Zalen huang: SORKAR THAR

Sorkar thar a lo piang a, sorkar liam ta ai chuan thawm an ngah hle mai a. An sorkar tirh aṭangin duhthusam chu ni chiah lo mah se vawiin thleng chuan sorkar hlui a ngaihawm lem lo hle. 

An sorkar tirha pisa an luah langsar lutuk kha thil ka hriat ve thiam loh vang nge ral khat aṭanga ka lo hmuh danin ka duh aiin an phur lutuk deuhva. Home Minister erawhin muangchangin a’n luah a, a fakawm leh ṭhin. Ro dik leh ṭha an rel a nih a, an rorel an sut zeng zung lohva, chawl lova kum nga chhung an thawh phawt chuan he Zoram tan hian thil tam tak an ti hman dawn tih a chiang a. Chutih kara phur lutuk rawngkai thei tura pisa han luah rum rum kha ṭul ka lo ti lo ve mai mai. ‘Kan hmanhmawh em?’ tih ai chuan he hringnunah hian, ‘Kan tlin rei em?’ tih hi zawhna pawimawh zawk te pawh niin ka hria. 

Thil awmdan engmah ka hre hauh lo nain kan Minister hlui te khan an bangla kha eng angin nge an chhuahsan aw? tih zawhna ka rilruah a awm a. ‘I bawlhhlawh paih danin i mizia a tilang,’ tih angrengin kan bangla chhuahsan dan hian kan mizia thui tak chu a hril ngei ang tih thuah chiangin ka inhria. Tunhmaa mi pakhat bangla chhuahsan tur kha chuan anmahni mimal ta bil bak engmah a keng chhuak duh lo tih thawm ka hria a, a ngaihthlak a nuam khawp mai. Khawi hmun maha engmah nei lo leh in ruaka lut tur ang maiin kan bangla chhuahsan tur hian engkim hi kan mamawh thar thut mai ang tih te ka hlauva. He khawvel kan khualzinna ramah hian kan ram hruaitu lu ten ṭhutthleng te, almirah te, pangpar te leh thildang neuh neuh, hmeichhe lungkham tawk te te an ruh chhuah ṭeuh mai chuan kan rilru lam chu kum 10 kan Minister hnuah pawh a lo la pachhe hle tihna angah ka ngai. Saprama ka kal khan Birmingham a ka thlenna ṭhenawm pitar (emaw ni) chuan sofa set ṭha deuh mai hi a theh chhuak a, ka thlenin nu Mamuani chuan, ‘Ti khuan an mamawh tawh loh chu an paih mai. A chi thar an duh a nih khu,’ a ti mai a. Keini kan ram hruaitute chuan anmahni mimal pawisaa an lei pawh ni hlei lo an han paipawn chhuak nghek mai anga an sawi ṭhin te hi chuan kan hausakna (chhung lam leh pawn lamah) a hril ve ngawt chuan ka hria. ‘Vai duham laklawh chuan a thlawna ei theih a nih chuan hmarcha pawh thak ti chung chungin an ei ṭeuh thei,’ an tih fiamthu te pawh min hriat chhuahtir. 

Bungraw lam chu ka sawi tum a ni lo! 

Kan sorkar thar chuan kawng hrang hrangin hma a la char char niin a lang a. Minister-te hnathawh pawh chanchinbu bakah Whatsapp lamah kan hmu chuai chuai a, a lawmawm ngawt mai. A ṭhenin hmunhma an tlawh, a ṭhen Delhi lamah an tla thla, a ṭhenin chumi khami te chu an hmachhawn, a ṭhenin Department mi leh sa te nen meeting an nei, a ṭhen khuallianah an ṭang.... a lawmawm e. 

Heti hian beiseina nen kan sorkar thar hi kan lo thlir reng a. Tunhma ang a nih chuan hun rei tak chhung chu sawiselna lam hi a awm meuh lovang. Inthlan dawna an thutiam te, an tlin tirha an thusawi te leh thildang dang hi tihpuitlin a ni em tiin beiseina leh hlauhthawnna nen kan thlir ṭhin a nih kha. Kal dan nghet leh awmze nei, rinawmna nena inkaihkuaha an kal chuan mipui hi kan lungawi sam viau dawnin a lang. Tun thleng hi chuan thawm riva ngaihnawm tak tak hlir kan la dawng a, kan sorkar hi engmah ti lova ṭhut mai mai a tum lo hle te pawhin a lang a, a phurawm hlein a lang bawk. 

Eng pawh ni se Sudden-a thawnthu a, ‘Ka pa Bill, kan lo thlir reng che a nia,’ tih ang deuh khan kan sorkar hruaitute hian beiseina sang tak nen kan lo thlir reng tih hi inhre ngawih ngawih se ka lo duh ve mai mai a. Kawng chhawng tur an han ngaihtuah vut vut mai te, Central Minister-te an han hmu zung zung mai te leh hnathawktute an han titipui te, hmalakna hmunhma an han tlawh zung zung mai te hi chu a ngaihthlak a nuam khawp a nia. 

Tlin lohna tam tak chu kan ram hruaitute hian an nei ang a, mimal nunah phei chuan an tling lo ve ngawt ang tih ka ring. An mimal tlin lohna hrang hrang chu ngaihdam theih tam tak ka nei ang, mahse mipui sum an enkawl dan te, anmahni mimal inhaivur zawnga an khawsak leh khawsak loh te hi keia tehna lian tak chu a ni ve e.