KAN SAWI LEH TAK LOH THILTE

Kan tih tur hi kan sawi nasa thei em em mai a. A bikin tuna kan Chief Minister phei hi chuan a sawi nasa thei lehzual a. A sawi tawh zawng zawng han chham chhuah phei chuan a tam lutuk a, a sawitu pawh kan thusawi dik loh vang ni lovin, sawi tur kan hriat hnem luat avang zawkin zahawm loh rawihna tham a ni.

Kan Chief Minister hian, “Kum hnih kum thum a’n ral chuan, ‘A lo nih hi maw le,’ in ti dawn,” a ti a. Hei kum hnih kum thum a ral a, ‘A lo nih hi maw le,’ ti ta lo chuan, ‘An sawi leh tak miah loh hi maw le,’ kan ti ta zawng a ni ber mai.

Nuai 3 : Inthlan hmaa thil sawi chian ber te zing ami, ‘Cheng nuai thum sem,’ kha tunhnaiah vantlang hmaah emaw, hmun dangah emaw a ri chhunzawm ta reng reng lova. Veng tinah nuai thum dawng hriat tur an awm hauh lova. Chutih laiin nuai thum aia tam daih daih dawng, mahni mimal in sakna tur atana sorkar vulhna dawng te chu an awm nual a. Chung zingah chuan Mizoram Legislative Assembly Speaker pawh a tel ang nawlh a. Nuai thum hrim hrim kha chu a reh ta vang vang mai a. ‘NLUP dawng tawh pawhin in dawng vek ang,’ tih te pawh kha Mizo tawng fiah taka sawi a nih kha. Eng pawh ni se MNF hi a sorkar a nih chuan cheng nuai thum sem an intiam angin sem ngei tur ni awm tak an ni a, an sem lo a nih vaih chuan sem tur thu sawitu khan DAWT a sawi a ni. A sem chu sawi loh a sawi pawh an sawi ta lo. Keima mimal tak chuan an intiam kha pawi ka ti a, an sem tak tak mai ang tih hi tun thlengin ka la hlau reng tho mai. Pawisa sem hrim hrim hi a that ka ring ve thei lova, ram dangin an lo ti a nih pawhin an tihdan leh an sum dinhmun te, an sorkar sum bawm te, an semna rilru te hriat vek phawt loh chuan tih ve mai tur chi-ah ka ngai lo. Congress khan nuai khat sem an intiam a, an sem nual a. Kha pawh kha a pawi ka ti a, Mizoramin nasa takin kan chhiat phahin ka hria a. Chumi hmain rangva sem an intiam a, an sem a, kha pawh a tha chuang lo. A thlawna thil sem rikngawt hi a tha lo hrim hrim. Chutih lai vek chuan sem leh tak lohna chhan pawh sawi si lo, chiang em em a, ‘Kan sem ang,’ ti si hi chu a tha lo lehzualin ka hria.

Thusawina lamah hian dawt deuh reuh, mahse dawt han tih theih chiah si loh, pawhfan theih deuh hi a awm ve a. Chutiang chu hmanruaah politician ten an hmang fova, a ngeiawm phian a. Mahse kan cheng nuai thum sem tur thu kha chu pehhelna awm hauh lova nuai thum sem tur thu a ni. A sawitu khan a sawi chiang em mai a, ‘A aia tam deuh kan sem,’ tih emaw, ‘An hnathawh a zirin,’ tih pawh a theih loh. Cheng nuai thum kha chu sem tur a ni. NLUP dawng tawh te chu lo pe lovin, ‘Kan hunin a daih ta lo a ni e,’ te lo ti ni se chu tlemin a ziaawm mahna. Mahse a dik chuang lo. ‘NLUP dawng tawh pawhin in dawng vek ang,’ tih thu kha a sawitu khan a sawi chiang em a ni.

Dawt min hrilhtute hi an changkan a, an dinhmun a san poh leh kan tan a pawi a, an ngeiawm zual thin. Mi thenkhat hi chuan dawt pawh sawi se han khing let dawn ila a khing lettu hi kan thiam lo zawk thei. Midangin min han ngaihtuahpuiin min han ngaithla a, ‘Ani thusawi te i awih te chuan a ni reng ang chu,’ an ti a, a tawp der mai. Chutianga dawt min hrilhtu tam tak chu an huatthlala lo viau thei bawk, a chhan pawh an thusawi kha innghah nan leh din chhuah nan emaw kan lo hmang ngai hauh lova, an thusawi kha a lian tham lo bawk. ‘Ka lo kal ang,’ tih a kal leh loh te, ‘Ka pe ang che,’ an tih a min pek leh loh te a ni a. Mahse an thil min pek tur kha a hun an sawi lova, kan tan thil awmze nei tham a ni lo fo bawk. Chuti ni lova dawt chiang tak mai, dinhmun zahawm taka dingin a sawi a nih chuan ram pum tan ngeiawm tham a tling ta a ni.

Mau : He nuai thum ang bawk hian kan mau pawh hi kan din chhuahpui tur thu hahipin sawi a ni a. Kan han ching fel ta zet zawt maw tih hnu, kum hnih kum thum a lo ral hnu hian mau chanchin hian sawi zui a hlawh ta lo talh talh a. Khati khawpa kan sawi a nih kha chuan a than that leh that loh te hi a hmunah en a, mithiam te kawi thlak a, a awm zel dan tur te pawh chanchinbua chhuah thama ngaihven zui awm tak a ni a. Chutiang thu chu sawi a awm ta lova. Chhuahchhalh ngat ngatin a phatna thu leh ilo tlem an sawi hram hram a ni ta hrim mai. Kan din chhuahna hnar tur ber ang a nasa em em a kan sawi kha heti taka a zuzi ta mai hi a mak a. Kum hnih kum thum a lo ral a, ‘E, hei kan thatpui dawn e,’ ti ta lo chuan a sawi loh lamah te, a en zui loh lamah te, a tih loh lamah te kan ramtang ta zat zat mai niin a lang.

Traffic Jam Free : Traffic Jam awm lohna khawpui siam kan tum a. North-East a awm chhun kan nih tur thu kan Chief Minister-in a sawi chiam chiam a. Traffic Jam chu motor kal tam luat avanga kal thei lova inhnawh tawt hi a ni a. Mahse Traffic Jam tihreh kan tum dan ber chu zan lama a dahna tur, a din laia a awmna tur buatsaih a ni a, chu pawh duhsak bikte tana kawngkal lo taka sorkar pawisa hmanna ni maiin a lang. Kan Traffic Jam awmna lai pawh chhunah, kawngpui tlangdung, Kulikawn leh Bawngkawn inkar hi a ni zual a. Hengah hian kawng sira motor dah avanga kan Traffic hi Jam a nih chuan heng hmunah hian motor dahna siam a, kawngpui huam chhungah reng reng chuan a dina din zeuh tih loh chu lirthei hun phal reng reng loh awm tak a ni a. Chutah pawh kan buaina lai chu a intawh khawmna lai zel hi a ni a. Mahse Traffic Jam tihreh nana kan motor dahna siamna chu veng hrang hrangah, a then phei chu Traffic Jam awm lohna hmun (Lungbial Vengah te) a ni ta a. A mak hlawm he haw ngawt mai. A thuhrimin mimal motor dahna tur hi sorkar ngaihtuah turah kan ngai ta ni tlatin a lang a. Traffic Jam leh a kaihhnawih thil kan ngaihtuah dan hi keini ang tan chuan hriatthiam a harsa viau a ni. ‘Traffic Jam free!’ ti a ring taka kan sawi kha a tawpah chuan mimal motor dahna siamnaah kan chhuah a, chu pawh sorkar senso hlirin!

Traffic Jam awm lohna khawpui siam han tum hluai mai kha tih sa loh tak niin a lang. Traffic Jam hi chu khawiah pawh a awm a, intawk zawnga motor tlan ngai hauh lo khawpa kawngpui leh kawtthler an neihna hmun Delhi, U.S leh hmun dangah pawh Traffic hi a Jam thin a. Keini, ruahman loh khawpui, kham pangah pawh in kan sak tawk tawkna hmuna Traffic Jam awm lohtir thei ang a kan inlantir duh leh kan insawi vak vak duh kha chu a tihchi loh tih chu chiang takin a lo lang ta.

Cheng nuai thum chu kan sem ta lo nasa phawt a, a sawi pawh kan sawi lova, sem turin a inbuatsaih pawh kan inbuatsaih hek lova; Kan ei leh bar dinhmun siamna tur ber anga kan Chief Minister sawi mau lah chu kum hnih kum thum a ral chuan kan hluihlawn ta mai nge kan sawi leh ngai ta lova; kan Traffic Jam tihreh tum lah chu a nasa tawlh tawlh a. Heng thu zawng zawng chiang taka a sawi lai ngei lanna video te hi thangthar lo awm zel tur tan Google account-ah te kan dah tawh mai loh chuan.