CHHIATNI

Kan thi reng reng a, kan thi zel dawn a, a tu a mah hi dam khawchhuak kan awm dawnin a lang lo. A dam chhuak teuh pawl tak tura rin te pawh tawtawrawt hnuhnung a lo rik hunah chuan mahni pan lam lam pan turin kan phe sang sang ang a, vanram lam pan lo chu hremhmun lamah an liam ang. Pan lam nei lova tangkhang hlen ta awm theih ngawt dawnin a lang lo. Medical Science leh kan nitin nun leh kan chheh vela thil thleng mek han en hian thi tur kan nih a chiang a. Pathian thu lam aṭanga ngaihtuah chuan ni hnuhnung thleng phaho zingah pawh leilung luah zui tur awm thei tur angin kan ngai lo. 

Tunhnuah thihna lama kan insawngbawl dan a danglam chho hret hret a, kan tih lam lam chu kan ti ta fe mai. Chhiatna lam a ni a, kan duhthawh chho zel niin a lang. Mitthi chanchin sem : Mitthi chuan chanchin ziah tur a neih leh neih loh lam te, a tul leh tul loh lam te kan ngaihtuah vak lovin a lang. Mi an thih tawh chuan mitthi chhungte tam tak chuan, ‘Chanchin ziahna kha,’ an ti nghal mai a. Thih chuan chanchin ziahna sem ngei ngei tura ngai kan tam mai. Sual vang a ni lova, tihdan emaw kan ti satliah mai niin a lang. Hmanni a ka hmuh pakhat kha chu han chhiar chhuah dap pawhin han chhinchhiah zui tur tehchiam a awm lo ve riauva. ‘E, hetiang hi a lo nih hi maw le,’ tihtur engmah a awm lo. A nu leh pa leh an unau indawt dan te a lang a, a naupan laia mi pawi a sawi ngai lem loh thu te a awm a, a nat dan tlem a awm a, lawmthu sawina a ni leh mai a. Ruang chungah kha lo kha sawi tur dang a awm tehchiam lo. Mahse a sema sem kha tih ngei ngei turah ngaih a ni. 

Ruang chunga thusawi : Tunhnua ka ngaihtuah chu ruang chungah hian engatinge chhungkaw thu leh natdan leh inenkawl dan chipchiar em em hi sawi vek kan tum le aw? tih a ni. Mipui lo pungkhawm te lo kal dan leh kan awmdan enin sawi chipchiar loh deuh a, tawi deuh leh fel deuhva tlingtlak mai hi a sual loh tehlul nen chipchiar em em a sawi kan tum ta thin hi a fuh lo zawkin a lang. Mahse thihna a ni a, miin an tih tawh chuan inkhap chi a ni hauh si lo. Dan naranin thih veleh a inhmangaih anga lan te, insawi ropui te kan duh vang ni berin a lang a. Rilru fim a lo thlirtu tan chuan sawi tul lo a awm nual thei. Sawi tawi pawi tih loh leh sawi chipchiar tum loh hi ruang chunga thusawitu tan chuan invenna hmanraw pawimawh ber te zing ami a niin ka hria.

Zai tum kher : Hmun thenkhatah chuan ruang awm laiin tlin leh tlin lovin zai kher kan tum thin a. Kan Mizo tihdan ni tlatin kan hre nghet tlat a. Zai reng mai hi kan tlin ta lo viau a, hmun thenkhatah chuan zai tur mihring kan awm lo chung chungin zai rawt tlat pawl kan awm thin. A mihring lamin kan daih lohva, zai mi deuh kan awm loh chuan zai kher hi tum lo ila a pawi viauna a awm em ni aw? Mitthi chhungte tam tak tan chuan tlin leh tlin lova zai kan han tum thin te hi a mualphothlak zawk mah mahin a lang theiin ka hria. Zankhuaa zai tawh hnu a zing lamah pawh tlin lo chung chunga nu leh pa tlemtein zai tum ai chuan thu mai ila, mitthi chanchin sawi tur te kan hriat loh chuan titi dang pawh sawi ta mai ila a pawi viau em? Duhthusam chuan awm thep thawp ila, zai ila tih chu a tha, mahse tlin loh chang hi a awm thei viau a ni. 

Mitthi chhungte tan hun siamsak : Thian pakhat chuan, ‘Kan han thi a, zankhuain min menpui a, thalaiin min zaipui a, a lawmawm. Tlaivar tawh hnu a zing aṭanga kan han inlenchilh hi chu buaithlakna chu a awm. Inchhung ro rel a ngai a, tlailam chaw eidan tur rel fel leh naupangho chei dan tur te ngaihtuah a ngaiin mahni pawh inchei fai ve deuh te leh inbual te kan duh a, thutchawlh leh han maimitchhin zeuh te pawh kan mamawh asin maw le,’ tiin inthlahrung takin a sawi. Veng tam takin kan buaipui thalai tlaivar, zing lama a thlaktu tur nu leh pa thleng har hi a ni. Mahse ngun taka ngaihtuahin, ‘A tul em?’ tih hi zawhna pawimawh tak a ni. Kan duh tak kan thlah liam tur ni-ah chhungkaw ro rel theih hauh lohva a hma tlai aṭanga kan inchim khat tlat reng mai hi a tha ber em aw?

Puana intuam : Puana intuam leh khawhar riahpui hi inanna a nei. Hmanlai chuan a tul a, tunah chuan a tul tehchiamin a lang ta lo. Tuam awm ngawih ngawih chu an awm a. Mahse a tuamtu kan tam ta lutuk mahin a lang. Ruang intuamsak ngat chu Mizo nunah chuan a hlu viau mai. Mahse kan khawvel, kan ei leh bar dinhmun, kan pawisa dinhmun te a lo danglam ta a, tunhma angin ruang tuamna puan hi kan mamawh ta chiah lo. Chubakah tuam tura inngai kan tam ta lutuk a, inhriat sen loh palh mai te leh hlutsak loh palh mai te a hlauhawm ta rum rum. Chhungkaw tam tak tan phei chuan pangpar tam lutuk ang deuhvin a buaithlak ru phian thei. Pangpar pawh mitthi chhungte tam tak chuan an buaipui ru viau thei. Ruang chunga pangpar, paih ngam si lo, dahna buaipui ru ta viau ka hre ve nual. 

Thlalak : Hei ber mai hian sawi a hlawh a, tihdanglam erawh a harsa ngang a ni ang e. “A fanu thawhna Department mi ten thla an lakpui ang,” han tih te hi tunlai viau mah se ngaihtuah chian chuan a buaithlak thei. Thlalaknaa rawn pung hluai khawp an Office aṭanga an lo kal a nih chuan kan sorkar Office chu tha taka kalpui a harsa phian thei. Hmun pakhatah phei chuan a fapa indang tawh nupui thawhna Office a mi ten thla an lakpui a. Kan sorkar hna kan thawhdan leh kan ngaihdan hi a inang lo hlawm ngawt mai. Mipui pawisaa chhawr hnathawktu te khatianga an pun hluai hluai a, thla te an lak a, thlalakna lama dinna inchan lo khawp khawp Office hun chhungin veng dang daihah kan punkhawm luai luai chuan kan sorkar hna chu a ngaihtuahawm ve mai mai hle chuan a rinawm. Thawhpuite pasala pa te thihnaa kan kal chuan thihna dang, kalna tur dang a tam hle dawn tih a hriat a. Office hun chhung ni lova keimahni hun, chawlhni te, zing lam te, inrinni te, zan lam te leh Office ban hnu tea kal hi hawihhawmna leh tawrhpuina dik chu niin ka hria a. Office laia a huhova kal dur dur hi kan la ngaihsan tlat a, ‘Office fel’ anga lanna atana kan hman tlat chuan hmasawn a har viau thei. Office khatah pawh inkawm ngeih bik leh inhnaih bik awm theih a ni, chutiangah chuan a hnai zual te chu leave te lain lo va kal se sawi thu a awm lo, mahse a office hnathawk nawlpui ang a leave pawh la si lova kal dur dur hi chu a ruaitu mipui pawisa a ren lohthlak a tih theih ang. 

Thih album : Mitthi han ral hian thlalak hi album-in an rawn chhawp ta thin a, ka mit fiah lo nen ka en lo tlangpui. Kuang thla hlir mai leh tute emaw ding tlar thla hlir mai a ni a. Min hrilhfiahtu leh hlutsak taka min enpuitu an awm loh phei chuan han en hian engmah hriat belh tur a awm lo. Hmun thenkhatah phei chuan a mitthi dam laia lak thlalak pakhatmah awm lovin kuang thla hlir a ni. Thlalatu viaktha deuhvin mitthi hmel langa an lak te, thlana kuang thlak thlak tawh hnu an han la zui hram hram te pawh hi en a nuam lo khawp. 

Thihna hi thlarau lam aṭang lo phei chuan thil ngam harsa tak a ni. Mahse thihna kan sawngbawl dan leh kan intintuah dan hian kan hnam changkan leh changkan loh a hril thui hle a. Thihna kan tawh hian kan lan chhuahtir ta thin a. Thlalak hun a lo thleng a, an han la zat zat a, a tawpah ruat lawk loh tuten emaw ngampa tak a, ‘Han hmet teh, ka lakpui ve dawn,’ an han tih ngat te hi chuan a hnu lamah kha thlalak kha an ngaihven zui ve turah ka ngai a. Mahse ngaihven zui ta chuang lem lo te pawh awm theih a ni. 

Tihdan mawi tawk leh awm tawk hi chu a awm mai a, sûn bik anga lan tumna te, hnem tum bik riau anga lan tumna te leh nih bak hret a ropui tumna emaw, inchawi vul tumna emaw te hi kan buaipui chhunzawm tak ber hi chu niin ka hria.