HRIPUI LEH A NGHAWNG

Hripui a leng a, hei chen hi kan buai ta a. He hripui hian thil chi hrang hrang a rawn her chhuahpuiin a karah hian kan mizia tam tak a lang thei awm e.

Hripui a lo len a, kan mangan chiah hian kan Mizo nunphunga beiseina tam tak chu a rawn nung thar leh a tih theih ang. Thingtlang khaw tam takin an thlai te Aizawl lama mite ei turin an rawn phur lut zut zut mai han hmuh hian hnuk te a ulh thei hial a. Kan hnam hi kan lo la chhe vek awzawng lova, chutih a hnekin kan hnam nuna midangte duhsakna leh tlawmngaihna te pawh kan lo la vawng nung ṭha hle tih a lo lang a. Hei ringawt pawh hi tuipui tham fe a awmin a lang a. Hripui avanga chhiatna leh nunna chân te an lainatawm em em laiin hripui avanga he kan nunphung, keimahni a inphum reng lo lang chhuak kan hmuhna remchang a lo awm hi a ngaihnawm a, a hmuhnawm a, rilru a khawih a. Kan hnamah hian a nawlpui ang chuan beisei tur a la awm tih a tilang a. Kan Mizo zia anga kan ngaih, rinhlelhna thlipui nasa takin nasa taka nuai tawh chu hmuh theihin a rawn par chhuak leh ta tih hretu han nih hi a nuam khawp mai.

He hripui hian chhung­kaw tam tak chu a ṭha zawngin min sawi nghing ngei ang tih a hriat theih. Kan chhungkaw nunphung tam tak, chhungkaw inpawh lo leh tlaho ngai lo kha tam tak chu a kai khawm dawn tih hi a chiang reng mai a. Chhungkaw tam tak tan chuan thil hlu tak a ni ang. Kan hriat loh hlanin chhungkaw nun thar kan din mai dawn a ni. Tam tak chuan he kan chhungkaw nun thar hi a hriat pawh kan hre fumfe lo maithei. Mahse kan danglam ngei ang tih chu a chiang.

Thil ṭha a thlen rual chiah hian a hmang thiam lo tan chuan thil ṭha lo hi a thleng ve zel a. Chhungkaw tam tak chuan mut rei ‘policy’ an chher chhuak ang tih a rin theih. Chhungkaw invawnna zawng zawng dahṭha a hripui mawhpuhin chhungkuain inthlahdah ‘policy’ kan chher thar ang tih hlauhawm tak a ni. Hemi denchhen hian mut rei hi malsawmnaa ngai tlat kan nih chuan din chhuah chu harsa ve tak a ni tih thu te hi han sawi tel zauh ka duh hial mai. Zing lama rei tak mut theih hi malsawmna angah kan ngai emaw, changkanna angah kan ngai emaw, rualpawlnaah kan ngai emaw, milian khawsazia angah kan ngai emaw a nih hlauh chuan a vanduaithlak hle tawh sa hrim hrim a. Ka hriatthiam ve dan chuan zingah hian rei tak hi chhungkuain han hmu tlat mai ila, rorel hi a buai nak mai a ni tih hi a ni. A tho remchang apiangin chaw ei mai, a tho peih lo apiang mut reina chhungkaw tan chuan rorel fel tak neih a harsa duh viau. He hripui hian kan chhungkuaah mut reina a thlen chuan kawng tam takah khawtlang ang te, a hnam ang tein malsawmna hriat chhuahna hnar ni teh meuh mah se kan chhungkaw bil tan chuan hripui hian thil ṭha lo tak, chhungkaw thununna fel awm loh na ah min hruai lut kan ti thei ang.

Kan zirna kawngah kan zirlaite kuminah an pass ṭha hle mai a. A lawmawm rualin ngaihtuah tur a tam khawpin ka hria. Zir tur bituk chin a lo tlem tak avangin kan pass ṭha a ni thei a. Kan zirlaite kal zelna turah hripui len kum tak maia mark hmuh ṭhat te pawh thil awm thei a ni. Hripui len kuma ṭha taka pass, hripui awm tawh loh hnua inelna huang tak taka an zuan luh hnu a an awmdan tur hi ngaihtuah a ngai hlein ka hria. He mihring nun hi thawhrimna nasa tak leh beihna nasa tak hmanga chher puitlin a ni ṭhin a. Chutiang ni lova a awlsam lai nan fuh avanga hlawhtling anga lanna mai hi hlawhtlinna tluantling a ni lovang tih a hlauhawm. Hripui hnuaiah zirna hi kalpui zel tur a nih chuan hei aia ngawrh zawka beih dan leh awmphung kan inzirtir chhuah te a ngaiin a rinawm.

Kan sorkar mizia leh hawiher pawh a hriat theih nual mai. Hripui dona kawngah kawng tam takah an fakawm viau theih laiin Lunglei lama RT-PCR bun chungchangah mipui nunna leh hriselna aiin Party rilru an dah lian zawk ni tlatin a lang thei a. Nu leh pa chan chang tura ngaih ten hetianga thil an han ti ngam hi chu a hnam pum tan a mualphothlakin a thanatthlak hle thei ang. Hripui karah thildangah chuan rorel thiam a harsain tihdan ṭha ber hriat a harsa hle thei a, ngaihdan hrang hrang pawh a awm thei ngeiin a rinawm a. Mahse hripui enna khawl pawimawh tak mai, a dang nei chuang hauh si lova bun chungchanga an vuaicha langsar lutuk hi chu ngaihthiam a harsa viau thei awm e.

Mi ṭhenkhat chuan hripui len chhungin lehkhabu te an chhiar phah hle a. Hripui len vanga mut rei ngawt ai chuan a hlawk hlein a rinawm a. Ṭhenkhatin chuktuah huan an enkawl ngawrh sauhva. Ṭhenkhatin hmundanga huan lo ramah hna an thawh tam phah a. Mi tam tak chuan ṭangkai takin he hripui leh a nghawng hi an hmangin a rinawm.