PI ZOKHUMI THIHNA

Tun hnaiah tlem laia Pi Zokhumi thihna chungchanga Court rorelna thu chhuak a lo lang a, Aizawl mi pang­ngai tam tak rilru chu a khawih ngeiin ka ring. 
Pi Zokhumi kha nu fel tak mai, mi pangngai han tihah pawh nu vantlang chunglam, Mizo nu zahawm zinga chhiar tur a ni a. Amah a zahawm leh a fel bakah Aizawl mi hlun an nih avangin Mizoram khawpui ber Aizawl a cheng pangngai rual u deuh chu amah hre chiah lo pawhin a hming tal an hriat hle tur a ni a. Chu chauh ni lovin a pasal Pu J.Lalsangzuala kha kan politician neih zinga felfai leh nunze nghet tak nei, pa dam duam mai a ni a. Zahawm taka zu in thei, zu in thiam kan hriat zinga pakhat a ni. 
Chutiang taka nupa zahawm chu a pasalin a lo thihsan takah chuan pitar, an awmpui emaw, an nula te nen emaw maia awm an lo ni ta a. An in nuam leh zahawm takah chuan rawng taka thah ni ngeiin a lang a. An khawsak leh an awmdan enin misual nazawngin an hnaih mai ngam tur pawh niin an lang lo te pawh ti hial ila a sual lovang. Chutah an chhungte anga sawi theih, tunhma lama chanchin tha vak lo nei tawh chungah rinhlelhna a lo awm a. Amah pawh a inpuang vekin a inpuanna pawh police mai ni lovin khawtlang hruaituten an hriatpui ni awm takin kan lo hre leh zel a. 
Thil awmzia han thlir vang vangin thilsual titu hi zawn chhuah theih ni awm takin a lang a. Mahse police te thawh hahna zawng zawng leh beihna zawng zawng chu misual zawn chhuahna kawngah chuan a thlawn ta vek a ni ber a. Rinhlelh tur dang awm miah lo, rinhlelh ber pawh inpuang vek bawk siin India dan a, ‘Police hmaa inpuanna chu thu tlinga ngaih a ni lo,’ tih changchawi ringawtin thu chu a tawp ta der mai niin a lang a. A buaithlak hlein a lang. 
Tuin emaw bomb hmangin sangha an tihlum a, mahse a bomb-tu bomb lai erawh tumahin an hmu lo. Mi pakhat, chulai rama huan nei pawh ni si lo, tihtur dang sawi tur engmah nei lo chuan sangha bomb hlum sa chu a chhar teuhva. Chu lam kawngah chuan tumah an kal ve loh avangin tumahin chu sangha bomb hlum sa chu an chharpui ve hauh lova. Chuti a nih chuan eng dang mah ti lova sangha thi chhar tura chulai hmuna lo awm remchang chat mihring chu sangha bomb-tu a ni ang tih a chiang. Mahse, ‘A bomb lai tak hmutu an awm lo,’ tih vang ringawta miin thiam a chan theih chuan kan dan hi buaithlak tak a ni ngei ang. 
Pi Zokhumi kha khuma a mu lai thah a ni a. Rinhlelh kai zinga mi te chuan an awmna hmun, rinhlelh rual lohva midang kianga an awm thu an sawi a, mi rinawm tawkin an nemnghet vek a nih loh chuan Mizoram mipui thinlung hi a dam mawh ngawtin ka ring. 
Pu J.Lalsangzuala kha Minister a nih lai khan mimal thil ni lo, pawl thilah ka hmu ve zauh zauhva, chung velah chuan Pi Zokhumi kha a hmel te ka hmu ve a. Nu fel leh nu dam, nu rintlak leh nu invawng a ni tih a hriat hliah hliah mai. Keia hmuhdan mai ni lovin a veng mite ngaihdan leh a tunhma chanchin te han ngaihtuahin nu zahawm leh nu nun tluang tak, mahni inthununna fel tak nei a ni tih a chiang.
Khatiang nu zahawm leh chhuanawm kha a titu hriat lohva an khum laizawl a thi hlen mai tur chuan a pamhmai ka ti a, a lungchhiatthlak ka ti. Pu J.Lalsangzuala kha Mizorama Minister senior ber (kumah leh portfolio lamah pawh) te zing ami a ni thin a. Chuti chung chuan an in te hi an sa tha ve ut ut lova, hmun dangah picnic spot te leh huan lo ram te neiin an chei ve vak vak lova, an nun kha a nghetin a tluang ang tih a rin theih. Pi Zokhumi kha hetiang lam thila mi pamham leh duham deuh chu ni ve se an in leh lo te kha an Minister chhung khan a danglam hle tur a ni a. Mahse an in ngai rengah khan (ka hriat ve chinah chuan) an cheng a. An pa Pu J.Lalsangzuala pawh khan a tih ve fo thin ni awm takin chhangthawp te kha a Minister nih loh karah khan a hralh mai thin niin ka hria. Khatiang khawpa Zoram tana mi zahawm leh ziktluak nupui, Pi Zokhumi, han en reng reng pawha nu felfai tak mai kha a thattu hriat lohva thi anga ngaih kumkhua chu Mizoram tan pawh hian a tlawmthlak hlein a lang. 
Pi Zokhumi te thihna meuh pawh hetianga a thamral dawn a nih chuan a aia zahawm lo zawk leh mi hlun nihna kawnga chhuan tur nei lo zawk Mizoram mipui dang te hi chu kan chan a chau viau awm mang e te pawh a tih theih. Pi Zokhumi thihna hian ngaihtuah tur tam tak min chhawp a, a thattu hi chu zawn chhuah hram dan awm se a duhawm ngawt mai.