RT-PCR BUN THU

Hripui nen hian kan indo a nih ngai chuan Lockdown leh tawmim hi kan ramri venhimna a ni ang a, damdawi zawng zawng leh a behbawm, nat hnua kan inenkawlna te hi khaw chhunga kan inbeihna a ni ang. Sa leh ral thliar thei tura kan mit leh beng ber, RT-PCR chu Lunglei Civil Hospital-ah sorkarin bun a tum lo niin a lang.

Mizoramin politics zahthlak tak leh tenawm tak mai, mipui tana ngeiawm leh hautak zet mai kan neih pakhat, mi changkang awmkhawmnaa thil tih chi hauh loh chu midangte thiltih chhunzawm that duh loh hi a ni. He khaw chengker politics, ram leh hnamin kan tuar thin atang hian tuna kan sorkar hrawn mek hi a la harh chhuak lo ni ngeiin a lang. Mipuiin sorkarna changtu Party kan thlan duh loh tum hian, ‘Mi tih sa an chhunzawm a, anmahni ngaihtuah chhuah leh bul tan pawh a ni lo,’ kan ti ngai reng reng lo. He politics hrichhia avang hian hna zawh mumal awm lovin inthlanin a nang zel a, tun kum 30 chhung hian Infrastructure lian tham nei lovin Mizoram kan lo awm ta. Mizoram a sorkarna changtute kan duh loh chhan lian ber zawk chu midang hnathawh an chhunzawm vang ni lovin eirukna te, induhsakna hleihluak te, hmasawnna hnathawh dan awmze nei lo te, pawisa sem te a ni a. (A nawlpuia pawisa sem hian mi pangngai chin tan lawmna leh a semtu ngaihsanna a keng tel lova, sem tura intiam a sem leh loh lek phei chu....) Eiruk duh vanga hnathawktu (sorkar hnathawk leh contractor te) thunun theih loh vang te, mipui mithmuh a duhsakna hleihluak, a phu ngei ni lovin an dawng ni a kan hriat vang te leh dik lo taka sorkar pawisa hmanna kan hmuh avang te a ni bawk. Thil fel lo hmuh tur tam tak a awm laiin a nawlpuia thil siamthat kan beisei ang kan hmu lo thin a. Chumi avang chuan sorkar lai mek nin vangin sorkarna chang lo pawl lian, a hma pawha kan lo paihthlak tawh kha, ‘An ziaawm tawh ang chu maw,’ tiin kan thlang leh mai thin. Kan thlan lal te hi an that kan rin em vanga thlang kan ni ngai lova, kan hrawn lai sorkar kan nin em avangin kan duh loh paihthlak nan midang kan thlang mai zawk a ni.

Kan Chief Minister hmuh theih tawh te hi anmahni rilru a lo kawi ve hrim hrim nge an bul hnaia awm te’n an fuih khawlo nge, Mizoram Political Party mi leh sa te rilru hi a chawrche ve hrim hrim kan hre lova, mi bultan tawh sa Mizoram tana tihpuitlin ai chuan midangin hmingthatna an chan ve palh hlauh vangin thil tha leh Mizoram tana chhenfakawm tham tur pawh hluihlawn an ching. Chung zinga langsar zual chu Bairabi Hydel Project leh Luangmual Govt. Complex te a ni.

Tuna rorel lai MNF sorkar hmasa khan MIMER (ZMC) kha an sik sawm vek a, ar vulhna leh sap sikulah a chhuah a. Bawngkawn Traffic Point kha a lei fel vek hnuah (in/dawr luah man it vangin) siam leh si lovin an hun an hmang ral thak a. Heng thil pahnih hi Congress sorkar khan chhunzawmin damdawiin lian leh changtlung tak a rawn din chhuak a, Bawngkawn Traffic Point an rawn siam bawk. MNF rawn sorkar leh chuan a tih hmasak pawl tak chu MIMER tih chu ZMC ti a hming thlak a ni. Ar in atana an chantir tawh, sap sikul atana an chantir tawh hnu damdawi-In atana rawn siamtute mitmei venna leh an hming lo phuah tawh sa zahderna reng a awm lo. Mizoram kawtchhuah buaithlak ber Bawngkawn Traffic Point siamtha thei lo khan Zemabawk veng hmawr lun lo lai, Lungbial vengah motor dahna tur siam nan mimal hnenah cheng nuai 200 an pe a, Pitarte Tlang Stadium epah motor dahna tur cheng nuai 141 an pe. Kan buaina ber chu Kulikawn leh Bawngkawn inkar a ni a, chutah pawh motor tlan lai inhnawh tawt hi kan buaina a ni. Saiawna te puan pawp bel ang maiin a pawp lo lai an bel ni berin a lang.

Lunglei Civil Hospital-ah kan hlauh em em hripui enna khawl a awm sa diam a, kan Mizoram sorkar chuan hman theih tura bun lohvin hei leh chen hi a dah ta. Thil awmzia han thlir han thlir hian he sorkar hian he RT-PCR hi a bun dan tur zawng lovin a bun lohdan tur a zawng zawk a ni. He khawl hi bun tum tak tak ni ta sela thla khat chhunga bun theih loh tur thu a awm lo. Hripui len lai chuan thil hmanhmawhthlak ber chu hridan hi a ni a. Ramri-ah kan dang thei lo a nih pawhin tualchhungah inenkawlna kan mamawh. RT-PCR bun leh bun loh hian kan thih leh kan dam a hril.

Hripui hian min tuam rual vek a, mi state hian hri enna khawl dah nan in thar hlak an sak tak vek vang a ni lovang. A dah dan an ngaihtuah chiam a, an dah mai a ni. Mizoram sorkar hian MLA Pu Zodintluanga an ngei avangin chhim bial mipui tam tak thih an phal tihna a ni em? Pu Zodintluanga khawl pek sa an bun avangin MNF sorkar hi tunge an chak lo tiin dem ang? Pu Zodintluanga pek hi bun duh loh theihdan an neih kawng pakhat, tha chuang vak lo chu khawl dang pathum vel Mizoram sorkar hian leiin bun vek sela, ‘Hei chu a chuti khati,’ ti se chhuanlam mawihnai deuh a awm ve thei maithei. A dang pawh nei chuang si lovin a awmchhun bun duh loh hi hriatthiam chi a ni lo. Hripui hlauhawmzia leh a vei tawh si, hmuh chhuah loh an awm palh a khawtlang leh chhungkua leh hnathawktute buai rapthlakzia leh nunna thlengin a tawrh theih dan ngaihtuah hian mimal pakhat huat avanga khawl bun duh loh hi hriatthiam theih a ni lo. Kan thihna leh kan damna hriltu hripui kan dona kawnga kan thiltih dan hian politics hri chhia, mipui tana tha tur pawh ni se lehlam pawlin an hmingthat phah dawn (ni a kan rin) chuan tih duh loh tlat ngamna te a tilang a. Kan thih leh dam chungchanga politics game min khelhkhum ngam a nih chuan chhim bial mi pangngai tan chuan ngaihtuah fe tur a awm. MNF Party mi leh sa nih vangin hripuiin tumah a hlahthlem dawn lo. Chhim bial atanga thlan tlin ruling MLA leh Minister te tan chuan he thil hi chu ban phahna tham a ni. In bial mipuite aiawha ding in nih chuan inngaihtuah a hun e. In bang lo a nih chuan chhim biala Test ngai zawng zawng chu zan riak lovin ZMC-ah rawn phur thleng nghal vek ula, buaipui zui vek ang che u. Chutianga in ti leh si lo a nih chuan chhim bial, Lunglei RT-PCR chhawrtu tur zingah Covid19 hri hmuh chhuah har vanga thi an awm chuan an thisen mawh in phurh ngam a ngai ang.

“There must be a point you should not go beyond.”