KEJRIWAL-A BAWK CHU

Hmanah khan ring lo mi-ah mah chuan India rama State ngaihawm lo pawl tak, Bihar Chief Minister, Nitish Kumar-a kan sawi vul chuk tawh a. Bihar te hi chu kan hriat ve theih chinah State nuam lo leh an ram that ang hu a hmasawn lo ngar ngar a ni a. Bihar State a Chief Minister hmingtha tak nih huphurhawmzia chu nasa ve tak a ni thei ang. Chuti chung chuan Bihar Chief Minister, Nitish Kumar-a khan a tha zawngin danglamna a rawn thlen tak chiamah khan kan sawi ta luih luih a ni. A hnu deuhah kan aia ropui pawha kan ngaih lem loh State, Tripura a an Chief Minister, Manik Sarkar-a kan sawi leh chiam chiam a. Tripura te pawh hnam inpawlh, a ram leilung neitu ni lo zawka ngaih, Bengali-in an awp beh tak, State hnufual tak thin kha an Chief Minister-in a rawn sawi danglam tak chiamah chuan ring lo mi a nihna te chu kan hmuh hmaih lo thei ta lova. Tripura State kawng te chu a lo mam ta zer zur mai a, an Chief Minister rimtui thu te, incheina Suit kawr leh kekawr a ngah thu te chu kan hre hauh lova, a sawi pawh an sawi ngai hek lo. Manik Sarkar-a phei chu a inchei loh thu te, a retheih thu te leh auto ricksaw a a nupui chuan thin thu te nen lam kan sawi a. A hmel ena a tlawm avang leh a khawsak mawl avang tea teh tur ni se Mizoram Chief Minister te kiangah chuan thu ve ngam tur pawh a ni lo. Mahse Manik Sarkar-a chanchin kan sawi lo thei lova, ring lo mi mah ni se Mizoram Chief Minister ni se, kan kohhran mi pawh ni lo sek sek se lawm taka pawmtu tur kan kat nuk ngei ang. Inchei nalh te, inkhawm taima te, changkan hmel te leh Chief Minister hausa pui pui, kan kohhran mi ai chuan ring lotu kha kan chunga rorel turin kan mamawh zawk deuh tlat mai a ni. 

A engamah hmaa ‘Kejriwal-a bawk...’ han tih ngawt te pawh hi a kawngkal lo viau thei a, mahse kan tehna ber, ‘Kristianna’ aṭanga thlirin Kristian lo Chief Minister chanchin, keini Kristian em em maiin kan sawi kan sawi ta mai hi keia ngaih chuan a mak a. Kristian lo Chief Minister chanchin bawk kan sawi dawn emaw, kan Chief Minister te nena kan khaikhin dawn emaw a nih chuan ‘bawk’ hi a tel a tul tlatin ka hria a ni.

Tha leh tha lo hi khaikhinna aṭang veka lo chhuak a ni a, keini tehfung zawng zawng chu Kristianna aṭanga intan vek a ni kan ti lo thei lovang. Kan Chief Minister hrawn mek phei hi chuan Kristianna hi a ngaisang khawp a niang chu a Chief Minister nih hmasak te pawh khan chawlhni zinga biak-In dar ri han inchhawn tluah tluah mai hi a ropui a tih thu a sawi ka hria a. Chubakah Mizoram chhunga a zin vahna lamah pulpitah te pawh lawn ve hial a ni. Kan Chief Minister kal liam ta lah Kristian Institute pakhatin Doctorate Degree a pek a lo ni a, chu chauh ni lovin Sunday School zirtirtu kha engemaw chen a ni bawk a. Hengte avang hian kan ram hruaitute chu Kristian tak an ni. 

Heng kan Chief Minister te pahnih hunlai hian ring lo mi, Pathian nung pawh be ve lo, milem bia ngaiin Mizoram ringtute hi kan rum thin ni chek tur a ni. A chang leh Nitish Kumar-a kan ngai a, a chang leh Manik Sarkar-a kan ngai a, tunah Kejriwal-a kan ngai leh tawh a nih hi. Nitish Kumar hi eng angin nge a inthuam thin pawh hre lovin a hnathawh an sawi hi ka lo hre ve a. Manik Sarkar-a leh Kejriwal-a te erawh an inthuamna an sawi ka hriat leh TV lama ka hmuh te aṭangin kan Chief Minister te ai chuan an incheina man a tlawm fe tih ka hmu. Kan Chief Minister hmuh phak te kawr suit leh incheina rimtuizia te ngaihtuahin Chief Minister inchei lo deuh te pawh hi hrawn ve an chakawm thei rum rum mai. 

Kristaa unau theuh theuh min inenkawl dan ni awma kan hriat han ngaihtuah hian rilruin ar bo a zawng lo thei lova. Sum leh pai chhekkhawl dan thuah te hlei hlei hian ngaihtuahna a buai zual. Lal Isua tana thawh hlawk (a ni ber law maw ka ti mai a) vanga Degree dawng meuh hnuaia kan manganzia kha ka theihnghilh ve mai thei lova. Politics thila zin vahna lamah pawh kan Pathian thu ‘sermon’ zar zar thei khawpa hre bel thusawi awih kan inpeih lohzia hi ka ngaihtuah lo thei lo bawk. Amah ka pu Sangzuala pain, ‘Ngaihsan che chu ka duh a, tan pawh ka la nasa, mahse ka hlawhchham a ni,’ a tih angrengin kan kohhran huanga kan chanvo te han thlirin mak tih loh theihdan kawng hrang hrang han dap mah ila mak tih tur hi a awm leh thin. 

Mizo ten khawilai Chief Minister emaw kan ngaisang ngawih ngawih zel mai hi a hrehawmna a awm a. Kan hnam, Mizo, kan chhuan ve em em leh kan hruaitute han thlir a, kan tlawmngaihna nun mai ni lo, kan Kristianna han ngaihtuah hian a tlawmthlak ka ti thin. Nalh taka inchei chungin, chawlhni apianga inkhawm chu sawi loh kohhrana chanvo nei chungin, milem bia kan tih Kejriwal-a te kan han ngaisang lo thei lo chu a nia le. Amah Kejriwal-a ka lawmpui tehlul nen a hnam anga ngaihtuah chuan a tlawmthlak chu ka ti khawp mai.