KRISMAS

Theihtawpa a par mawi lai taka he khawvela lan ve hram hram tum ni awm takin pholeng leh bawn pik kar aṭangin nipui par, thlasik laia par ṭhin a rawn dak chhuak sen vêt vêt a, thlasik zing ni chhuak thlarah a aia mawi leh hmuhnawm a awm tawh lo vang tih hial tur a ni. Thlasik boruaka nipui par a par hlerh hlerh tawh chuan rilruin khaw dang a hawi thei lo va, lungleng mi tan chuan lunglen a kaitho va, khawhar mi tan khawharna a kai chhuak a, a zauthau mi tan pawh zauthauna tham a ni. Tun hma zawnga Krismas lo thlen dawn apianga par ṭhin, tlangsam a lo par a, hmun tam takah chuan chu chu chhinchhiahna lawmawm berte zinga mi a ni.

Krismas hian lungngaihnate pawh min thlen ṭhin. Ṭhenkhatin a sahawk zawng ngawta thil an ngaihtuah laiin tam tak tan chuan chhungkaw kim lai ngaihtuaha lunglenna leh khawharna hun a ni. Mi dang zawng zawngin intih hlimna an ngaihtuah laiin mi tam tak chu lungleng khawharin an awm a. Kawppui liam ta emaw, fanu fapa liam ta emaw, nu leh pa kal tawh emaw ngaia khawharna hun a ni. Heng mite tan hi chuan Krismas te hi thleng lem lo se tih pawh ngaihtuah awl tak tur a ni.

Kum tinin Krismas a lo thleng ṭhin a, mahse a lo thlen apiangin ṭhenkhat tan chuan a hmaa mite aiin a hlu ziah emaw tih tur a ni a, chutih laiin ṭhenkhat tan thung chuan a hma a ang pha tawh lo vek thung. Keimahnia a thawh dan a dang zel a, tam tak tan chuan Krismas kan hriat hmasak apiang kha a hlu thung. Krismas hlutna em em pakhat chu rethei leh chhumchhia apiang tan a ropui bik niin ka hre ṭhin. Mahni tawka duh duh eia in thei leh eizawnna kawnga buai ve ngai hauh lo te tan chuan Krismas chu hunpui pakhat lo thleng ve leh ta mai a ni a. Mahse chutiang chu mi zawng zawng tan a ni vek lo.

Thlarau lam ngaihtuaha lungleng veng veng te, lawm thar ta riaute an awm a. Thlarau ruai nena Krismas lawm ngei tum tan phei chuan Krismas hi a hlu lehzual. Heng mite hi Krismas chungchangah chuan a vannei leh a nihlawh ber ber an ni awm e. Heng mite tan hi chuan khawvel thila inbuatsaihna leh hlimhlawp reng reng chu hlimna belhchhahna ang vek a ni tawh a, an tan a lawmawm bik a ni.

Thlarau leh Krismas awm chhante ngaihtuah hauh lova nawmsip bawlna hun anga ngai tam tak kan awm a. Ni danga rilru zalen taka kan tih theih loh leh kan tih ngam loh nawmsip bawlna atana hman tum nasa apiang an hlawhchhamin, sulhnu chhia an ngah zual ṭhinin a lang. Mahse chu'ng mite zawng zawng chu vanduaina leh chhiatnain a bawh kher chuang lo va, chhungkaw inhmuh khawmna leh chhungkaw inkoh khawmna remchanga hmangte pawh a vannei pawlah an ṭang ang.

Krismas lawm intih avanga nawmsak uchuak tum vanga kulcho phah nana hmang ta hlauh te, kumkhaw chawr loh phah nana hmang tate leh chhiatpui hlen ta hlauh pawh awm theih a ni. Krismas a nih tak avanga halpuah hal tum tlat ṭhahnem tak kan awm a. Heng mite hi chu halpuahah hian an lung a leng tlat a, an sum leh pai pawh halpuah lei nan chuan an ui thei lo. Chu'ng mite tan chuan halpuah hal ber mai hi Krismas lawm dan an hriat chhun chu a ni kan ti thei ang. Halpuah leh kan Lal Isua hian inlaichinna a neih hre hauh lo chung pawhin kan phurpui viau mai.

Mi ṭhenkhat, Krismas a lo thlen tika mi dangte tana malsawmna nih tum tam tak an awm a. Chu'ng mite chuan an lei robawm chu mi dangte tan an hawng a, chumi rualin an thinlung pawh an hawng bawk. Thlarau awmna nia kan hriat deuh ber, zaikhawmna lamah leh biak-Inah te kal ve se su lo mah se, an thinlungah mi dangte tana inhawn a lang a. Krismas nikhuaa mi dangte an ṭanpui theih chuan chu chu an lawmna a ni a, khawvel thil taka nawmsip bawlna lama tlan ṭhinte leh thlarau chenchilha Krismas hman tumte inkarah hlim takin an awm ve thei niin a lang.

Kohhrana inhmang tam tak chu Krismas hma aṭangin an buai em em a, heng mite tan hian Krismas hi eng ang tak nge a nih ngaihtuah thiam a harsa. Hun dang zawng aiin an hmanhlel a, tihtur hlirin Krismas lai hian a hmuak a, tih awm tak tak leh tihtur hlira khat kara hmanhlelin Krismas an hmang ṭhin a. Tam tak phei chuan a lunglenthlakna lam te, a thlarau lam thil te, a nawmna lamte engmah an ngaihtuah hman lo. Kohhran huang chhunga tihtur leh hmabak hlirin hun an hmang zo va. Dem theih an ni lo va, lawmpui viau tur pawh an awm chuang lo. Krismas lai hian kohhran tinin hun awm thei zawng zawng chu lak zawh vek an tum ni hialte pawhin a ngaih theih. Kohhran program a tam poh leh Krismas chu an hmang ṭha ni maiin an ngai.

Eng pawh ni se, Krismas hi hun hlu tak leh kum tluana kan thlir a ni a. Ngaihnep tum mah ila a theih loh va, kan hunbi chhiarna pui ber pakhat, nghakhlel lo pawh ni ila kan thinlunga bet tlat kan hunpui nghah a ni a. Hlim tak leh lawm taka he hun hman hi kan induhsakna ṭheuh a ni.