MIZORAM ICDS-IN LAWMMAN A DAWNG

Mizoram ICDS-in sorkar laipui aṭangin thawh that lawmman a dawng tih kan han hria a. ICDS a lo thawk ve tawh thin te pawh tel ve tawh lo mah ila thuthmun aṭangin kan lo lawm ve em em a ni. 

Mizoram ICDS hian lawmman a dawng a nih chuan a dawn chhan hi sawi tur a tam hlein ka ring a, a pawimawh ber han tih hleih theih loh tam tak a awm theiin ka ring bawk a. Chutih lai erawh chuan a langsar thei deuh leh langsar ve tehchiam lo tur te pawh an awmin ka ring bawk.

Ka mitthlaah Anganwadi Centre tam tak a lo lang a, Coordination Committee Chairman thenkhat te an lo lang bawk a, Anganwadi Worker te pawh an lo lang zut zut a, Anganwadi Building tam tak a lo lang bawk. Ngopa Anganwadi Centre V te mawlh mai kha an han sak tak tak lai kha chuan an Chairman kha ‘A riak em maw ni,’ tih tur khawpin a thawk ngawrh e an ti a. Khata thawktu Anganwadi Worker lah kha a hmel han enin saptawng a thiam vak lovang tih rin a awlsam tehlul nen a naupangte nena an chetla han hmuh kha chuan Mizoramin thawh that lawmman a dawng hi a mak lo. A AW B te hi kutzaizir a an sawi rual pahin a lem an siam nghal dial dial thei a. Kolasib Centre pakhat kha English Medium leh Primary school inkarah a awm a, chuti chung chuan naupang kha an han ngah thei em em khawp a. Khawbung bial Anganwadi centre zawng zawng bulah tlaizawng kung a’n inphun kim vek a, Centre zawng zawng kha cheng nuai khat leh tlem kan pek khan design inang, rawng inang deuhvin a chhuak vek a. E. Phaileng khuaa an nutrition han buatsaih te kha chu tualchhung nu thenkhatin an puibawm a, belpuiah hian an chawk vut vut mai a. E.Lungdar Anganwadi Centre pakhatah chuan an compound-ah sawhthing leh thlai dang te an lo ching tiar a. Ngopa khaw chhung Anganwadi Centre thenkhatah chuan Swiming Pool te an han dah ngat a. 

Chu chauh ni lovin Environmental science lam zir nan naupangin thlai leh thil chi hrang hrang an han khawi nung tiar a. ICDS chungchang a thawktute inzirna leh training-na zawng zawnga a zirtirtute zirtir phak loh leh suangtuah phak bakin Mizoram Anganwadi Centre tam tak hi a thawktuten an han cheimawiin an han kalpui a. Anganwadi hmun hrang hranga pipu leh tawlhpahrit te, naupang infiamna chi hrang hrang an duan chhuah te hi la khawm ila hmuhnawm tham a ni ang. 

CDPO pakhat chuan a hna dang tibuai lo chu sawi loh, tha taka kalpui reng chung siin khawi lama pawisa emaw a huikhawm tehreng ni CDPO Quarters tur te, C.O Quarters tur te leh Staff engemawzat awmna tur fel fai angreng tak tak hian a sa thluah mai a. CDPO thenkhat chuan Tar pension semna lama upaho thutna tur chawlhbuk te hi pawisa dang hmuh nei mang lo hian an pawisa hmuh tlemte hmang sual hauh si lovin an han din thei a.

Anganwadi sak nana Anganwadi Worker pasal, a chawlhkar a chawlhkar thawk ta mai te, mahni in hnuaia thingzai dah that pawt chhuak a Anganwadi Centre thuam that nan leh sak nana thawh ta mai te hi Mizoramah an va tam em. Khaw thenkhatah chuan an khuaa concrete in ding hmasa ber chu Anganwadi Centre a ni. Chung sak nan chuan Central sorkar aṭanga kan pawisa hmuh kan pek theih chu nuai khat leh singsarih te, nuai khat leh sing hnih te a ni a; khaw vanduai deuh phei chuan singsarih zawng te an chang ve bawk, a thawktu leh a enkawltu a zir a ni. Chuti chung chuan Department dangin cheng nuai sawm hmanga an Department in emaw, eng Centre emaw an sak aia tha daih daih hi Mizoramah a tam khawp ti ila, kan sawi sual mah ang - a tam satliah lo, a ni deuh vek zawk miauva. Chutiang a nih theihna chu eng dang a ni lo, Anganwadi sakna tura pawisa hmuh ang ang te chu Centre Committee kuta dah a nih thin vang a ni.

India ramah a tlangpuia lakin Mizoram Anganwadi Centre a tha ber tih hi pension thak khawpa ka thawh hnua ka hmuh chinah chuan ka sawi ngam a. Chung chu mipuiten a hring a hrana a pawisa an khawih a, an thawh belh vang a ni. Chhuanthar hmuna an Anganwadi Centre pakhat phei chu a building chu sawi loh, a kawmthlang lungrem nan ringawt pawh Party Worker thenkhat chuan nuai sawm an hmang ang. Chumi chungah chuan Anganwadi Centre lian tha tak leh fel tak, kawngkapui te pawh Baktawng kutchhuak tih hriat taka mawi tak a awm a. Department lam aṭang chuan midang dawn ang tho, cheng nuai khat leh singsarih an dawng. 

Mizoramah chuan tunhma aṭangin Angan­wadi hi mipuite tel ve theih turin a Centre sak hna te hi pawisa a awm loh lai aṭanga pawisa awm hnu thlengin Committee kutah dah a ni thin a. Chu chuan Anganwadi Worker-te a tiphurin an hnathawh a tizahawm a, khawtlang mipuiten Anganwadi hi an inti neitu thin a. Phur taka hman aṭanga lo thawktu hrang hrang leh a hun lai taka thiam taka recommendation ziaktute avangin ICDS chuan vawiinah lawmman a dawng kan ti thei ang. 

Kumin aṭang khan Department lamin nasa taka an hnial chung pawhin kan sorkarin Anganwadi sak nana pawisa awm, Centre khat tana cheng nuai hnih diat diat awm chu mimal duhsak nana hmangin contract-in a kalpui ta mai ni awmin an sawi a. Hei hi a dik chuan a lungchhiatthlak hle ang. MNF hun hmasa, Pu R.Tlanghmingthanga hun laia tihdan tha tak awm sa, State dangte laka kan inchhuan ve theihna leh Mizoram Anganwadi Centre chungchuanna bik, Congress sorkarin engemaw chen a kalpui chhunzawm khan Anganwadi kha mipui taah a chantir a. Mahse chu tihdan tha tak chu a lo danglam takah chuan kan awm zel dan tur hi rin dan pawh sawi lawk a chakawm ta lo hle mai. Tunhnu zelah Mizoram ICDS hi a lo tlahniam ta a nih ngai chuan he thil thleng pawi tak hi a chhan lian tak pakhat a ni ve ngei ang.