NLUP KUTPUI

NLUP Kutpui kha hmuh a chakawm thu ka sawi a. Ka va hmu ta ngei a, ka beisei a phak lo ngei bawk.

Ka beiseina : Kan sor­karin hmalakna bera a neih, ramdang mithiam­te pawhin rawn en se sawiselna tur an hriat loh tura kan Chief Minister-in a sawi hial, pawisa tam tak senga kum engemawzat an lo buaipui tawh chu ka beiseinaah chuan kan hmuh Kutpui ai kha chuan a sang turah ka lo ngai a. Ka beiseinaah chuan thingtlang leh hmun dang aṭang pawhin NLUP avang liau liauva mi hlawhtling, ‘E, keini chhung tan chuan NLUP hi a awm lovang tih a hlauhawm asin; a hmaa engmah ni lo kha heti hian kan lo awm ve ta a ni,’ titu, hlim leh lawm hmel tak tak engemawzat hmuh ka inbeisei a. NLUP avanga hlim hmel leh an din chhuahna thawnthu lawmawm tak tak, phur taka sawitu mi sawmhnih khat mai pawh ni lo te pawh awm se mak ka ti hauh lovang. Chhungkaw nuai khat leh singthum zet mai hnena dinchhuahna tur sum sem ta chu hlawhtlinna hmel engemawzat ka beisei a ni. Dik tak chuan mihring hi han awmkhawm ila, mi tumruh tak mai te, mi sual ve angreng fe mai te, taima leh dikna ngaina tak mai te hi an lo awm ve nawlh nawlh zel a. Mizoram chhungkaw nuai hnih zet zinga nuai khat leh singthum tlawng mai, hlawhtling tura tanpui ta fam chuan thawnthu ngaihnawm leh phurawm tak tak a hring chhuak ta sela mak ka ti lovang. Sorkar Department lam hmel hmuh ka inbeisei lo hle.

Ka thil hmuh te : Ka hmuh tam ber chu sorkar Department Stall a ni a, Agriculture, Horticulture, Industries, A.H & Vety leh a dangte a ni a. NLUP Kut a tel awm lem lo Johnson Diesel leh Agriculture Implements zuartute ka hmu bawk a. Zufang/Zupui dawr pahnih ka hmu a, mahse a lo ruak ve ve tawh a. Se sa ka hmu ve pha lo bawk - ka kal tlaiin ka hnufum deuh te pawh a ni mahna. NLUP-ah zufang emaw, zupui emaw kan telh a nih chuan keima mimal chuan ka lawm angreng phian a, a tuitling tha kelh kawlh te pawh lo tel mahse inthlahrung deuh takin ka lawm hial awm e. Mahse kei ni lo, kan kohhran rilru te leh midangte rilru sukthlek ka ngaihtuah erawh chuan a mak ka ti deuh. Dawr pakhata an thil zawrh ka zawh chu engtik aṭanga an lo tih tawh nge tih ka zawt a, NLUP chhuah hma, kum sawmthum vel aṭanga an chhungkaw eizawnna lo ni tawh a nih thu min hrilh a. Chu chauh ni lovin, ‘NLUP hi awm ta lo se he thil hi hetiang tho hian in ti ang em?’ tih ka zawh chu min chhang mai lovin min en a, an nui phawt a, chutah, ‘Ti thove. Mahse pawisa chu kan dawng alawm,’ an ti. NLUP avanga ding chhuak chu an nih loh hmel viau. Dawr pakhatah pawh an thil pho chhuah chu NLUP tel lova kum tam tak an eizawnna a lo nih tawh thu min hrilh bawk a. NLUP avanga ding chhuak pawh an ni lova, pawisa erawh an dawng ni mai awm tak a ni. Chipchiar lutuka han inzawh kha a nuam lo thei a, an hmel aṭangin NLUP avanga ding chhuak liau liau leh NLUP chu hlimpui ta viau hmel an pu lo khawp mai. Dawr pakhatah erawh chuan NLUP avanga hmanraw chi hrang hrang an siam chhuah nasat thu min hrilh thung a, mahse an pawisa dawn zat erawh min hrilh duh lo thung. A tam thawkhat a ni ang tih a rin theih. A enga pawh chu lo ni se khatianga thil tangkai chi hrang hrang an lo siam chhuak kha a lawmawm e.

Kum sawm aia tam chhunga Mizoram sorkarin thapui thawh a mirethei, lei rem rap ve lo te (kan hotute tawngkam takin) te dinchhuah nana a vauchher lian ber leh vaibelchhe tam tak bakah sorkar Department hrang hrang a hmanna enin khati kha kan pho chhuah theih tawk a nih chuan ropui ka ti ve lova, nasa ka ti lova, tam ka ti lo bawk a, hlawhtlinna hmel anga ngaih tur a nih chuan a manganthlak lu hret zawng a ni.

Khai ve aw : Mi tam takin, ‘NLUP hlawhtlinna anga an sawi hi chu mi hlawhtlin tawhna thla lak khawm leh a hlawhtling sa te puihna hi a ni mai. An sem pangngai leh a dawngtu tam ber dawn hi chu engmah a ni lo, vote zawnna mai a ni,’ an tih hi a dik viauin ka hmu a. Chanchin pakhat ka hriatah phei chuan mi pakhat chu ‘I serthlum huan thla hi kan la ang a, NLUP hlawhtlinna angin kan tar chhuak ang a, cheng nuai khat i dawng dawn nia,’ tiin an va pan a. Ani chuan, ‘Ekhai, ka duh teuh lo mai. NLUP tel lova hei chen ka lo tih tawh chutianga tih chu ka duh hauh lo mai,’ tih thu ka dawng a. Min hrilhtu phei chuan chutia titu hming leh awmna khua te pawh min hrilh thlap bawk. ‘NLUP pawisa tel hauh lova mi hlawhtling te kutchhuak,’ tiin tun tum Kutpui a an pawisa senso zah chiah kha min pein min huaihawttir ta se kha aia hlawhtlinna thawnthu ngaihnawm kha NLUP dawng hlek lo ho aṭangin ka phawrh theih ka ring rum rum mai. Kha Kût a inpho chhuak tur te kha eng tehfung mah awm lova a duh duh tel theihna ang hial a ni chungin a ropui lo hle. Vaibelchhe heti zah hmanga sorkar pakhat ve lemin hei chen a buaipui a nih chuan a tel duh leh tel chak te hi inhawr tup tup a, inrinni bazar ang maia intlar nghek nghuk awm a nih laiin NLUP awm hmaa lo bei tauh tauh tawh te, NLUP dawng lem lo te pawh kan telh ta nawk nawk a nih kha.

Hmuh hi chu awih mai kan hmabak : Kha Kutpui kha State pakhat a sorkarin kum sawm chhunga a hlawhtlinna hmel lanna a nih a, kan lawm viau a nih chuan kan hlawhtlinna thawnthu chu a tawngchham dawn hlein ka hria. Dik tak chuan tawngchham lo hlei thei pawh a ni lo reng a, in awmna vengah theuh khan a hlawhtlinpuitu hmel han zawng ve teh u, rin aiin hmuh tur a vang. A dawngtu hmel chu veng tinah leh khaw tinah hmuh mai a harsa lo vek a, a hlawhtlinpuitu hmel erawh zawn taimak ngai tak a ni.

Engpawh ni se kan hotute thlirdan leh sawidan te hi Kristian pangngaiin kan hmuh phak aṭanga kan han thlir hian a dik thei ta tlat lova. A thlan dan aṭanga dik lo, chhung khat aṭanga dawngtu pahnih awm te a ni ta nawk a. Veng tin leh khaw tinah, ‘Hei NLUP an dawng a, an chuti leh si lo,’ tih thu te pawh hi tuma’n kan sawi buai peih tawh lo. Chutiang bawk chuan, ‘Anni zawng NLUP an dawng a, eizawnna bul tanin an heti ta bik a nih hi,’ tih tur a vang phian mai. A endiktu tura ruat thenkhatte pawhin, ‘Endikin awmzia a nei lo, dawng zui tlak lo tih kan hriat reng pawh an dawn zuitir tho,’ an tih hial khawp a ni chung pawh a, ‘World Class Education’ ang deuhva ramdang mithiamte pawhin tha an tih tur anga kan sawi duh tlat tawh chuan kan NLUP Kutpui te pawh, ‘A hlawhtling e!!’ kan ti leh duh mai awm e.