SORKAR ṬHA

“Rorelna dik chu lui angin luang se la, felna chu luipui kang ngai lo angin luang rawh se.”

“Pathian leh kan ram tan.”

“Ram rorelnaa Pathian ram tundin.”

Hetiang thu leh incheina zahawm tak nena mipui min han hmachhawn a, kan Party pisa bangah leh kan Party dan buah te kan han chuantir tawh chuan fel tak leh dik taka rorel a, felna leh Pathian ram zawng chhunzawm tur emaw tih loh theih pawh kan ni lo. Mahse, heng thu mawi tak takte hi rin ngam leh innghah zui ngamna chu lo ni tawh ṭhin se, Mizoram sorkar hi kan biak-In leh a chhehvel ang maia fai vûk àwm tak hi kan ni a. Kum sang eng emawti hmalama zawlneite'n Israel fate tana an thusawi te chu vawiina Mizoram Political Party pakhat an sawina ang maia chantir tumin, thiam zawng zawng kan thawh a. Chumi en zawn ngar ngar chuan kan hotute chuan kal an tum ni te pawh a rin mai awl tak a ni.

Sorkar ṭha duh lo Mizo ve si hi zawng chhuak rawh min ti se zawn hmuh huphurhawm tak a ni. Mahse kan aia fing, kan aia fel tura ngaih, an inchei dan leh an ṭawnghmang zawng zawngah pawh thil ṭha duh ve tiatpui awm khawmte sulhnu ṭhenkhat han en chian hi chuan, khaw khat pa phawsawlh sulhnu ang maia pawr hi hmuh tur a awm leh ṭhin si. Thil ṭha leh Pathian behchhana thusawi bansan chuang hauh lo hian mi naran kawr ṭial ha satliah tan pawh a mak tih viau tur hi kan ramah a thleng leh ṭhin a. Mizoram political party lian pathum, Congress, MNF leh ZPM sorkar hun chhung hian mimal inrawihna hna sang chinah tih awm loh tak tak kan hmu ṭheuh tawh a. Mi pangngai chuan chu'ng chu kan hre far hlawm a. Heng hian kan ram kalphung hi a nghawng tih pawh thil chhût mi tan chuan hriat theih tak a ni.

He rorelna buarchuar (administrative anomaly) hre ve miah lo leh ngaihtuah hauh lova ram rorelna kalphung thui tak sawi thei nia inngaite kan awm a nih chuan, inngaihtuah nawn leh deuh a ṭul hialin a lang. A chhan pawh dan awmsa leh thil nihdan phung pangngai baka mimal duhsakna hian kan ram kalphung a nghawng a, a nghawng hi chi hrang hrang a ni nain a pawi vek thung. A ṭhen chuan kan sorkar hnathawk hlawh sang lutuk a nghawng chhuak a, a ṭhen chuan sorkar rintlakna chungchang a nghawng a, a ṭhen chuan sorkar hleih nei hmelpu a nghawng chhuak bawk. Chumi lakah chuan heng kan Party pathumte hi an fihlim lo vek a, party dang dem thei bik pawh awmin an lang lo.

He duhsakna uchuak hi rorelna dik leh fel luihnar tui nutna lai tak pakhat kha a ni miau va. Ram rorelnaa thuneitute'n a hrethiam pha chin tana ngaihsân theih hauh loh tur thil an tih duh miau chuan, eng anga tluak mar nalh leh ṭawngkam thiam pawhin phat mar tum mah ila; mi rilru ngil rilru a hmin thei tawh lo. Party worker, contract beisei vanga pu te tih apiang sawimawi tumte leh party politics tuinua cheng lova awm thiam lo, lehlam pawl sawiselna ringawt zawng ngar ngar ni ve lo, Mizoram tṭhatna duh a, rilru fim tak pu chunga inthlan apianga vote thlakna sawn thei, an vote thlakna an sawn avanga hlawkna tel tum ve hauh lote pawimawhna pawh hmu thei lote tan chuan luihnar tui nutna hi pawimawh tak a ni.

Dr Biakzuala a lo leng a, thil tam tak min hrilh a. Ka tan chuan lawmawm tak a ni. Kan rorelna fel lohna bul chu mimal sual em em vang ai mahin kalphung dik lo hi a ni. Kan ruahmanna leh kan kalphung (governance) hriat dan hi a fuh lo tlatin a lang. A letlingin vuttui kan thlawr a ni hrim mai. Eiruk leh eiruk loh chungchangte hi kalphung a fuh loh tlat chuan thil buaithlak tak a ni a, kalphung dik hnuaiah chuan eirukte hi buaithlak tak a ni bawk.

Sorkar hmalaknaah hian thil awm dan hre ber leh a hlen chhuaktu tak tak, a naka zentute chu Department mi leh sa, Directorate-a thawkte leh District leh Block-a mite an ni a. Heng hmunah hian mithiam leh a subject hria an awm a. Chu'ng mite ruahmanna leh hriatna chu hman ṭangkai ni se chu thil tam tak hi a fel ang.

Entirna'n, Serchhipah Science College kan hawng ve ringawt a, zirlai an awm leh si lo va. College zirtirtu 12 zet, thla khata cheng nuai chuang hlawhte kha kum thum chhung zirtir tur naupang nei lovin an teihawi a, sorkarin an hlawh a pe ngat ngat ringawt a. A chawmtu sikul awm dan leh naupang awm theih dan chhiarkawp chawk fel lovin Serchhip khawpui, Mizoram lailia khaw langsar takah Science College hawn kha tih awm tak nia kan hriat vang ringawt a ni. Science zir tham zirlai ber an awm leh miau si loh chuan tihngaihna vak a awm si lo.

Hmun ṭhenkhatah Directorate leh Sub-Division hotute chhiarkawp ring lovin Unit President te, VC te, Block te leh Minister te thu vel vangin sikulte kan han hawng ngawt a. Naupang leh zirtirtute an inzat chho thial a, a chang phei chuan a naupang lamin an zat lo mah awm e. (Hetiang deuh hi sorkar hna ka thawh laiin ka hnuaiah pawh a thleng tawh a, ka hmu chiang viau.)

A enkawltu tur mihring an indaih lo thei tih hre pha miah lo, thingtlang V/C leh Party Block te leh Unit nawrna avangin Health Sub-Centre te, PHC te, CHC te leh District Hospital thlengin kan hawng a. Chutiang hmuna hmanraw awm tur te, a building te, a thawktute chu tih nek nek a awm zel mai turah kan ngai a. Hmun ṭhenkhata Health Sub-Centre kan hawn ai hi chuan kan khaw ṭhenawma a awmsa hi tiphuisui zawk ila kan tifuh zawk ang. Kan tlin loh pui ti ve anga lan duh vangte leh nei ve anga lan duh vangin mihring tam zawng leh, dinhmunin a pha lo chung chunga nawr sa lohva nawrna avanga thil hawn rikngawt hi a fuh lo. A hawn nia ribbon cheh chah te, ruaiṭheh te, khuallian fakna thu te, khuallian hnena pangparṭhi leh thilpek kan hlante zawng zawng hi kan thil hawn ber kha a taka tihpuitlin leh kalpui theih a nih loh chuan, inkhualtelemna ang chauh a ni.

Mizoram hmun tam takah Department khawi khawiin emaw Staff quarter te a mamawh em em laiin luah lohva chhia sorkar In tam tak kan sa tawh. A ṭhen phei chu sak zawh aṭanga zan khat mah luah lova chhe leh ta te a ni. A satu Department pianphung khan khatianga in sak kha enkawl theihna an nei lo va, an mamawh hek lo. Tu Officer-in emaw pawisa hman a duh vang mai mai te, V/C hnena hnathawh tur pek duh vang mai mai te leh thil dang mak deuh deuh vanga sak pawh a ni thei. Hei hian sorkar rintlakna (credibility) a tihniam a, rorelna fel lo kalphung a ni. Hmanah, 1990 vel daih tawh khan chhimlamah sawn hmutih kung khat chiah veng tura dah Sericulture chowkider ka hmu tawh a. Nuih a za duh khawp mai.

Hetiang, rorelna fel lo hrin chhuah hi a tak ngeiin sorkar hna ka thawh laiin ka hmu nual. Sawi vek ila, mahni thawhna department tan pawh mualphothlak chan a chang thei. A ṭhente chu chinchang hre bertu leh a thu neitu ber tur min hrilh ve duh loh vang a ni tih te pawh sawi ta hial ila, insawi ropuina lam aiin ka hmuh chianzia sawinaah min lo ngaihsak teh u.

Kan sorkar kalphung hi kum tam tak chhung kan lo hman tawh a nih avangin thawklehkhata tihdanglam vut vut chu harsa tak tur a ni. Mahse kan tihdanglam lohva, ‘Tun hmaa tihdan ṭhin a nia,’ tih rikngawt chuan kan sorkar hmalakna hian awmzia a neih tak tak tur hun hi hriat ngam a har ngawt mai. Heng thil, vawiina tihtawp buaithlak ta viau, chhunzawm zel dawn a ni thei mang si lo te hi a hunlai zela thuneituten duhsakna uchuak an lantir vang te, sorkar inrelbawlna (administrative set up)-in a tlin tawk (capacity) chhût lova thil kan lo tih vang te leh ngaihtuah chiang lova thil kan lo tih vang te a ni.

Mahse, thil harsa leh huphurhawm em ema ngaih aikal lak te pawh sorkar hmasa lam awm dan thlira a huphurhawm tehreng nen, ZPM sorkarin a titawp a kan buai mang hauh lo. Pisa kai hun fel zawk bithliah pawh tun hma lama a huphurhawm tehreng nen, vawiinah chuan sorkar hnathawkten chuti takin an lo tlin lo hauh lo. Tun hmaa Opposition lam fate nia hriatin hna an hmuh a, Ruling Party office boruak sa hulh ṭhin pawh tunah chuan thawm a ring lo va, mipuiin sawipui culture pawh kan tlansan hret hret. Kan kudam bukna pawh tunah chuan a dik tawh a, kan police lak tharte pawh a hmaa mite ngaihtuah chuan an nihna tawk ṭheuhvah an zahawm ta hle zawk a. Kan tih tawh thil ṭha han en hi chuan a dang pawh hi tih zel theih a inrinawm lo thei lo va. Ram rorelna dik luipui anga a luan a, kan ram hi Pathian leh kan ram tan kan tih a, ram rorelnaah Pathian ram tundin hi kan beisei a, rorelna dik chu luipui anga a luan ve mai te pawh a theih dawnin a lang. Chu rorelna chu sap ṭawng chuan, ‘Good governance’ an tih hi ni berin a lang. Good governance-ah chuan Ministry, Secretariat leh Directorate ten an mawhphurhna ṭheuh an tih a ngai a. Chumi bi-chai kan bawhchhiat nasat chuan engkim a harsa vek ṭṭhin.

Sorkar ṭha nei tur chuan kan inpek a, kan rinawm a, kan inzir reng a ngai.