TUI HLUTZIA

Mihring nunna atana thil pawimawh berte zinga mi chu tui a ni. Tui tel lo chuan a rei berah ni nga bak kan dam thei lo va, chaw ei lo chuan ni sawmhnih chuang lai kan dam thei. Kan nunna atan leh kan khawsak nana kan kuta awm, kan leklam ber leh kan hman nasat ber chu tui a ni. Tui ṭangkaizia leh hlutzia chu tui awm lohna hmun, thlalera chengten keini aiin an hrechiang lehzual. Kan mamawh ber leh a tel lova kan awm theih hauh loh, boruak te, tuite leh khawvel êntu ni êng thleng pawha a hlutna leh a ropuizia ngaihtuah ngai lo hian mi ṭhenkhat chuan an dam lai ni an chhiar zo thei ang a, ngaihtuah ngai lo eng ang mah se an tan tui hlutna chu a hniam chuang lo vang. Pathianin a thlawna min pek thil ropui ngaihtuah hlek lo hian motor nalh te, in nalh te, thuamhnaw nalhte hi thil pawimawh ber emaw tih mai awl tak a ni thei — mahni zung leh zam nu leh pate hlutna leh zahawmna ngaihtuah lo mihringte pawh kan awm nual si a. Kan taksa a bàl a, silfai nan tui kan han hmang a, kan thuamhnaw a bàl a, tihfai nan tui kan hmang a, hei ringawt pawh hi ngaihtuah chian chuan mak tak leh ropui tak a ni. Ngaihtuah lem lo tan chuan a tur ve renga ngaiin tui tel lova khawsa thei chuang miah si lo hian, tui hlutna hi hriat loh theih ve tho a ni. Changkan dan azir zelin tui hman ṭangkaina pawh a tam a, a changkang lo pawhin keimahni tawkah tui kan hmang tṭangkai ve tho. Kut silfai nan leh thil dang tihfai nan leh thlai chawmna bakah te, nuamsipa chen nante kan hman bakah tui hmang thiam chuan kawlphetha siam chhuah nan thlengin an hmang.

Hnam changkan leh changkan loh tehna pawimawh tak chu tui enkawl dan hi ni ve ngei tur a ni. Tui hnianghnar lohna hmunah changkanna tak tak a awm thei lo. Tun hnaiah Kolkata leh Delhi-ah te ka zu kal ve leh a, mihring leh chenna in tamzia chu sawi loha leng a ni. Veng khatah khuan kan Aizawl khawpui mihring hi khung len vek theih a ni nawk hlawm a. Chutiang veng tam tak awmnaah chuan in tin khuan tui an herh haw thei vek a. Chutiang tur chuan phaizawlah an sorkarin ruahmanna a siam a, fel takin an awm a, an awm mai a ni lo, hnianghnar takin an awm a ni. Kolkatta-a kan thlenna, Salt Lake bial chhunga Muanna Run-ah khuan ni tin tui vawi thum a lo haw a. An ṭhenawmte pawh chutiang chu an ni ve ngei ang. Muanna Rûn bik ngaih pawimawh vanga ni tin tui vawi thum dawng an ni awzawng lo. An sorkar rorelna fel vang a ni ngei ang. Kolkatta phaizawl cham duai maiah khuan engtin nge chu chu sorkarin a tih theih tih ngaihtuah tham a ni. Chutiang bawkin Delhi lamah Kishan Garh venga Nuseni Homestay-ah ka thleng leh a, in chhawng nganaah kan awm a, kan awmnaah chuan pindan paruk a awm a, chu'ng zawng zawngah chuan mikhualten hnianghnar takin tui kan hmang vek a. Keini ang bawkin a hnuai lama awmte pawhin an hmang a, an ṭhenawmte pawhin an hmang. Piah deuhva kan thlenna aia lian fe in chhawng sawmhnih lai awmnaahte pawh hnianghnar takin tui an hmang a. Chu'ng chu an sorkarin a ti thei a ni.

Keini Aizawl erawh phaizawl a ni ve lo va, kawng chhak lama awm lo zawng chu kawng thlangah deuh vek kan awmna hmunah hian kan chenna a hmun sang lai ber ber, Laipuitlang, Tuikhuahtlang leh Khatla tlangah te tuizem kan dah a. Chu'ng chu a hnuai lama awmte hnenah kan sem a, kan sem fuh hlei thei lo achha chu a ni. A chang pawl leh a chang lo pawl kan awm zeng zung a. Veng mawng lama tui kan pek theih loh laiin an in bul kawrah veng lu lam pekna aṭanga kawng hrang hranga tui bua a luang dur dur a. Chumi thlir reng chung chuan tui nei lovin kan awm tlawk tlawk a. Lungchhiatthlak duh angreng tak a ni. Chuti chung pawha lungchhiat nachang hre lo leh enghelh nachang hre lo deuh hlir kan chengkhawm ta mai em maw ni tih turin hman aṭangin hei hi kan awm dan a lo ni tawh a. Kan awm dan mak titu leh lungchhiatthlak titute hi mi tam tak chuan mak min ti letling hial tawh awm e.

Chaw chu chi hrang hrang a awm thei a, tui erawh chi hrang tehchiam a awm theih loh avangin tui thianghlim tawh phawt chu a hlu em em vek a, tui thianghlim kan hmanral zah zah hi tui bawlhhlawhah a chang ve leh mai bawk. Tui thianghlim neih theih leh neih theih loh hi mihring changkan tuma chengkhawm awmna hmunah chuan tehna pawimawh ber zinga mi a ni ngei ang. Tui thianghlim hman tur tam tawk a awm phawt chuan kan tih theih loh anga lang tam tak hi a tih theih. Mizorama buh leh bala kan intodelh loh nachhan lian ber pakhat chu kan buh leh bal chinna hmuna tui duh tawk kan nei thei lo ṭhin hi a ni. Tui a awm theih chuan kum khatah buh vawi hnih a thar theih a, duh hun hunah thlai a chin theih avangin kum tluana thlai a intodelh dan a awm. Kan kawmthlang leh in bul vela iskut rahtir reng thei tur chuan tui chhe luannain a chiah hnawn phakah a bul awmtir mai a tawk. Heta ṭang ringawt pawh hian tui hrim hrim pawh ṭangkaipui theih a nihzia a lang.

Aizawl khawpui hi a fai tawk lo a nih chuan a chhan pakhat zinga mi chu tui kan hnianghnar tawk lo hi hmun tam takah a ni ve ngei ang. Aizawl khawpui hi a nawm dawn chuan tui hnianghnar kan nei phawt tur a ni. Tui hnianghnar nei tur chuan kan neih chhun ang ang hi kan enkawl fel a ngai ngeiin a lang. Sorkar hausa leh sorkar changtlung nei ila, eng zata tam a luan riral hnu pawh a khua leh tuiten tui duhtawk kan la nei thei a nih hlauh chuan, kan tui pump chhuahsa luang riral ui ngawih ngawih hi a phunchiarthlak angin a ngaih theih ang. Mahse chhungkaw tam takin tui kan nghei titih lai leh mut mawh hnar mawha neih a ṭul lai chuan, kan tui neihsa enkawl ṭhat chungchang hi thu pawimawh leh thu tling a ni reng thung ang.

Aizawl khawpuia kan tui neih, sorkarin min pek ṭhin hi tui dang tam tak aiin a hlu. Chho hlir kilometre eng emaw zat a harsa tak leh tlin fumfe lo chunga kan siak chhoh a ni a. Tui siak chhuah nana kan sum sen hi a tam tham avangin kan siak chhuah chhun hi chu a hlutzia hriaa uluk taka kan enkawl a ngai. Kan duh loh dana englai pawha luangral lo thei lova kan awmtir ringawt chuan pa remhre lo leh pa tal tlaran tak awm dan ni awm tak a ni. Kan tui hman tam dan azira pawisa chawi kan ni ṭheuh va, kan mamawh tawk leh kan duhkhawp pawh min leitir theih loh laia englai pawha a luang ral reng ringawt mai hi chu, nau vei taka kan vei a ṭul takzet a ni.