THING PHUN LEH ANG AW

YMA Day a lo thlen dawn hi chuan rilruah thing phun a lo lang ve nghal a. Thing phun lam han ngaihtuah hi chuan nungcha humhalh a lo lang ve leh nghal bawk a. Heng thil te hi a indawt zat zat mai. 

Tunhma atang tawh khan han ti ila, kum 1992-93 kha YMA-in nungcha humhalh kumah a puang a, kum 28 vel lai a lo liam ta. Khang hun lai atang khan YMA ten YMA Day-ah chuan thing kan phun a, sorkar pawhin khami vel atang khan thing phun a uar a, sorkar Department te pawhin thing kan phun thin. Kan thing phun te hi a tam lam kan ngaihtuah fova, kan phun sa enkawl that lam kan ngaihtuah tehchiam lo em maw ni a tih theih rum rum mai. 

Mahse tunah hian lawmawm tak maiin Mizoram kawngpui dung hmun hrang hrangah thingphun duhawm tak tak hmel a lo lang a, tunhmaa thing kan phun a, kan ngaihsak zui leh lo ang ngawt ni lo deuh kha hmuh tur tam tak a awm ta. Chawngtlai leh Khawhai inkar kawngah te pawh thingphun ngaihsak zui hmel hmuh nuam tak tak a awm a, nakin lawkah chuan kawngpui kama thing phun mawi leh hmuh nuam tak tak kan la nei nual dawn a, kan thingtlang khua leh District khawpui tam tak hian inel nan hmang se a duhawm ngawt ang. Dik tak chuan khaw bengvar deuh leh bengvar deuh lo chu nakin lawkah a la hriat chhunzawm zel ang a. Khaw thenkhat hruaituten mahni tanghma ngawt hai a khaw kar kawng thingphun te an ngaihtuah lem loh laiin khaw thenkhat hruaitu thlir thui deuh chuan thangthar tan thingkung mawi tak tak an hnutchhiah mai dawn a ni.

Thil ho angreng leh lungchhiatthlak angreng tak pakhat chu motor kawngpui dungah sorkar leh khawtlang te, YMA lam ten thing kan phun a. Tuten emaw motor kawngpui alkatra phah chin thleng rawk maiin huan lo ram an han vat a, chung thing phun te chu an hal hlum leh mai thin a. An hal hlum thenkhat phei chu uiawm tham leh pamhmai tak tak a ni hlawm. Hei hi kan sorkar hian harsa teh vak lovin a dang thei tur ni awm tak a nia. Hetianga motor kawngpui thleng rawk rawka lo vah leh huan vah te hi engti dan nge maw ni ngai ni. Inkaihhruaina leh dan mumal awm lova khawsakna hmun a ni hrim mai a. A pawi ngawt mai. Khaw chhung area a LSC huam phak loh chinah hi chuan motor kawngpui hnaih theih zawng hi chiang taka awm tur ni awm tak a nia. Khaw kar kawng motor kawngpui humhalh emaw, kawngpui huam chhung humhalh emaw hi tu tih ber tur nge pawh hi kan hre ngut lo mai awm mang e ka ti thin. Environment lam nge, PWD lam nge, Land Revenue lam tih chian a, chung te chuan kawngpui kama vantlang emaw, pawl emaw, sorkar emaw thing phun theihna chin te, chung thing phun te chu mimalin an tihchhiat loh nana humhalhna dan te tihchian ni se a duhawm ngawt mai. 

Tlem lai khan mi thenkhat, Air Gun changkang, entlang vuah hmang a sava veh a, kap thla teuh teuh an awm ni awm takin an sava kahthlak thlalak te kha Whatsapp lamah kan hmu chuai chuai a. Heng mite hi engti taka tih tur nge tih ngaihtuah a ngai angreng khawpin ka hria. A dan leh hrai lam ka sawi thei lova, mahse heng mite hi ngaihsan an har angreng khawpin ka hria. Mi thenkhatin an humhalh a, an insum tang tang lai a hetianga titute hi no taka melh chu an har ta khawp mai. Tih tak takah chuan mi humhalh sa leh mi zuah len sa phil ang deuhvah hian kei chuan ka ngai a. Ti ve duh ila kan ti ve thei thova, mahse mi tam takin an tih duh loh vang maia hetia ti thei hi an ni. 

Thing phun leh sava leh nungcha humhalh te hi thil inkawp tlat a nih avangin kan tanrual a ngai a, chu chauh ni lovin dan kan neih a ngai bawk a. Dan neih chauh duh tawk lovin a kenkawhna lamah kan khawng that a ngai bawk. Sorkar tha chuan dan awm sa a kengkawh a, chu chauh ni lovin khawvel inherin a her chhuahpui kan mamawh dan a duang thar zel tur a ni a. Dan awmsa kaiher a laina leh Party mi leh then leh rual duhsak piah lama mipui hamthatna tura thawh hi sorkar tihtur pawimawh tak a ni a. Chutih laiin sorkar hi a hranpaa va awm hrang nalh ni lovin mipuite hian kan tawiawm a, kan tihchak a, kan zah a tul a. Zah tlaka awm pawh sorkar tih tur a ni bawk. 

Kuminah pawh thing phun leh ila, kan thing phun tawh sa te enkawl thar lehin kan phun thar te enkawl uluk ila keimahni leh thangthar tan Zoram nuam i buatsaih ang u.