SILCHAR KAL THU

Kar hmasa hmasa leh mai khan Silcharah thiante motor hawhin intithei takin chakkhai dapin ka zu kal a. Aizawl - Kawnpui hi kawng hlui a ni a, a zim ang angin a chhiat dan a rualkhai deuhva, a chhiat belh chak viau loh chuan tha hlei lo, chhe lutuk lem lo a ni a. Ruahmanna lian tham deuh nen lo chuan siamthat vek chu a theih rih lovang a. Kawnpui aṭangin kawng a lo zauva, kawng tha tak, a siamna pawh la rei tehchiam lo a ni a. A then lai chu siam hlim te a ni a, a tha khawp mai a. A tlan a nuam khawp mai. Chhe tak anga lang si lo, a then lai mam viau, mahse tlan chak theih mang miah loh tura khawimaw lai lai lo chhe phoh phoh avangin a tha lai awm diai duai mah se a tlan a nuam lo. Tha tluantling tur anga ngaihah a chhe lai a awm reng mai a. Siam loh vanga chhia te chu ni law law se siam that chungchang sawiin kan au chhuak tur a ni. Mahse siam tawh leh la siam loh inphaman kual vel chunga kawng tha tluantling lo kan neih nachhan hi ngaihtuah a ngaiin a lang.

Kawng siam reng reng hian ‘Maintenance period’ a awm thin a. Ram dangte angin warranty period (a that rei zawng tur bitukna) chiah lovin a aiah ‘maintenance period’ (a chhiat a that vil hun chhung tur bituk) kan nei thung a. Kawng siam tawh anga lang, a nih ve dan ang ang leh a siam dan ang ang a kan kawng that lohna chhan leh tha lo anga a lan nachhan chu he a chhiat palh zeuh zeuh pawh a thawm tura a ‘maintenance period’ kan vawn dik loh vang hi ni berin a lang.

Kawng an han siam zova, kan han tlan a, a that chuan kan lawm a, nuam kan ti vawng vawng a, a thlen te pawh kan thleng thuai thuai a. Mahse, khawimaw lai a’n lo chhe leh zauhva, a chhe lo lai a that poh leh a chhe lai, tlan chak theih lohna lai awm kha a ngeiawm zual thin. Kawng siam hian air pocket nge engnge ka hre lo, reilote hnua lo durh a, lo tha lo lai bik hi a awm leh thin a. Hei chu a siamtute thiam loh ni tho mah se vanduai thil te pawh ni vein ka hria a. A then lai chu a hnuailam (sub-grade) lo that tawk loh vang te leh chhan dang dang (tui huh leh tui hnam) avang tein a awm thei. Heng tha lo kan han sawi te hi a then chu belthleng tiat te, a then chu chawhtawlh tiat te, a then chu tapchhak tia tein a intan chawk a. Heng kan han sawi ve tak ni lo thildang pawh hi a la awm ang a, kan kawng siamtute chuan heng zawng zawng hi an hre vek ngei ang a, keini sawidan tawngkam mawlmang tak tak ni lo hian an sawi thei vek ang. Hetiang hi thil awm thei a ni tih hriat sa a nih avangin a thawm thatna turin kan ‘maintenance period’ chu siam a ni ngei ang.

A buaithlak lai tak ni a lang chu ‘maintenance period’ kan hmang fumfe ta lo hi a ni.

Kawng siam tharah kan han tlan a, siam thar hlim chin chu a nuam em em a. Mahse thla thum hnu vela han kal leh chuan khawilai emaw a lo durh zauh zauhin a lo titoh deuhva, han siam mai se chu senso pawh awm fumfe lo khawpa te tham ni hian a lang a. Mahse thla thum dang hnua han kal leh pawhin kha kha a hma aiin a lo zau deuh mai a, a piahah a dang a lo awm belh a. Silchar kawnga Bualpui khawlai zawn vel phei chu kawng phel lehlam chanve siam tawh sa kha kum khat vel lai emaw a phel lehlam siam lovin an dahin ka hria a. A phel lehlam an siam hman hmain a phel lehlam kha a lo chhe leh hman ang tih hlauhawm khawp a ni. Mahse hei chu maintenance period chungchang ni lovin siam lai mek chhunzawm loh thu a ni thung a. Siam lai mek pawh heti khawpa rei kan chhunzawm loh theih chuan maintenance period a tihtur bituk tih chu a hla lehzualin a lang tih ka sawi duhna mai a ni.

Maintenance period kan vawng tha lo hi eng vang nge ni ang? tih chu kan zawhna neih a ni leh ta. Contract thawktute hian maintenance period tel vekin contract hi an chhang dawn tih chu a chiangin ka hria. Hna hmuh fel vek hnuah, ‘Tlawmngaih chhuahin a fuh lo lai deuh chu in lo thawm tha chhunzawm nia,’ tih vel mai mai a nih ka ring miah lo. Chuti a nih si chuan eng vangin nge kan contract a tel sa reng chu vawng tha ta lo em em nge kan nih ang? He maintenance period kan vawn that loh chuan tha vek anga lang si kha tha lo lai a awm reng a. A chhe hlui leh a chhe thar a inzawm put a. A chhe tawh sa zarah a chhe tharlam kha siam lohvin a awm a. A tuartu chu mipui, nitina kawng zawhtute kan ni.

Thil reng reng hian chhan a nei chawk thin. Kan maintenance period vawn that loh pawh hian chhan a neih ka ring tlat. He kawng siamdan leh enkawl dan kalphunga contractor ten sorkar emaw, mipui emaw min zah lohna hian chhan a nei ngeiin ka ring. Kawng siamtuten sorkar an hlauh lohva, an zah loh hian mipui kan zahawm ngawt thei tawh hauh lo. Maintenance period vawng lo tura sorkar an zah loh nachhan hi hriat a chakawm khawp mai. Kan sorkar hmasaah khan maintenance period-ah kawng siamtu company ten an tihtur an ti lova, kawng siamthat vek tawh a tlan anga ngaih ni siin kawng tlan nuam lo takah kan tlan kan tlan a, kan sorkar thar hian kawng siamtu company te hi maintenance period-ah an tihtur an tihtir thei em tih i lo en ang u. Tawngkam danga sawi chuan kan kawng siamtu company hi kan ngam hlei thei lo a ni. Khaw pakhatah chuan kawng siamtute chu khawtlang mipuiin, ‘In siam pan lutuk e, siam chhah deuh rawh u,’ an ti a. Kawng siamtute chuan, ‘Keini pawhin hetiang pan hi kan duh hlei nem. In hotuten siam chhah duh hek lo,’ an ti ta mai a. Khawtlang hruaitute chu an hawihai hle ni awm tak a ni. Hotuten lui hnar an chawk nu a, luimawng lamah mipui vantlang kan lo phun ve ni tlat hian a lang thei a. Kawng siamtuten kan Mizoram sorkar hotute an nel viau a, an ngamtlak viau a, mipui duh anga hna a that lohna phenah hian ‘awm’ hi a awm nge, vai company (te han ti thla ngawt ila) hian a nihdan tur anga kawng siam tum lo sa hrim hrimin Mizoram hi an lo lut tih hriat a chakawm khawp mai.

Hmun thenkhat laiah chuan kawng chhia kan helna lamah kan insu lek lek a. Kan maintenance period vawn loh avanga mipui hun riral te, hrehawm kan tawrh te hi a pawisain chantir ila a tam tham hlein ka ring a. A pawisaa kan hekna chhut chhuah theih ai chuan kawng chhiain kan rilru a dah hniam hi kan hekna leh a pawi lehzualna zawk niin ka hria a. Aizawl leh Silchar inkar tlan nana kan hun hisap a tam tak avanga kan inthlahdahna rilru pawh hi chhut tham fe a awm.

Kawng tha siam emaw, neih reng emaw hi thil har tak a ni tih chu a hriat viau. Kristian, kan Mizo pui te ngei pawh ar vena ven ngai an nih lai hian milem bia, an hna an thawh zawh hun huna haw daih tum te ven hna hi ngawrh taka thawh a ngaiin a lang a. Pindan chhungril leh Office aṭanga kawng tha tura tan lak hmasak a, a hnathawhna hmunah pawh a dik dana thawk tura enkawl theih a pawimawh hle. Kan kawng siamtute hi min nel lutuk lo tura siam hmasak phawt a ngai a, thlarau tawng chuan inhmuh leh inbiak fal nikhuaah kraws put ngat ngat a ngaiin a lang. Kawng chhia leh kawng tha hi chu chakai cher leh chakai thau ang maia inthlau a nih avangin kan kawngpui neih te hi tha taka kan vawn ve dan tur hi kan ngaihtuah ngei ngei a ngai a ni. Kan kawng siamtuten maintenance period an vawn loh vang ringawt maia mipui heti zozai (nitina Silchar kawnga motor tlan zawng zawng) kan hrehawm ringawt mai hi a dik thei lova. Silchar kawng chauhvah a ni lova, company kawng siam zawng zawngah hian a tha thei anga an thawh theihna turin Mizoram kan hmangaihna chu pindan ril aṭangin kawngpuiah lang chhuak se a duhawm mang e.