CAB LEH KRISMAS

Kan khawlaiah lirthei a tawt zual mup mup a, mahni khaw lama Krismas hman tumin Aizawla hnathawhna avanga awm, thingtlang mi te an haw sung sung a, kan khawlai te chu kan chei de chhiai chhuai tawh a, thlasik ni chhuakin Krismas lam min hawitir lo thei lova. Chutih lai tak mai chuan Krismas boruak nena inpersan daih maiin CAB kan ti CAA kan ti, Krismas hla sa tur ni hauh lovin Aizawl laili-ah thalaite an pungkhawm a. Kan pi leh pute hlain, ‘Chalmar leh chalmar a dang mang e,’ a tih ang maiin boruak theuh theuh a inpersan ngawt mai. 

Krismas te kan lak nat a, a boruaka chen kan tum nasat tehreng nen India ram khawpui hrang hranga kan Mizo zirlai awm te chuan thu an chhuah sup sup a, kan aiawha kan thlan, Mizoram zawng zawng aiawhtu tura kan duh a kan thlan chhuah ber chuan CAB an tih mai, Citizenship Amendment Bill chu a’n thlawp ta mauh mai a. He Citizenship Amendment Bill hi eng dang ni lovin a Mizo tawng chuan, ‘Khua leh tui nih theihna dan thar ber’ tihna mai a ni. Amendment hi ‘siamthatna’ tihna chu ni teh­meuh mahse kan Mizo tawnga tun tum atana a kawh ber chu ‘dan thar’ tihna ang a ni mai. He dan tharah hian khawi state-ah pawh Hindu sakhaw betu chu a insuan luh chuan hun engemawti hnuah chuan a awmna hmunah khan khua leh tui nihna pek tur tihna mai a ni a. Mahse chu chuan thil tam tak a kawkin a hril leh thei a. Tu emaw chu Hindu sakhaw boa a nih miau chuan a pem luhna state khan a awm rei zawng azirin khua leh tui nihna a pe ngei ngei tur a ni tihna a ni mai. An dan siam tharah chuan he dan hian Mizoram te, Nagaland te leh ILP hmanga luh ngaihna State chu a huam ve lovang tih a ni leh ta zel bawk. 

Chuti a nih a hnu, a tha a ni mai ‘lawm, a tih theih puat mai a. Mahse Hindu nihna hmanga pem luh theihna dan hrim hrim chu India ramah a dik thei lovin mi tam takin an hria a. Dan hmaah hian sakhuana hmanga zalenna neih bik emaw, inkhuahkhirh bik emaw hi a fel lo tlangpui a. Sakhuana hmanga tuemaw duhsak emaw, duhsak loh bik emaw a nih tawh chuan thil a punlunin a fel lo zo ang tih a hlauhawm a ni. Chu chauh ni lovin Hindu sakhaw betu dah lal bikna dan chu Kristian chuan a do mai tur ni awm takin a lang thei a. Mipui tam ber ngaihdan pawh a ni. Chutih laia a Kristian hlang deuh ber awmna, Mizoram aiawhtu kher kherin, ‘Ka thlawp e,’ a tih chu a dik lo riau hian a lang thei ve bawk. 

Tehkhin thu pakhat ka hmuhah chuan, ‘Miin tiang lianpui mai midang hnenah pe sela, kei chu min vaw ve suh aw a tih ang hi a ni e’ tih a inziak a. Chuti zawnga ngaihtuah chuan thenawm State tan chuan ngeiawm ve thei tak tur kan lo ni a. An ngei thawkhat bawk ni ngei tur a ni, hun danga Silchar lam unaute nena a hring a hrana kan innawk tum tih lohva ngaihmawh hlawh lo tak Mizote tan kan thenawm State a ralti pha titih hial mai. He CAB thlawpna thu avang hian hnamdang hi engemaw ti takin an zahawm thei deuh tlat mai a. ‘Nangni chuan in lo duh a ni maw?’ ti ta se insawifiah a buaithlak thei deuh tlatin a lang.

Mahse thil awmzia ngun taka han chhut chuan kan MP khan CAB kha a thlawp lo thei em? tih zawhna hi chhan a buaithlak thei nualin a lang. Agenda danga dinna hun chang ve pha ngai lo kan MP-in khami tuma dinna hun a chang ta nalh mai khan ngaihtuah a tithui hle mai a. Kan MP neih tawh te reng reng, kan chungchang sawi turin Parliament-ah hian dinna hun an nei ngai meuh lova, an ding lo thei thin kha kan dem viau thin a nih kha. Mahse engzat aiawh leh eng Party aiawh nge tih ngaihtuahna aṭanga dinna hun hi siam a nih thin avangin ding ta lem lo kan MP te kha an dawih vang emaw, sawi tur an neih loh vang emaw lam ni lovin kan State mihring tam zawngin a phak ve chiah loh avanga ding lo an ni thin. Mahse thu khirh tak mai, CAB chungchang sawi hunah kan MP neihchhun khan hun a’n nei ta nalh mai a. Amah pawhin, ‘Mi rilru natna thlen ka duh lo,’ ti chungin, tawngka a a thlawp thu sawi kher lova awm theih kha sawina hun tha tak mai a’n nei ta tlat mai a. Kha kha a mak hle a, a mak viau a ni. Kan MP khan khami hunah khan thu sawi loh tum ta se a tan a khirh viau zawk thei a. Chuti chung chung chuan engkim tawrh huama sawi lohva CAB thlawp loh te kha thlarau mite tan chuan tih awm a ni hial zawkin a lang thei cheu. Chu chauh ni lovin mimal intiamna leh mimal anga thu sawi tawh te ngaihtuah pawhin thlawp lova awm te kha thil tihtur dik chu ni zawkin a lang - thlarau thlenga Party hnena kan inhralh a nih loh chuan.

Eng pawh ni se CAB thlawp lo tura kan MP Candidate te intiam vek chungin a tling ta ber chuan a thlawp leh ta a, CAB  pawmna thu lukhamin Krismas chu kan nghak thleng ta a nih hi.