HNATHAWKTU KAN MAMAWH E

He Vanglaini chan­chinbu hi i bih chian chuan khawilaiah hian emaw hnathawh tur duh, ban khur lai thei te, in thiat thei te, lei laih hrim hrim thei te i hmu ang. Mahse chuti chung chuan hnathawktu tur hi kan la mamawh cheuva. A bikin Mistiri hna thawktu tur phei chu kan mamawh lehzual. 

Hnam dangin kan Cement Mistiri hna an thawk tlangpui a, mahse kan buaina chu hna tenau leh sekrek anga ngaih, Mistiri pakhatin ni hnih khat leka a thawh zawh mai tur ang chi thawktu tur hi an vang ta hle mai a, hmun tam takah phei chuan chutiang ni lo, thing hmanga in sa tur te leh vawk-in aia u deuh hlek min han saksak tur te pawh haihchham chang a tam ta mai. Concrete hmanga hnathawh tur hi chu hnamdang hian a huhovin inkilkawina fel tak nen hna lian tham chu chak takin an thawk a, chutiang ti thei chu Mizo zingah kan tlem viau. 

Mahni Mizo pui, tlangnel taka chhawr theih te kan duhin kan mamawh em em a, mahse chutiang chu an vang ta hle mai a, kan awmdan han en hian kan vang chho deuh deuh dawnin a lang thei. Thingtlang hmun tam berah chuan Cement Mistiri tur anmahni khaw mi an awm a, an intodelh a, a lawmawm hle a, thing hmanga in sak hna leh thildang thawk tur pawh thingtlangah chuan an indaih deuhvin a lang. Thingtlang khaw thenkhatah thung chuan a khaw mite zingah thiam an awm loh avang leh thiam tum an awm loh avangin hnamdang, khawpui lian zawka mistiri anga ngaih lem loh te’n mistiri anga inlantirin an thawhsak a, a hna neituten thil awmzia an hre si lova an khawngaihthlak phian. 

Thingtlang khua ni lo, Aizawl vengah chuan he chanchinbu chhiartu hian in ṭhenawm hnaiah Mistiri nih tum awm hmel pu tlangval han melh ula, in rin aiin an van ve tho a rinawm. Mistiri nih a, nikhata cheng zanga zaruk hlawh tum ai chuan mi hnuaia inchei ve angreng deuhva awm a, uniform angreng te han hak a, ni khata cheng zahnih pawh hlawh pha lova awm kha tlangval tam tak chuan an duh zawk tlat nia. Kan buaina ber chu a chang chuan a hlawh lam aiin a incheina lam emaw, hnathawhna thuamhnaw emaw kha kan lungawina tawk a ni tlat hi a ni ve. Ngaihtuah chian chuan a lungchhiatthlak fu. Chutiang bawkin kan nulate pawh tlawntlai tha leh pian tha angreng tak tak, an nikhat hlawh han chhut chian chuan sawi zahthlak khawpa tlem hlawh, thlabi a inhlawh, inchei angreng taka lang an lo ni fur mai. 

Kan kalphung hian hnathawh hi a kawk lo ta mai em maw ni tih hial tur a ni. Hna diltu kan tam thin a, hnathawh tur duh hi tam tak awmin kan lang a, mahse sorkar hna kan beisei a, sorkar hna a nih loh vek pawhin sorkar hna ang deuh kan beisei leh a. Nitin hisap lova, thlabi hisap a hlawh lakna hrim hrim hi kan ngaisang ngang mai. Hemi karah hian nitin hisapa hnathawktu tur hi Mizoramin kan mamawh hle a ni. 

Thingtlang mi, Cement mistiri thiam tam tak hi Aizawlah rawn pem lut sela, hna thawh tur an hmuh hle a rinawm a, hamtha takin reiloteah an awm thei ang tih a rinawm thei. Intiam ruala inhlawm khawm nachang kan hriat ve phei chuan an tan kawng a inhawng zau hlein a rinawm. Mahse kan hnathawh dan kalphung leh kan awmdan thenkhat hi chuan hnamdang tihdan a el pha lo. 

Ṭumkhat chu mistiri hna thawk turin Mizo tlangval hnathawktu rual khat kan ruai a. An han fing em em khawp a, taima taka thawktute chu an nuih tliah tliah mai a, mawl an ti ngang mai. Kha mite thianzaho kha khawiah tak tunah awm ta ang maw. A chhawrtute awm loh hlana zelthel dan te, a inhlawh rei thei zawnga thawh sawt lohdan te kha thiam an inti viau mai a. Chu chauh ni lovin tawngkam nalh angreng taka an thawh sawt lohna sawi pial te kha an thiam viau mai a. Mizo tlangval awm khawm e ti lovin chhawr zui zel an chakawm lo ngawt mai. Anmahni lah khan an hna kha han chawlhsan mai kha an hreh lo angreng viauin a lang bawk a. Heng zawng zawng hi hnam puitling lo khawsa zia a ni tih chu sawi ngai lovin a lang reng bawk.

Kan awmdan han en hian kuthnathawktu tur hi kan mamawh telh telhin an hlu telh telh dawnin a lang a. Kan thenawm khawvengah hnathawh tur zawng hauh lo tlangval, thawh tumna nei lo leh thiam bik nei lo, bike nalh taka chak taka chuan chak an tam dan te han en hian hnathawk thiam leh hnathawk thei hi an hlu tawlh tawlh dawn tih a hriat reng a. Hei chauh hi a ni lo, thiam bik leh thawh theihna kawng zawnga chhawr tlak tak tak nih tumna nei lo kan tam hlein a lang. Hna thawktu tam tak chu ni hnih khat han inhlawh lawp lawp thei, mahse an hna kha thiam zel tumna pawh nei lo thawh zel tumna pawh nei chuang lo, duh hun huna thawk lo theia inngai a, an thawh loh hun huna chawlh hmu a lungawi ta kan awm nual bawk a. 

Inhlawh reng reng a khawsa, thawh hreh nei awm lo tak, mahse kum hnih te, kum thum te inhlawh kual hnuah pawh leirawhchan han rem ve te chu tumna nei hauh lo te hi kan lo awm nual mai a. A vengva deuh leh chutiang rilru pu pha tura ngaih, puipunna lama zei tak tak tam tak chuan chutiang hna chu an tih ve turah an ngai leh mang si lova. Inkhel han en dawn a pung hluai tur awm si, nitin hna thawka chhuak tur awm leh mang si lo, thiam bik neih tum bawk si lo thalai rual kan kawl ta nual. 

Khawvelah hian thil hlu chu thil vang hi a ni chawk a. Mizovin hnathawktu kan tlachham tlata a lan avang hian hnathawk thei leh hnathawk thiam chu an hlu telh telh dawnin a lang. Hemi hrethiam pha thalai lehkhathiam hi awm se chu reiloteah an ding chhuak thei maiin a rinawm. Kan YMA-in Zirna Uar Kum a puanah te hian hnathawh zirna uar te hi tel sela a duhawm mang e aw.