KAWNG BAWK CHU

Whatsapp video pakhat a awm a, chutah chuan tlangval pahnih hian PWD kawng siam ni ngei tur, alkatra phah hi an pheikhawkin an chhhuih khawk hlawk hlawk mai a. Chutah naupangho hian alkatra phah sa chu an kutin an khawk a, pawnpui zialin an zial lo chauh a ni mai. Engkim mai chu rin aia awlsam vekin a khawk a, infiamna angreng, nuihzatthlak angreng, lungawithlak loh angreng fe a ni tel bawk. Hetia an tihna hmun hi Thenhlum khawlai niin a video vekah chuan an sawi. He video ka hmuh hian ka rilruah thil tam tak a lo lut a.

1. Tlem laia kawng chhiat thu leh kan veng kawng an siam uluk loh thu ka ziah khan PWD Officer thenkhat chu an rilru a na a, tlawmah an la a, keimah ngei pawh ti lutuk angin min hre hial niin ka hria a. Khatia rilru na leh tlawmthlaka ngaitu an lo la awm kha chu kawng lehlamah mi rilru tinatu angah inchanin hrehawm ti viau mah ila, a lehlamah chuan a lawmawm viauin ka hria a; kan thu leh hla te miin an lo chhiar ve tihna a nih bakah tlawmah te kan la lak a, kan lung te a la awi loh chuan kan that phah te pawh ka beisei a. Mahse tute tihdan takah emaw kan ziahna pen tui pawh a la hul tha hman lovang tih hnu lawkah khatiang thil a thleng leh thei ta mai kha chu a mak viau a. Hetiang video te phei hi chu kei Whatsapp pawh en tha peih lo, thiante nena inkawmna Group-ah pawh engmah ziak ve peih lo hnen a lo thlen ve meuh chuan Mizoram pumpuiah a darh vek tawhin ka ring a. A Department hian anmahni chhungkuaah insiamthatna turin inenfiah hna an thawk ang nge kha video thehdarhtu zawn chhuah lamah tan an la dawn a hriat lohva. Kan sorkar pawh hian khatiang thlalak te kha chu ngaih pawimawh viau awmah ka ngaih laiin kan sorkar kher hi chu a dawhthei em mai a, engmah a tih phei chu ka beisei tak tak ngam lo.

2. A Department lam ka ngaihtuah chuan khatianga hnathawktu kha chu an inzawn chhuah a, hremna lam te pawh an ngaihtuah a that ka ring. Veng thenkhatah tlangval thenkhat, veng dang mi tihbuai ching tak mai pahnih pathum an awm a, an intihbuaia an chan a chhiat veleh hian, ‘Chumi veng tlangval chuan kan veng tlangval chuti khati chuan min ti,’ an ti thin a. Chutiang hun a lo thlen tikah chuan thildanga khawtlang hruaitu anga inngai a, khawtlang aiawh tak tak ngai mang lo thenkhat hian an lo ngai thutak a, veng leh veng inep uaih uaih mai hi awl tak a ni. Mahse an intihbuai dawnin veng hminga intibuai an ni lova, an buaina kha veng thil engmah a awm lo. Zu ruih thu te, mimal incho thu vel mai mai a ni. Chuti a nih si chuan an buaina chu veng leh veng buaina anga chantir loh kha khawtlang hruaitute tihtur a ni a, an mimal buaina chu veng hminga kaltir loh tur a ni. Chutiang bawk chuan a Department pawhin an Department hnathawh dan kalphung pangngai a nih loh ngat si chuan a titute hi an malman tur a ni a, an hming an lam duh tur a ni.

3. Keini ang mi mawl pawhin kawng kha phiah fai hmasak tur a ni tih kan hria a, chutah alkatra tuia luan phawt hnuah a chungah alkatra leh rora chawhpawlh kha bel chauh tur a ni tih kha kan hre ve a. Kawng phiat fai lovin, a vaivut awm ang ang chungah khan rora leh alkatra chawhpawlh kha a pan thei ang berin an han pawngpaw chhun ta ni ngei tur a ni a. (Heta a pan tih lai tak mai hi a pawimawh hle a. JE/SDO thenkhat phei chu ‘Pu Panruala’ ti te pawhin an hming an vuah fiam a. A pan miau chuan a chhe hma a, a rual ve miau chuan en mawi a awl a. Pan si, rual bawk si-ah hian pawisa a awm tlat a ni.) A Department-in mawh an phur hauh lo a nih ngai chuan a Contractor, an duh loh dan leh an thu lo anga thawktu tal chu a let tam taka thawk tha tura tih ngei awm a ni.

4. Heng thil, tunhnua a thlen leh tawh hauh lohna tura hmalakna zawng zawng hi awlsam taka tih loh theihdan a awm a. A chung ler sang takah, khatiang thil a thlen pawha pawiti tak tak hauh lo ram hruaitu kan neih chuan engmah hi a thleng tak tak lo thei. A mualpho zual lai tlem an zut tha leh ang a, nui chungin an inchibai liam liam ang a, a zo der a ni mai.

5. Tunlai changkanna hi a nasa tawh a, mi naran hian tunhmaa kan suangtuah phak aia nasa thil ‘prove’-na hmanrua kan kawl ta vek mai tih hi hriat a va tha em! Hmanah kha chuan tlema thingtlang pilril deuhah chuan engtin pawh va khawsa ila, finfiah a buaithlak thin riauva. Chuvang chuan mi huangtau leh zaktheilo deuh chuan an duhdan danin engkim an ti mai thin. Mahse tunah chuan Whatsapp hmang te, facebook hmang te leh phone camera hmang te hian thil tam tak hi a vawrh darh theih a. A then laiah phei chuan a vawrh darh theih lutuk mah mah hi a buaithlak ta zawk hialin a lang tih thu hi ka’n sawi lang duh hram a ni. Thingphur tura kal te hian finfiahna camera leh a thawn chhuahna whatsapp hi an hnathawh kawr bal tak chhungah hian an ak khiau a ni tih hria a kan fimkhur tlan a ngai. Designation leh thla bi hlawh la ve ngai hauh lo, eng Interview Board mah la hmachhawn ngai lo tam tak hi Whatsapp leh Facebook khawvelah chuan keini aia vawrh darh thiam leh vawrh darh chak an ni thei tih hriat a tul ta khawp mai.

6. Whatsapp that em emzia chu heng thu zawng zawng ka ziah fel vek tawh hnu hian Whatsapp bawkah a hrilhfiahna ka zu hmu leh a. ‘A department-in mawh a phur hauh lo a nih ngai chuan....’ kan tih lai tak mai ang khian thil a lo awm a. A enkawltu Department mite hmun danga hna dang endika an kal lawk hlanin khatiang khan a Contractor, Vanapa Consultancy chuan an lo ti a ni awm a. A chhe zual lai chu metre nga vela sei ni awmin an sawi bawk a. Tun thawhtan kalta khan siamtha leh vek turin an inti ni awm tak a ni. An siamthat leh siamthat loh chu Whatsapp aṭang bawkin a hriat leh theih mai ang chu maw.

Eng pawh ni se tihsual ‘palh’ te hi chu awm ngai a ni a. Mahse a ‘palh’ lai tak mai hi hriat fiah a harsa ta thin a. A ‘palh’ hi a tam luattuk chuan hriatthiam sen a ni thin lova. Kawng siam chungchangah lek phei chuan a chhah zawng hi a lo pan ‘palh’ fai vek mai ang tih te pawh a hlauhawm hlel lo. Thildang chu thu hran ni se, hetah hian pawisa a awm tlat si a.