RUA vs RT-PCR

Hmanni lawk khan Ruatfela Nu khan hripui avanga Mizoram sum renchem a tul thuah Chief Minister titipui tumin a bei a, a hlawh­chham avangin a mang­angin CM hnenah Open letter thawnin Rawmi Tender cancel tur leh inrenchemna lama hma la turin a ngen a. Media lamah Samuel Fanai chuan a rawn khing let chiam a.

Tunhnai lawkah Pu Zodintluangan RT-PCR khawl bun thuai tura nawr nan Chief Minister hnenah ngenna lehkha a thehlut a. Pu Zodintluanga thu theh luh chu a thawm kan hre zui lova.

Hmanni lawkah Horticulture Department chuan lehkha chhuahin a pawimawh leh a hmanhmawhthlak em avangin rawmi chinna tur an vah diam tawh thu an chhuah a.

Health Department chuan tun­hnai lawkah RT-PCR bunna tur enfiah tura sorkarin mithiam a tirh te zingah Technical mi an lo tel loh avangin an rawtna chu pawm mai theih loh a ni tih thu puangin hri enna khawl hi an bun hmanhmawh lo hle niin a lang a.

2020 June thla khan Horticulture Department chuan raw chi khat, Brandisii lei nan Tender chhuahin chhangtu pakhat chauh a awm chungin Brandisii tiak chu a lei a. Brandisii chu Lengpui leh Hmunpui velah tiak nuai khat lai phun tawhin sawi a ni a. 2021-ah chuan Brandisii hluihlawnin Rawmi lamah a pakai ta thauhva.

2020 khan MLA Pu Zodintluanga chuan hripui vei enna khawl, RT-PCR chu Lunglei Civil Hospital tan a pe a. Mizoram sorkar erawh chuan USA atanga an chah mek thu an sawi a. Pu Zodintluanga khawl pek chu a dah ngaihna pawh hre lovin an phur kawi zak zak a, vawiin thlengin a bunna thuah kan la buai ta a. USA atanga kan chah chu a thawm kan hre zui ta lova.

Rawmi leh Brandisii atanga kan din chhuah hun tur hi tumahin kan sawi thiam lova, kan ngam lova, kan thlir thiam lo. Rua hi lo thang duang ta se engtin tak nge kan hlawkpui ang a, engtinnge kan hralh ang tih thuah ngaihdan kan nei lova.

Hripui chuan nitinin min luh­khung a, a kai thar leh a thi nambar a pung zawt zawt a. Rawmi leh Brandisii atanga kan din chhuah hun tur kan sawi ngam loh laiin hri avanga kan thih loh theihna dan tur pawh kan sawi ngam chuang lo. Rawmi tiak leh Brandisii tiak lei nana cheng nuai tam tak kan hman theih laiin kan damdawi-In chaw man te kan ba a, RT-PCR laboratory dinna tur sum erawh kan nei lo.

Heng thil inlumlet vel hi a mak tih mai loh chu sawi tur a vang angreng viau nain a mak nachhan te, a mak dan te erawh chu sawi fe tham a awm a. Rin thu dik sa thlap pawh hlam leh tangphel lai pawhin sawi tur nei kan awm ang.

Tichuan RT-PCR khawl kan bun hleih theih loh lai tak mai chuan Rawmi chu lei tur a lo ni ta a. Brandisii ang bawkin Rawmi chu thil vang leh a neitu bik riau awm a lo ni ta zel a. Mau hling nei a ni emaw, Brandisii a ni emaw, Rawmi a ni emaw, a mawng kilah hian mi pakhat hi thu tlatin mipuiin an hmu a. Lengte e, Bairabi e, Maubawk e, Ramhlun South e, Upper Khatla e a dang chuang lo - ‘Ama’n a rel kim e,’ tih hla ang mai a ni. Kan Open Tender chu Maubawk lam mi an ni emaw, Khatla mi an ni emaw, Lengte mi an ni emaw, an chhanna hi a’n inang tlang leh thap thap bawk a!

Kan thiltih dan hi a hmu thiam tana hmuh thiam awl viau si, mahse han tel ve dawna khirh deuh mai si zel a ni. Nunmawii te inlehkhaden ang maiin sa awmdan a zir zelin kan inden dan pawh thlak a ngai a ang ta tlat a ni.

Kan sorkar chuan thawh thumah mau chi hrang hlir chi thum min chinpui dawn ta. Chin hma­sak apiang hi kan ngaihsak lo zel mai ni te pawhin a lang. Kan Budget lam chu kan chawk kawi hneh ta viau mai a, Mau hling nei nge, Brandisii nge, Rawmi nge, a eng mau pawh ni se kan kang dawn nge, kan bai dawn nge kan tlak dawn a hriat a harsa viau.

RT-PCR hi hripui nena inzawm tlat, thil hmanhmawhthlak, Lunglei lam phei chuan a ngena an ngen ngawih ngawih, damdawi-In chhunga hun sa diam tawh a nih laiin hripui nena inzawmna nei lo, Rua zawk hi a nghakhleltu awm mang si lovin kan hmanhmawhpui em em a.

Eng pawh ni se amah Harry-a te thukhawchang takin, “I lo thlir zel ang,” ti leh phawt mai ang.