HMUHNAWM

Mihringin kan duh ber pakhat chu hmuhnawm a ni. Ni tur pawh a ni reng a. Duhzawng zawng reng renga damchhung hun hmang mihring tan hmuhnawm tih zawng ngainat leh duh hi pianphung pangngai a ni. Nula pian nalh leh hmelṭha hi chu Pathian thil siam zingah a hmuhnawm rei pawl tak an ni a. An hmuhnawm kumkhua dawn te pawh a ni ang e.

Tunhma, kan ṭhat ve lai deuh kha chuan Musical Concert ropui deuh kha ka thil en chak ber te zing ami a ni a. Ka rilruah pawh sapram kal ve a, eng Rock Band ropui deuh emaw concert en kha a lian pawl tak a ni ṭhin a. Mahse kum 50 ka tlin hnua ka zu kal ve theih tak hram kha chuan ka ngaihven peih ta hauh lo. Chuti chungin TV lamah chuan ka la en zauh zauh peih. Ka hmuhnawm tih zawng a lo dang ta hle mai.

Hmuhnawm ka tih bawk, ngaihnawm ka tih bawk tak viau pakhat chu fiamthu thawh hi a ni ta. Fiamthu lamah hian ṭhahnem ka ngai ṭhin a. Tunhma aṭangin kan kalkhawmnaa thusawi leh solo inthlak reng mai leh a hnu lama zaipawl zaia kan han chawhpawlh ta hi ka duhtawk lo deuh ṭhin a. Mahse kalkhawmnaa thiltih tur hi a lo vang duh viau a lo ni. Solo leh zaipawl lam hi chu kan indaih ta deuhva, ṭhahnemngaih a ngai tehchiam pawhin ka hre ta lo. Mahse fiamthu hi kalkhawmna zawng zawnga thawh vek pawh a lo rem teh chiah pawhin ka hre chuang lo. Mahse hnam anga fiamthu thiam nei ṭha nih hi chu ka thil thlakhlelh pawl a la ni reng a. Kan nei ṭha ve tawh viau pawhin ka hria.

Tunhnu hian Youtube te a lo chhuak a, a ṭangkaiin a en pawh kan en nasa a. A en nasa pawl te pawh ka ni ve hial awm mang e ka ti rum rum. Youtube-ah hian hmuhnawm en tur engkim mai a awm tih hial tlak deuhthaw a ni. Inzirna tur tam tak a awm a, tuboh fawng vuah dan thlengin en tur a awm a, chu chauh ni lovin kan thil hmuh fo ṭhin thil zawng zawng deuhthaw hi a bul leh an tihdan en theih a ni te hi a vanneihthlak ngawt mai. Sangha tin siamdan te, bakcheh an siam dan te, sangha man dan te leh thil chi hrang hrang an siam chhuah dan te hmuh tur a awm a. An thil siam chhuah zinga tam tak ka en hi chuan a ṭhen hi chu an boruak chhe tihchhuah avangin ka awt hlei thei lova. A ṭhen hi chu kan thiam ve theih loh tur a nih vang lam ni lovin kan hnathawh dan kalhmang leh kan nunphungin a phak loh vang zawk a kan tih ve theih loh tur niin ka hria. Factory tak tak din tur chuan kan inkhawm culture te hi tihdanglam emaw, kan ngaihdan kan thlak emaw a nih lohva, kan mitthi ngaihdan leh eng ilo hi kan thlak a nih loh chuan factory din hlei thei lo kan ni hial te pawhin ka hre ṭhin.

Tun hnaia ennawm ka tih leh ka ngaihsan tak riau chu LPS Kut Hnathawk Huang te, Lalhruaitluanga Channel te, Pu Vana Channel te hi a ni ta. Hetianga kut hnathawh lam leh eizawnna te leh thil awmdan zir chianna te hi a hmuhnawmin a hlu ka ti ta hle mai.

Kan kut hnathawktu tam takin kan Mizoram leilung hmang ṭangkai a, an thawhrim rah kan han hmuh te hi kan ram tihlutu leh kan innghahna a ni ta hian ka hria a. Kan ram leilung aṭanga chhuak thei leh thlai te, thing leh mau te a tam poh leh he rama chengte hian zahawmna kan neih belh ang a, kan nun a nuamin mahni inrin tawkna thlengin kan nei dawn ni tein ka hria a. A lawmawmin min tithlamuang ṭhin.

Sawhthing te hi a hlu viau nain kum khat thil a ni a. Kum tin a bul aṭanga ṭan leh zel ngai, a hma kuma kan thawh ṭhat rin hleih theih loh thil a ni a. Kum khat hlawkna atan erawh a thar rang a, sorkar nena kan ṭan kawp chhung te phei chuan mi tam tak tan thil hlu tak a ni. Mahse thei te leh thildang ṭhenkhat hi chu a kum hmasa lama kan thawh a rin theih a, chu chauh ni lovin nakkum lamah pawh kan la ring chhunzawm zel thei a. Tam tak phei chu ṭhangkhat lian eizawnna daih te pawh a ni thei. Chung zingah chuan kuhva te, serthlum te leh thei dang te pawh a tel. Heng lama thawktute thawh chhuah hmel te, an hlawhtlinna te leh thawhrimnain awmzia a neih dan te min entirtu kan Youtuber te hi an hlu ka ti a. Mi tam tak an fuih phurin an chhawm kal ngei ang tih ka ring a. Hmuhnawm dang aiin an hlu lehzual bikin ka hre ṭhin.

Heng kan Youtuber te aṭang hian Mizoram hmun hrang hrangah kut hnathawktu engemawzatin thil tam tak an lo thar ve ta a. Chu chuan kan pawisa che vel a tipungin kan hlawkpui tih a lang chiang a. A thawktute thawhrimna leh hlawhtlinna hmel te hmuh theih a min chhawpsaktu kan Youtuber te hi ka ngaihlu ngawt mai. Khawbel lamin Mizo hnathawh, ṭhalaiin hlim taka an thawk lai leh kan Mizo nunphung an han tarlang te pawh thil hmuhnawm zing ami a ni.

Lehkha kan chhiar chuan a ngaihnobei (Romance) aṭangin kan tan a, a tawpah Biography kan chhiar ṭhin an tih angrengin a tirah chuan zai te hi hmuhnawm kan tiin concert te kan hmu chak a. A tawpah chuan mi thawkrimte leh mi taimate huangah kan luh a ṭul ni te pawhin ka hre ṭhin. Kan Mizoramah mi taima leh thawkrim tam tak mai leh mi remhria te, mi tihdan baka hmangchang hre tak mai leh hlawhtlinna tura bei ṭauh ṭauhtu te beihdan leh hlawhtlin dan hi hmuhnawm tak a ni.

Kan kut hnathawktu thawkrim te, mi huaisen, kan leilung hmang ṭangkai a rei tak chhung hlawhtlin tuma chawl lova lo bei ṭauh ṭauhtu te leh heng mite hnathawh min pho chhuahsak a, Mizoram tana ṭangkai tuma beitu Youtuber te tan he thuziak hi ka hlan e.