MHIP INTHLANG TUR HI

Tun aṭanga rei vak lovah MHIP an inthlang dawn ni awm tak a ni a. Tluang tak leh tha takin inthlang se a duhawm ngawt mai. 

MHIP te hi NGO ti angin kan sawi mai thin a, mahse a nihna takah chuan CBO an ni. NGO chu pawl thiltum avanga pawl zawmtute awmkhawmna a ni a, CBO erawhchu pawl mi leh sa te chu hnam emaw, khua emaw, veng emaw a an awmkhawm avanga inzawmkhawm te awmna pawl a ni ti ila kan sawi sual lutuk lovang. Han sawi hian a kual duah ta thin a, MHIP chu Mizo hmeichhia nih vanga insuihkhawm te awmna pawl a ni ti ila a awlsam mai awm e.

“Hemi hi tih an tum a, chuvangin ka tel ve,” tih emaw, “An thiltum hi tha ka ti em e,” ti emaw a tel ve ai chuan, “Mizo hmeichhia ka ni a, ka tel ve,” tih hi a member tam ber te tel ve chhan a nih a rinawm. A tel tam ber hi an tel ve phawt a, chumi hnu chuan a thiltum leh a nihna dang an ngaihtuah chhunzawm ni maiin a lang. CBO-ah chuan chutiang chu thil kalhmang a ni a, YMA te, MUP te leh pawl dang thenkhat pawh hi chutiang tho chu a ni awm e. 

A lehlam zawnga ngaihtuah chuan CBO chu NGO ai chuan hlu tak leh member te tana ngaihawm tak a ni thei a. Chuvangin a hruaitute pawh an fimkhur a ngai zual a, a then phei chu duh lo chung chunga an thlan te leh hreh chung chunga tel ve, kohna angreng rawngkai avanga hruaitu lo ni ta te pawh an awm thei ang. Chutiang ngaihtuah chuan an zahawmin an hlu sawt awm e.

Mi tam tak chuan CBO leh a hruaitute chu mi inpe, midang rawngbawl tura hlawh nei lova awm angah an ngai a, an zah a, an ngaihlu bawk. Kan CBO lar zual, MHIP te, YMA te leh MUP te hi mipuiin kan ngaihlu thin a, kan zah thin a, an inpekna pawh a sang hle thin. Mahse hun engemawti lai aṭang khan MHIP leh YMA bik hi engemaw a ti ta deuh hlek a. YMA chu a insiam tha leh tawh viauin a lang a. Hruaitu thlan dawn boruak pawh a dai ta viau mai. Mahse MHIP hi hruaitu thlang thawm a ring ta viau mai a, a tawpah phei chuan Court lam lam te a inrawlh a ngai ta hial mai a. A pawiin a zia lo hle mai. 

MHIP hruaitu tur anga ngaih te hian khawngaih takin fimkhur takin ngaihtuah sela, pawl hmingchhiatna tur leh pawl tihmelhem thei tur thil chu kalsan ngam sela a duhawm ngawt mai. Cowboy insual ang maiin, ‘A pa len poh leh a tlu ri a ring,’ tih ang deuhvin pawl lian leh member ngah chu a tlusawp ri a ring lo thei lova. A tluk tawh vek pawhin kaihthawh a buaithlak duh bawk. Heng thil vel awmdan hi Mizoramah a hmu chiang ve pawl tak niin ka inngai a, a hmuhnawm lovin a ngaihnawm lo duh viau tih hriat a tha. 

NGO lamah chuan hruaitu nih te hi inchuh chi a ni a, mahse CBO hruaitu nih chuh hi chu a pawl member-te awmdan leh inpek chhan ngaihtuahin chuh chi a ni tehchiam lo. Fing thiam deuhvin an han chuh a, engemawtia inthup tlat chunga an han bei vel te hi chu a inkhap a buaithlak em a, tihngaihna tak a awm lo tih thu chauh a nia. A lang a pauva inchuh te ang hi chu a tih sa loh angreng khawp a ni. Hruaitu nih inchuh leh a pawl kalphung te, member lakdan te leh mi beiseina nen a induh thei lo reng reng a. A ti pawl leh a ti duh pawl an awm takah chuan tihngaihna tak a awm lo tih thu chauh a ni mai. 

Hetiang pawl a kan mi thlanchhuah te hi inluling tur emaw, invaivung tur emaw, inti lal tur emaw angin kan ngaihtuah hauh lova. Rawngbawltu dinhmuna ding angah kan ngai a. Chuvangin miin a chuh a a chuh tawh chuan a pawl kalphungah a tling lo sa deuh tlat a ni. Tlawmngaihna nena hruaitu ni tur, hlawh leh ilo engmah awm si lo hi miin a chuh duh tlat tawh chuan a phenah lar duhna te, engemaw ti taka hlawkpuina te a neih a rinawm thei tlat a. A pawl kalphung leh nihna te, member-ten hlawh leh mimal hlawkna engmah an neih lohzia te han en hian a chuh a inchuh boruak hi chuan a pawl hrilhfiahna leh member lak dan a tibuai zo vek tih hriat a tha khawp mai. 

Hetianga tlawmngai pawl hruaitu nihna a chuh a chuh duhna rilru pu te hi chuan midangin chuh an tum loh vang leh chuh ena an en ve loh avang maia heng pawl hi vawiin thlenga ngaihsan hlawh a ni tih hria se a duhawm a. Tuten emaw an lo chuh a, an lo hlawhtling anga a lan pawhin member tam zawk chuan an tlin dan te, an mizia te kha an ngaisang zui hauh lo tih hriat atan a tha a. Chuvangin awm pangngaiin awm sela, chuta an lo tlin tak chuan a tha, an tling lo a nih pawhin chak lohna leh thiltih theih loh vang a ni lem lo tih hria se a duhawm ngawt mai.