SORKAR HNATHAWK MI FELTE

May ni 12, 2019 (chawlhni) khan electric current kan tih mai, power supply hi kan nei lova, zing dar 9 vel aṭanga tlai dar 4 thleng nei lo tura puan lawk kan ni. Power Deptt.-in siamṭhat ngai lai an siamṭha dawn a, chumi avang chuan veng engemawzat chawmtu line chu an tihhlum lailawk a ngaih vang a ni.

Hetia chawlhni tak maia power kan han nei ta lo hi a lawmawm ka ti a, hmasawnna ropui tak niin ka hria. Chawlhni hian power supply hi titawp ta lo se chawlhni lovah an tihtawp a ngai dawn tih chu tute tihdan takah emaw pawl thum pass chin tan chuan a chiang reng mai a. Chawlhni lova power supply a awm loh chuan mipui tam takin an khaihlak phah ang a, hnathawh tur tam takin a chawlh phah dawn a ni. Lo chawlh phah ta se chawplehchilhin kan tuar ang a, chawplehchilha kan tawrhna bakah mihring tha luang ral (lost of man power) kha a tawpah chuan keimahni chungah bawk a tla leh ang. Hetiang tha luang ral ang chi, kawng tam taka chawplehchilh a lang nghal mai lo hi chu tam tak tan chuan a hriat fiah a har angreng a, kei tak pawh hian ka hrethiam chiah lo!! Mahse thil tha leh thil tha lo chu khuareiah a lang leh nge nge thin ang hian kan tha a ral chuan khawilaiah emaw hian kan tuar a ni tih hi chian a tul a, chutiang bawkin kan thawh that chuan engtikah emaw, khawiah emaw, a lo lang chhuak ngei ngei tihah hian chian a tha bawkin ka hria. Helai thu kal kual vel hi entirna dang nena han sawi thui zui a chakawm mang e. 

Tun hnaiah Power Department hi an fel riauvin ka hre ta a. Kan veng lama an fel vang nge ni ka hre lova. Kan veng lam bialtu Pu Enga te ang te hi a hunah chuan a rawn thawk chhuak mai a, a tul hi an ti mai a, an tihsual vang ni miah lova kan chhiat chang te hian an zarah kan eng leh mai thin. Kan venga kan Electric banah te hian Ramhlun veng lam mi te hi zan dar riat hnuah te an rawn lawn a, pisa chawlh ni, inrinni-ah te an rawn lawn fo mai. Heng mite avang hian hna kan thawk ve thei a, kan nunphung a pangngai a, buai lo leh chi-ai lovin kan awm thin. An theihtawpin an hna tur an thawk a, dik tak chuan kan babu leh babi lal pui pui leh hlawh tam zet zet, pisa ban dar a rik tawh chuan tek chhuak nalh nalh, hna thawk tur chuan peon leh thutna dup leh thingpui sen hang nena inkamki deuh chiai ngai tam tak te sorkar hnathawh dan leh heng hna rum thawktu fel te thawhdan hi chu khaikhin thiam a har ngawt mai. 

Power Department hi an khawngaihthlak hle hian ka hre thin a. Thil indaih lo sa semtu ang deuh ni hian ka hria a. A engamah hma hian Power-ah hian a ram pum hian kan han hnianghnar lo sa em em phawt a. Chuta chhapah hmanraw thar leia an lei te hi a chang chuan hmanraw hlui pui mai te hi a lo ni a. Chutah hmanraw thar pawh a quality tha vak lo chi te a lo ni a. Thuneitu lamin a chang chuan mamawh chiah loh te hi an han lei ruih mai a (Department tinah hetianga hmanraw chuang liam supply a awm chang te, thil hlui ni reng si a thar leia lei chang te leh a tha chi man zah emaw, a aia tam emaw a a chhe chi tak han lei fuh chat chang te hian supplier leh thuneitu tuemaw zing ami hi Setanan a lo kuangkuah kawp khuau thin tihna hi a ni duh khawp lehnghal), chutihlai chuan hmanraw mamawh (Transformer thar tha leh mamawh tawk, a bial chawm zo tur) te chu neih a har leh em em a. Chuti chung chung chuan a tak taka thawktute chuan hmun tam berah chuan thahnemngai takin an thawk a, mipuiten eng an neih lohva hrehawm an tihzia hi an hre hle niin ka hria. 

Kei hi (te han ti ve leh pawp mai ila), kum 2015 vel aṭang khan thawh hlima inbual thin ka ni a. Thil tangkai dang hre thei mang si lo hian ka inbual theih loh tum chu ka chhinchhiah thei zek a, tenawm tak ka ni. Chutiang mi ka nih avang chuan zing thawh hlima ka inbual theih loh tlemzia ka hre chiang a, kan veng chawmtu Transformer tum hnih a chhiat avanga ni hnih vel ve ve ka inbual theih loh bakah a chhan hriat lohva inbual theih loh chu ka nei meuh lo tih ka hria a. Hetiang power supply tawngchham karah a hmaa kan sawi Setana & co. (!!!!) te karah pawh kan la pangngai hlein ka hria a. Thahnemngai leh taima taka thawktu tute emaw engemawzat awm lo se kan Mizoram Electric hi a en meuh loh pawh thil awm thei a ni. Chung mi thahnemngai leh mi taima te zarah chuan kan eng a, hna kan lo thawk ve thei thin a lo ni tih han inhriat nawntir te hi a thawktute ai mahin mipui hian kan mamawh zawk law maw te ka ti thin. 

Chhun zana kan mamawh ngawih ngawih, electric hmangin entirna kan siam a ni chauhva. Sorkar hnathawk duhawm leh fel tak tak, kan mamawh loh laia kan theihnghilh vang vang, kan mamawh veleh a tlawn chikima tlawn hial kan duh, mahse tlawn ngai hauh lova an hna tur thawktute hi Mizoram hian kan ngah em em a. Hmanni a ka thu hriat pakhat phei chu engmah sawi lovin ka ngaithla reng a, he chanchinbuah daih hian thawitham takin ka’n sawi ang e. In hmun lam khawihtu a ni a, biak-in pakhat chu a hmunhma siamfelna kawngah thuneitu a ni a. Fel takin an siam a, biak-in te an sa a. Mahse a inkhawm ve duh ta tlat lova. A inkhawm duh loh nachhan pawh eng dang ni lovin an biak-in hmun chu fel takin an teh chhuak a, chutia an teh fel thlap tawhna hnuah chuan a sak tak tak hunah Pastor leh upahovin duham an lo chhuah pek a. Ani chuan, ‘Engtinnge ka inkhawm ngam ang? Dik taka thil titu tur ka ni a, mahse ka sulhnu ngeiah dik lo takin keima awmna kohhran ngeiin a titu dinhmun ka chelh lai ngeiin thil an ti a. Ka inkhawm ve ngam tawh lo,’ a ti asin. Chutiang khawpa mi rinawm te chuan kan ramah hian kan sorkar pisa an la luah a, a thlamuanthlak asin. 

Kan sorkar hnathawk zingah hian fel tak tak, dik lova thiltih chu hreh ngawih ngawih an la tam a. Dik lova thilti thin thenkhat, khap sen zawhzai si loh leh khap phak loh khawpa thil ti thei thenkhat te phei chu vanduainain a tlakbuak duh tih thu sawiin thenkhat phei chuan a mihring hming te hian an lam indawt zut zut thei a. Mi vanduaina leh chhiatna chungchang a nih avangin heng hming te hi awlsam taka hriat zung zung a, Whatsapp lamah te thehdarh chi a ni awzawng lova. Mahse kan pi leh pu hun ata tawh hetiang thila duham lo tur leh pamham lo tura inzirtirna te hi kan lo kawl khiauva. Vantlang zah tur hian kan lo inzirtir thin. 

Kan sorkar hnathawk fel tak tak te hi an hming sawi pawh a inthlahrunawmna chin a awm thei. An thawh anga thawk ve lo, hotute laka tlatlum fu fu leh thu veivir thiam tak tak te hi awm theih a ni a, chung mite chuan rilru nei ren rawnin an thawhpui fak hlawh deuh te chu thiam takin hotute hnenah an chanchin thudik chanve velin an han sawi a. Kan mi fak te tan chuan hrehawm tak a ni thei. Kan fakna aṭangin an vanduaina a intan chho beuh beuh ang tih hlauhawm tak a ni ve thei. Eng pawh ni se, kan sorkar hnathawkte zingah mahni hna rinawm taka thawk a, mipui tana chhenfakawm taka awm thin te avangin kan Zoram hi a nuam thin a ni tih hria ila. Chutianga rinawm taka thawktute zawng zawng chuan khawi lai laiah emaw ‘mi â’ nih pawh lo hlawh ula phur takin ât chhunzawm zel teh u. Mipui tithawveng lo zawnga fing te ai chuan mipui tana chhenfakawm zawnga â te hi Zoramin kan mamawh zawk a, an damchhung ni pawh an chhiar tluang zawk ngei ang.