PU B-A LAWMPUI NAN

Pu B.Lalthangliana hnenah Mizo Award hlan a ni a. Ka va lawmpui tehreng em!

Kum 1974 khan Pachhunga College-ah PU kan zir laiin ṭum khat chu ‘Pu B.Lalthanglianan thu a sawi dawn,’ an ti a. A thusawi kan ngaithla a. Khami ṭum khan eng chiah nge a sawi ka hre tawh lo va, a kum thleng pawh hian ka sawi dik lo thei. Ka hriat reng erawh chu History kha a sawi ngaihnawm a ni. Kei hi History hre lo deuh mai, ngaihsak lo angreng tak ka ni a. History hi ka ngaina ngai vak lo. Mahse Pu B-a khan Mizo History hi ngaihnawm takin College naupangte kha min hmelhriattir a, khatiang thusawi kha ka hriat vawi khatna a ni. Khata ṭang khan Pu B.Lalthangliana hi a zahawm ka ti a, History hi a nunpui tih ka hmu chho ve zel bawk a, a ngaihsanawm ka ti ṭhin a, History ngaihsan nachang ka hriat phah ve deuh va, ka tan chuan khami ṭuma a thusawi kha hlu tak a ni. Thil dang hi a ngaihtuah ve meuh lo va, Mizo History hi champion-pui a tum hrim hrim tih a lang bawk.

Mizo Award hrim hrim hi thil hlu leh ngaihsanawm tak a ni. Kan ṭawng tu’n lo haw lo se, Award dang anga tih nek neka vanneih chuan dawn mai chi niin vawiin thleng hi chuan a lang lo. Award dangte hi chu vanneih kumte a awm theiin a tihdan kawng hriat deuhte pawh a awm hial law maw a tih theih a, Central sorkar lama roreltu azirte pawhin Award te pawh a dawn fuh hlauh theih chang pawh a awm hialin a lang. Mizo Award erawh chutiang chu a ni ve lo. A thlangtute hian an bih hnaiin an bih fet a, kan Mizo zingah tu hi nge tu nge tih an hre em em a, ngun takin Mizo Award hlutna keng zui thei ngei tur an ngaihtuah a, an mi thlan chhuahte lam aṭang hian tha han thawh ve tehchiam hi a remchang lo. Chuvang chuan Mizo Award hrim hrim hi vawiin thleng chuan Mizorama kan hriat phak chinah chuan Award hlu ber a ni tih hial tlak a ni.

Pu B.Lalthangliana hian Mizo Award hi phu hlein ka hria a, Padma Shree te pawh phu em ema a lan laiin Padma Shree hi a dawng thei hauh lo mai a, a mak hle. Padma Shree hi dawng ta lo pawh ni se, Mizo Award ber a dawn tawh chuan a lungawithlak hle bawkin a lang. Mi Award dawn sawi hnawm tum vang ni hauh lovin, Padma Shree dawngtu ṭhenkhat hi chu Mizo Award dawng tur chuan kan suangtuah lem awm lo ve. Mizo Award dawngte erawh chu Padma Shree dawng awm tak vek an ni thungin a lang. Kan Hony. Doctorate degree nei ṭhenkhat pawh hi Mizo Award dawng tur chuan kan ngaihtuah lo hlein a rinawm. Heti zawnga han ngaihtuah hian Pu B.Lalthangliana'n Mizo Award a dawng hi a phu ka tih em avangin ka lawmpui a, Mizo Award hi a hlu lehzualin ka hria. Hun lo kal zelah Mizo Award hi hetiang tak hian hlu reng se a va duhawm em.

A hnathawh ṭhat leh Mizo tana a hlutnate chu sawi ve tehchiam lo mah ila, Pu B.Lalthangliana te nena Rokunga Memorial Society huang chhunga kan tualchai dan ṭhenkhat han sawi hlek ila. RMS din dawn khan Rokunga'n chawimawi a phuziate hi awm hmunah ka phunpui ve bal bal ṭhin a. Hun eng emaw chen hnuah chuan Pu B.Lalthangliana hian Rokunga Memorial Committee dinpuiah min rawn sawm ve hlauh mai a. Kan Chairman atan Pu Lalfak Zuala kan sawm a. Pu Faka kha Chief Secretary a nih lai a ni a, sorkar Official lian, Mizo pa tlawmngai leh inngaitlawm tak mai a nih avangin khatianga pawl hotupa tura han sawm khan a inthlahrung angreng viau mai a, Mizo pa tlawmngai tihdanin, ‘Keini te chu...’ a ti a. Mahse Vanneihtluanga te nen khan, ‘Ka pu, nang i Chairman loh chuan Pu B.Lalthangliana hi a chairman mai dawn a, ani ho nih chu kan duh si lo va, i ho nih kan duh tlat a ni,’ tiin amah Pu B-a awm reng chung chuan min sawm khawmtu deuh ber chu han hnuaichhiah der deuh pahin Pu Faka chu kan kar tlat a. Kan nuiho dar dar mai si a, Pu Faka pawh kha a ṭang reng thei ta bik lo va, tiam vak lo chungin a aw ve ta a. Min han ho khawm ta chu a lo thiam kher mai a, nuam tih leh phur kan fawmkem a ni ta ber mai. Chutah Pu Faka kha politics-ah te a’n tel ve a, ‘Ekhai, ka awm dan leh Rokunga Memorial Society chairman nih hi a inrem ta lo ve,’ a ti a. (Rokunga Memorial Committee kha remchang zawka kan hriat avangin Rokunga Memorial Society-ah kan let a) ‘A ni teh tak e. Chutia patlingin a rem ta bur love a tih chuan Chairman dang i zawng mai ang,’ kan ti a. Vice-Chairman Pu B.Lalthangliana chu Pu Faka te ina chaw kan ei zanin chaw ei hmain ‘Chairman poh mai rawh se,’ kan ti a. Mahse kan chaw dawh chhung vel chuan Chairman tur kan sawiho va, Pu Rualzakhuma IAS kha remchang kan ti leh zawk a. ‘Rokunga Memorial Society Chairman hi chu IAS post a ni,’ kan ti a. Chaw kan ei kham fel chuan Pu B.Lalthangliana, a tir té aṭanga Vice-Chairman ngar ngar chu a chairman nihna kan hlihsak leh a, amah Pu R.Lallianzuala ṭawngkam takin, ‘Chaw dawh chhung chiah a chairman,’ ta a. Kan boruak kha nuam angreng tak chu a ni. Kha'ng hunlai leh vawiin thleng hian Rokunga Memorial Society boruak chu nuam kan ti ṭhin.

Pu B-a Award lawmna chungchang thu sawi kan ni bawk a, kan Rokunga Memorial Society kalkhawmnaa Pu C.Laitanga (fam) tihdan kha ka’n sawi leh hram teh ang. Ṭum khat chu kan ṭhukhawm a, Pu Laia kha tlemin a lo thleng tlai deuh va, ‘Ngawi teh u, kei hi Hunthar veng, zel em deuhva awm kan ni a, nangni hian min hmusit riauvin ka hre mai,’ a’n ti ngawt a. A intuha lo lutuk a, vawiin thlengin ka nuih a la za. Pu Laia vek kha ṭum khat chu kan Committee meeting-naah khan a ding a, thil a sawi a, a thusawi karlakah khan, Pu B.Lalthangliana kha a’n kawk a, ‘Hei kan hnathawktupa hian...’ a’n tih pek a. Pu B-a taimakzia leh a seh tawh a seh nghehzia a hrilhfiah hlein ka hre ṭhin.

Tun hnu hian inbiakpawhnate a lo ṭha chho ta a, mi dang hi chu kan kuai zeuh zeuh a kan inbe mai zel a. Pu B-a hian kan tun lai phone hi a hmang ve tlat pek lo va. A hman thiam tawk chu tun hma, mobile chhuah hmaa kan hman ṭhin, ‘Landline’ chauh kha a ni a. A Award lawmpui tur pawh hian an in, Chhinga Venga mi-ah va kal nal nal a, ṭhutna pindan a, ‘E, ka lawmpui hle mai che. Khaw nge i thil dawn chu han phawrh teh,’ tih a ngai a. Chutianga va tih chu tlin ka inti vak lo va, kan RMS ṭhiante, Vanneihtluanga, C.Vanlallawma, Lalhruaitluanga Ralte, Rochamliana, Pu Lalfak Zuala leh R.L.Thanmawia te zingah kei ang bawka kal thei remchang lo an awm pawhin heng hi kan lawmpuina ni teh se.