PAHOSS HI

Mizoram sorkar, a bik takin tuna kan roreltu MNF sorkar hian lirthei leh a kaihhnawih hi a ngai pawimawh hle ni awmin a lang a. Khawvel ramdangah Taxi rawng atan a dum leh a eng, rawng lar tak mai an hman huai huai laiin keini chuan rawng hahdam ber mai, a var kan han hmang tlat a. Hei hi MNF sorkar hmasak laia an phalsak kha a ni. 

Hemi hnu hian Mizoram sorkar, a bik takin Chief Minister Pu Zoramthanga chuan Traffic Jam hi a ngai pawimawh kan ti dawn nge, a ngaimawh kan ti dawn, an sorkar hmasak tum khan kawng chhawng leh leiverh a sawi nasa hle mai a. Kulikawn atanga Bawngkawn a lei hnuaia verh chhuah te, Vaivakawn atanga Bethlehem venga verh chhuah te a sawi leh a. An sorkar loh chhung khan mipuiin kan sawi nasa viau mai a. 

Tunah an rawn sorkar leh a, midang ni lo, a hmaa sawitu Chief Minister pangngai bawk khan kawng chhawng te, Traffic Jam lohna tura Aizawl siam thu te chu a hma ai mahin a nasa ang e tih turin a sawi leh a. Chuti chung chuan commercial vehicle (Two-wheeler taxi) pawh tam tak permit an han pe leh a. Chu chauh ni lovin motor parking chu kan ngai pawimawh ta khawp a, mimal, motor dahna siam thei te hnenah chuan pawisa fai kan pe ta chiam mai a, tunah pawh pek leh zel tur a la inthuah tun mai. 

Chu motor dahna tura pawisa pek theihna chu a scheme hmingah PAHOSS (Parking House Support Scheme) tiin kan vuah a, mimal, kawngpui bula in sa, ‘Parking ka siam dawn e’ titute chuan an dil thei a. Chu chu UD&PA lamin an endik hnuah pek tlak an tih chu an pe ta ni awm tak a ni. He PAHOSS scheme hnuaia motor dahna siamna pawisa la tur hian dan leh hrai engemaw fel angreng tak chu a awm ve ni ngei tur a ni. Dil hmu tawh, la thei rih lo te, dil hmu tawh si a lak chhunzawm thei lo te pawh an awm ve ngei niin a lang.

A mak lai tak leh a buaithlak lai tak pakhat chu mimal in sakna atana Mizoram sorkarin hetia pawisa a pe ta mai hi a ni. Sorkar pawisa hi hetianga hman hi thil tih awm a nih kan hre ngai lova. Tute emaw motor dahna tur, sorkarin hetia mimal hlawkna tura a ngaihtuahsak ta mai hi sorkar pawisa hmanna te leh sorkar pawisa chungchanga sorkar a firna dang te ngaihtuah chuan a mak ta tlat a ni. Heti a nih chuan miin, ‘Kan ram a zim a, Septic Tank siamna hi kan ramah a awm lova, pawisa kan nei bawk si lova, kawngsirah kan khawhthlaktir mai,’ ti ta se chutianga titute chu sorkarin Septic Tank siamna tur a pe mai dawn em ni ang? 

Anih loh leh miin, ‘Hei in hriat angin kan harsa si a, dawrkai kan duh ve si a, kan hmunhmain a zo si lova, kawngah kan dawr bungrua hi kan dah mai loh chuan.....’ ti se an in chhawng sak belhna tur pawisa sorkarin a ngaihtuahsak ang em? Anih loh leh miin, ‘Vawk ka vulh duh si a, ka vawk in sakna tur hi a awih lutuk a, kawngpui lam hi kan nek ngawt loh chuan tihngaihna a awm lova, kawngpui kan nek loh theih nan a ban thlang deuhva kan phun theih nan sorkarin pawisa min ngaihtuahsak rawh u,’ ti ta se kan pe ang em?

Motor ngaihsanna hi khawi atanga lo chhuak nge? Eng vangin nge motor hi kan ngaih pawimawh bik ang? Motor nena inkaihhnawih a nih tak avangin engatinge mimal in sakna tur kan tumsak bik ang? Motor ai chuan sikul te hi a pawimawh zawk em? Motor ai chuan kan hriselna te hi a pawimawh zawk em? Mi ramah hetiangin an ti ve em? 

Mimal sum hmuhna tur emaw, mimal bungraw dahna tur emaw ngaihtuah nana sorkar pawisa hman hi engtianga ngaih tur nge? Kan sorkar hian khawpui chhungah kawng tihzauh awm tak, tihzauh theih, mahse pawisa awm loh avanga a tihzauh loh hmun tam takah a awm a. Chung te zinga tam tak chu mimal ram pawh ni lo, vantlang ram te a ni. Khawilai emaw hi fit hnih fit thum lekin han zauh belh ila chu mipui vantlang kan thawveng hawk ang. Chutiang chu kan vengah phei chuan kan hre teuh mai. Kan dil ngat ngat a, hotute kan kawhhmuh a, chung te pawh chu ti thei lovin kan awm a. Mahse sorkar chuan pawisa neih loh chhuanlama hmangin min dang thin. Chutih laia mimal motor dahna tur siam nana pawisa heti zat zat theh chhuah hi thil kawngkal ni theiin a lang lo. 

Heng PAHOSS scheme atanga Garage an siam atang hian kum chuti zah chhungin motor dah man atangin cheng chuti zat an chhung lut tur a ni tih te hi awm tal sela chu a hriatthiam theih a. Chuti ni si lova hetianga mimal in sakna tur sorkarin a tumsak hi rorel dan mak tak chu a ni. Kawng han tihzauh lawkna tur cheng nuai hnih thum te hi kan nei lova, chutih laiin leiverh kan sawi thul, kawng chhawng kan sawi thul, mimal in sak nan cheng maktaduai tam tak kan seng leh lawi si a. Kan sorkar kalhmang leh kan sorkar pawisa ngaihtuah dan hian lirthei ngaihsanna a lantir lu deuh a ni. 

Chanchinbua a lan dan phei chuan PAHOSS hnuaia dawng tam ber chuan cheng nuai 150 a dawng e an ti a. Thingtlang khua, an khaw kawng pawimawh tak mai, cheng nuai li nuai nga lek senga thawm theih pawh pawisa awm loh vanga siamthat theih loh tam tak tan chuan heng thu te hi chu a na duh awm mang e. Vawkreka fate ang maiin a ti thei leh a ti thei lo, a nei leh nei lo, motor chungchang leh motor chungchang lo hi a inthlau deuh zawng a ni.