria. Ni hnih leh zan khat nge, nikhat leh zan hnih kan chuan ṭhin tak ka hre lo. Ka hriat chian viau chu kan chuanna kha a changkang lo ṭhin bawk a, Delhi kan thlen hi chuan a chang chuan samte hi a pheng ban tlat mai a, inbual a manhla ṭhin khawp mai. Guwahati aṭangin kan han chhuak a, New Bongaigaon-ah rel thlak a’n ngai a. Guwahati aṭanga kan chhuah dawna ṭhutna kan inchuh nasat tawh tehlul nen New Bongaigaon-a Delhi pan tur tak tak rela kan han invawm lut tur kha chu kan hmanhmawh tlang bawk a, kan phili nasa thei ngawt mai. Delhi aṭanga lo haw lam lahin New Bongaigon-ah bawk rel inthlak a ngai a, chuta kan han inchuh ṭhin tak tak chu puitham tak a ni ziah.

Tunah chuan kan thawnthu hlui chu a lo ral ta. Sairang aṭanga Delhi pan tur rela kan han chuang thei ta maite hi chu mumang ang a ni. A thlalak lama kan hmuh ang deuhte hi a nih phei chuan tun hmaa kan chuanna rel leh vawiina kan rel hmelhriat tharte hi chu, khawpui nula lehkhathiam leh thingtlang nula hmelṭha vak lo pawl ang velin an inthlau ta a. Kha leh chen rela lo zin lo zin ve tawh ṭhin keini ang tan pawh chhungkuaa rel chuan duh vang ringawta Guwahati-ah te zuk kal a, Delhi thlengte pawha chhungkuaa han chuanho a chakawm. Chhungkaw tam tak hi chu relah chuangho ila, phone khawih awih loh ti ila, kan chhungkaw dinhmunin a ṭhat phah hawkin a rinawm.

Tun hma lama thil awm dan sawi hi ṭhangthar tam tak tan chuan ninawm a ni. Mahse a ninawm titute hi tun hma thil hriat mamawh mawh an ni ang tih pawh a rinawm. Tun hma kan nunah kha chuan hriat loh hlanin ‘struggle’ (beih hramna) hi a inbilh tel tlat a. Chu chu mihring din chhuahna bul a ni. Tunah chuan ‘Ka phone a, a la thei lo va,’ ti ringawta kan committee meeting-a lo tel tur mi pawimawh tak hrilh hriat tak loh maite hi nunphung a ni zo ta a. In thum dan leka awm pawh kan phone chhuah theih loh chuan thil pawimawh tak nia ngaih pawh kan inhriattir thei lo ngam ta zel mai. Keini, tun hmaa committee kohna lehkha, veng chhung pumpuia mi sawmli vel hnena a sema sem chhuak ngat ngat ṭhin tan chuan a mak duh angreng.

Tun hmaa kan zin dawn kha chuan chuan man kan nei em? Kan kalna tur senso dang kan nei em? tih te leh thil dang tam tak kan ngaihtuah ngat ngat a. A ṭul em avang leh tihdan dang kan hriat loh avangin huphurh chung chung leh arkhawthimdai chungin kan kal a. Kan kal tumnaa min hruai thlengtu tur thlawhna leh rel pan nana kan tha sen ngawt pawh a buaithlak chang a awm ṭhin a. Mahse tunah chuan thlawhna leh rel chu kan kawtkaiah a rawn inhung a ni ta ber mai a. Kan nuamsain kan awlsam phah ta mang e.

Mahse, kan awlsam phahna zawng zawng leh kan nawmsakna avanga kan hun hlep hi eng atan nge kan hman dawn? tih hi englai pawha zawhna pawimawh leh zawhna nung reng a ni ang. Sairanga rel a rawn awm tak avanga kan hun hlep te, Lengpui aṭanga awlsam taka Kolkata kan thlen theih avanga kan hun neih belhte hi phone-a game khelhna atana kan hman zawh a, nawmsakna satliah atan kan hman chuan kan awlsamna hi kan ṭangkaipui tawk lo hle dawn a. Kan ṭangkaipui lo mai ni lovin dawngdahna min thlentu a nih phei chuan kan chhiatpui thei. A chhan pawh he inelna khawvelah hian hnam dang, keini anga hun awl neih khawhral mai mai lo an lo lut a, an rawn luh belh zel dawn a. Dawngdah theia inngai, khawvel changkannain awlsamna a hlui Zofate hi nikhaw reiah chuan a chan chhe zawkah kan ṭang zelin a rinawm. Tunah pawh tualchhung inelna bak kan pel hlei thei ta meuh lo a nih hi.

Thu danga lai chuan kan rel lo lut thar hi kan state chhunga kan thlai thar tam tak phurh chhuah nan kan hmang ang tih ka beisei a. Relin a rawn phurh luh ve tura ka lo duh ve fo ṭhin chu lung ṭha, lung chang, kan rama awm ve lo, kawng siamna tur hi a ni. State dang aṭanga kan lung phurh luh hmang hian kan inkalpawhna kawng hi lo siam ṭha ve ila. Kan kawng chhiat hma chhan atana lung chang ṭha tawk kan neih loh thu kan sawi fo hi a bo va, kan kawngin a ṭhat phah hlauh chuan a tihzia dawn em asin. Lung manah kan inseng tam deuh a nih pawhin a tihdan dangah inrenchemna kan zawn theih chuan kan hlawk zawk ngeiin ka ring.