KAN THU VUAKTHLAK HI

Tunhnaiah Chief Minister vengtu tura ruat ten Sihphir tlangval pakhat kut an thlak chungchangah MPCC Media Cell chuan Media lamah chutiang engmah a awm loh thu an sawi ni awm tak a ni a. He thu hi ngaihtuah ngun a ngai viauin a lang.

Thil awmdan hetiang hi niin an sawi : Silchar lam aṭanga Lungdai pelh chho, Sakawrhmuituai tlang lawn chhohna kawngpuiah Chief Minister Escort Party chuan Truck te chi pakhat an umpha a, tlanpelh an tum a, engemaw chen pel mai lovin an inzui a. Chief Minister vengtute thin chuan a tuar ta lova, an inpelh theih remchan veleh chuan an ding lawk a, kut an thlak ta ni awm tak a ni. Chu thu chu Social Media lamah a thang kual zel a, Congress Party lama an Media Cell chuan thuthar thehdarhtute hnen lamah chutianga kut inthlak engmah a awm loh thu an sawi ta a, chanchinbuah pawh a lo chhuak zui ta ni awm tak a ni.

Kan Mizoram kawngpuiah hian Durtlang aṭanga Kawnpui dai, tunhma kawng hlui kha inpelh buaithlakna tam tak a awm a. A kawng a kikawiin a chhuk-chho ulh a, kawng hlui, tuihawk luankawr siam tel lova a kawng chhuat chauh siam zel a nih avangin kawng chhak lama tuihawk luankawr thuk tak tak a awm nual a. Chuvangin, chho zawnga rit phur inchhawm laklawh chuan buaithlak tak a ni thin a. Chu kawngah ngei chuan heng thil hi tunhnaiah a lo thleng ta a ni. Tunhma deuh phei kha chuan Driver-ho invauna tawngkam kha, ‘Kawnpui chhovah pass ka pe duh lo tawp mai ang,’ tih te, ‘Sakawrhmuituai chhovah ka pass lo tawp ang,’ tih te a ni thin reng a ni.

A enga pawh chu lo ni se henglai kawng chhovah hian dawh theih te, inhriatthiam te, hawihhawm hram hram te leh fimkhur te a ngai tlang khawp a. Dawhtheihna tel lova umphak apiang lehpelh tum mai chuan hma a kal apiangte chu thin tiur tham an ni zel a. A tlan chak thei lo zawk tan pawh remchang hmasa bera inlehpelhtir tum hi a hawihhawmthlak hle bawk.

An sawidan thenkhatah chuan Chief Minister vengtute hi anmahni a tlan, Chief Minister erawh kawng danga kal niin an sawi a. Chuti a nih chuan VIP vengtu ni chungin VIP an ven loh lai taka thil thleng niin a lang bawk. Hriat dan thenkhatah chuan Chief Minister hi hemi tum hian he kawngah ngei hian hetih lai hian a kal ve niin an sawi bawk. Hemi chungchangah pawh Chief Minister an veng emaw veng lo emaw hawihhawm deuh tak chuan an duh huna intlanpelhtir mai lotu chu tha takin hrilh se a zahawm zawkin a mawi zawk ngei ang a. Ram ralmuang lo leh hlauhthawnawmah phei chuan awm ila kut an thlak mai pawh hian sawi zui a hlawh kher lo mahna le.

Kawng dunga thil thleng leh sipai thisen lum leh motor khalhtute indawr dan chu eng pawh lo ni se Party thupuangtuten engmah thleng lo anga thu an thantir ta mawlh khan ngaihtuah a tithui. An intlan pelh chungchangah an inhmu thiam lova, kut an inthlak a, kut tuartu pawh damdawiin hialah luh a ngaih lai mekin Party lian thupuangtute chuan engmah chutiang thleng lo angin thu an thantir ta tlat a. Eng vanga khatianga ti kha nge an nih ang tih hriatthiam a harsa hle a ni. Politics ni a kan hriat hi khatiang te te kha a nih chuan mipui kan khawngaihthlak angreng hle mai. Eng vangin nge Party aiawhte khan dawt an sawi a, mipui kha dawt hmanga min chawm tak mai?

Sihphir Branch YMA lungawi lovin a hranpa ngatin thu an chhuah a. Kha Sihphir tlangval, an member, Truck khalhtu kha kut an thlak ngei a, damdawiinah a awm ngei tih thu ziakin an rawn tarlang a. Khatiang kha a nih si chuan engti kawngkain nge kutthlak lo anga an han chhuah tlat mai? A chhan ni thei ber turah chuan Mizo mipuite hi duh duh hrilh thiang angah an ngai tihna a ni phawt ang a. A dawt lehah chuan khatianga thu dik lo, lang chhuak mai thei leh hriat mai theih an sawi duh a nih chuan anmahni leh an Media Cell chuan zahawmna an neih loh avangin an zahawmna lam ngaihtuah tur an nei lo ni ngei tur a ni. Miin zahawmna hum tur an neih tlem poh leh zahawmna an ngainep thin tih chu tlang hriat a ni. Tun hnuah chuan MPCC Media Cell thuchhuak hi miin awih ngawt lo pawh ni se tuma’n thiam loh an chang lovang.

A thuhrimin a thu kal veldan hi a hnamchawm thu angreng riauva. Chief Minister vengtute chu sorkar hnathawk, police an ni a. Chief Minister awm loh hlana midang te kut an lo thlak a nih pawhin a Party emaw, Chief Minister-in emaw, sorkarin emaw mawh a phur ngawt thei lo. MPCC Media Cell te chuan ngaihdam dilin zangnadawmna lam te ngaihtuahpui se, Chief Minister pawhin ama mawhphurh ang hrimin ngaihdam dilin damlo kanna te pawh ngaihtuah se a that tehlul nen chuti ta lova, thu dik lo hmanga insawi fihlim tum kha a kalhmang a fel lo hle a ni. Khatiang tih duhna (dawt lang thei hmanga insawi thiam tumna) kan nei kha a fel lova, kan ti ta tak tak kha a fel lova, mipui zah lohna a ni ngeiin a lang. Heng vengtu police te hi an hum duh a nih pawhin an service lamah leh an duty tirna (posting) thuah hremna lek lo mai se tihdan dik a ni zawk ang.

Sap thufingin, ‘What one man can invent, another can discover,’ an ti a. Thil la awm ngai hauh lo pawh miin a siam chhuah theih chu midangin an hriatthiampui ve thei zel tho, tihna a ni. Awm lo ata hmuh chhuah pawh ni lo, thil awmsa leh kawngpui tlangdunga thil thleng, a tuartu pawh damdawiina mu reng bawk si Mizo mipuiin hre ve thiam lo tur ang maia min han ngai a, thu dik tawk lo hmanga thil thleng thup tum kha an bum tum mipui tan pawh ngeiawm tak a ni.

Kawng danga ngaihtuah zel phei chuan khatiang thil langsarah pawh miin khatiang thu a thehdarh duh a nih chuan sorkar sum leh pai chungchangah te, sorkar hmalakna biru deuh hlek chungchangah te chuan eng thu tak mipui hnenah hian sawi duh ang maw tih hi ngaihtuah tham tak a ni.