MAYOR HRIATA KA SAWI VE DUH CHU

He thu hi tu nge Mayor tur ni ang tih hriat hmaa ka ziah a ni.

Mizo fate Jerusalem kan tih fo ṭhin, Aizawl khawpui enkawl hna hi hna ropui tak, mawhphurhna rit tak leh hna zahawm tak a ni a, theihtawpa thawh tham a ni a. Thawk ve pha dawn ila, Minister nih ai maha ka duh tur leh ka chhuan tur a ni.

Mayor ṭha chuan an khawpui inawpnaah thil danglam an thlen thei a, nikhaw rei hnuah pawh, ‘Amah hi chumi khami Mayor chu a nia...’ an tih chuan chawimawina ropui tak a ni ṭhin. Kan Aizawlah hian Mayor ṭha chu nei ve ila kumkhuain an hming a dai tawh lo vang tih hial tur khawpin Aizawl khawpui hian enkawl a mamawh. Tun hma zawngin kan khawpui enkawltu, AMC leh a bik takin Mayor ten an nihna an hre tawk lo nia hriatna ka nei a. VCP ni reng si; Unit President emaw inti tlat angin a awm theih a. Chief Minister ni reng sia Party pakhat President ni tlata inhria angin a awm theih bawk. Chuti ni lova Aizawl khawpui chhunga thil thleng zawng zawng leh thleng tur leh awm dan tura mawhphurtua inngai dik takin he dinhmun hi luah se chu mipui kan thawveng sawt ang a, kan khawpui hi a nihdan tawk te teah a nuam sawt ang a. Aizawl khawpui hi a zahawmin a chhunga chengte hi keimahni leh keimahni pawh kan inngaisang sawt ang. Mayor ni reng chung sia MLA pangngai aia hniam ta tlata inhre tan he hna hi ṭha taka thawh theih a ni lo vang tih ka ring.

Mayor ṭha ni tura nihna pawimawh ber pakhat chu thil dang ang bawkin sum duh lo mi emaw, sum laka rinawm emaw, sum chungchanga duham lo mi nih emaw a ni. Fing àwm tak leh fing rual zet si, rin aia an sulhnu a mawi loh fo nachhan ber chu sum vang a ni tlangpui. Sum duhnain mihring hi a tihbuai hauh loh chuan awlsam takin a huaisen theih a, awlsam takin a zahawm theih a, awlsam takin kawng dik hi a zawh theih mai. Tu m'a hriat lohvin mipui rawngbawltu ṭhenkhat hian thil kan ti thei emaw an ti leh ṭhin a. Mak tak maiin mi hian thil hi an lo hre leh zel ṭhin. A chang phei chuan kan thiltih, mite hriat loh tura kan ngaih hi min hriatsak mai a ni lo, thurualpui neih te a ngai. Chuvangin mite hriat loh tura thiltih hi a chhe lam a ṭha lamin thil harsa tawpkhawk a ni.

Sum chungchanga duhamna neih miah loh chuan rawtna ṭha te, thil ṭha te, finna te, hmangchang hriatnate chu an rawn inthurual ta emaw tih mai turin mi dangin min fin chhuah sup sup mai a. Thuràwn te phei chu a dawnsawn dan kan thiam phawt chuan duh aia tam hi kan dawng reng mai a. Tunah ngei pawh a enga mah hmain keini ang takngial pawhin thurawn angreng kan han phuh chhuak kau mai a nih hi. Kan Pathian thuin ‘Sum ngainat hi sual tinreng bul a ni,’ a tih hi hman aṭanga vawiin thlengin a dik a. Sum ngainatna laka kan fihlim theih phawt chuan sual tam tak hi amahin a thlawk bo nghal mai ṭhin. Fing leh remhre takin awm mah ila, sum kan ngainat tlat chuan hriat loh hlanin kan dai sual leh ṭhin.

Aizawl khawpui hi AMC thuhnuaia awm tur ni awm tak a ni — mi khawpuiah pawh Municipal Corporation an lal em mai. Kan harsatna langsar tak, lirthei leh an chet vel dan te hi AMC chuan a thunun tur ni awm tak a ni a — parking fee vel ngawt ni lo hian. Chutiang bawkin kawtthler dunga dawrte pawh hi AMC ngaihtuah tur ni awm tak a ni — dawr kawt vantlang kawngpuia inpho te a záwna dawr neitute phalna ngawt ni lo hian. PHE Department-in an tuisem an tipût a, kan tui pump chhuahsa tam tak a riral leh ta mai te pawh hi AMC chuan a vei tur ni awm tak a ni. Vawk-In sak dan te, mimal In sak dan te, vantlang kawngpui neka mimal in sa te, khawpui fai leh fai loh te, khawpui chhunga mihring cheng himna (police hna ni lo chi) te, khawpui mawi leh mawi loh te leh thil dang tam tak hi AMC ngaihtuah tur vek niin a lang. Bawlhhlawh sawngbawl dan phei chu sawi ngai lova AMC kutken sa a ni a. Mahse kan tihdan hluiah hian a eng hi nge chhawm zui tlak tih erawh ngaihtuah tham fe a awm. Tihdan dik lo leh kal dan ṭha lo eng emaw chu a awm ngei niin a lang — mipuiin AMC kan hmuh dan reng mai hi. Chuvangin ‘Engtin nge thil ṭha kan tih ang?’ tih ngaihtuah hmain, ‘Eng thil ṭha lo nge kan chhunzawm tawh loh tur?’ tih te hi ngaihtuah a ngai hmasa hialin a lang. Bawlhhlawh i then dawn chuan a lian lian paih chhuak hmasa la, a tenawi chu awlsam takin i thian thei mai ang. Bawlhhlawh thianfai mumal lova hmun chei mawi tum chu hahthlak tak a ni.

AMC hian hna a thawh tak tak a, hlawhtlinna a neih dawn chuan Corporator-ho thunun dan te, Corporator te kaihhruai hnate uluk takin a thawk tur ni awm tak a ni a. Ward Committee ko mumal leh mumal lo Corporator te pawh a vil ṭha tur ni awm tak a ni. Chutiang bawkin Local Council te pawh an hnathawh enpui dan leh an hnathawh teh dan te, an hnathawh dik lo hriat theih dante ngaihtuah a ngai a. MLA Fund hman dante thleng hian a kip a kawi chu ngaihtuah theih ni lo mah se, dik zawka hmang tura inhrilh dan leh tihdan te awm thei awm tak a ni. Corporator Fund lek phei chu uluk tak leh awmze neia hman dan ngaihtuah a ṭha.

Le, hetiang thu han sawi hian sawi laklawh chuan kei ta ber hian ka hre dikin ka sawi thiam ta ber emaw intih mai awl tak a ni a. Thil chiang tak erawh chu, kan lo tih tawh dan kha chu entawn loh hram hram tumte pawh a ṭha zawkin a lang thei. Tihdan dik lo, kan lo chin ṭhan tawh zahder viaute hi hawihhawmna ai mahin chak loh lantirna a ni thei. Mipuiin kan beisei chu kan hotute lo sawi tawh angin — Aizawl khawpui ṭha zawk leh inawpna mumal zawk a ni.