KAN TIHDAN CHUH....

Kar kalta maia Assembly Session a sawihona hunah eptu MLA ten NLUP dawngtu tur thlang tura Congress MLA te hriattir an nih bik thu an sawi chhuak a. Chuta Agriculture Minister chhanna chu, “Eptu MLA te chuan NLUP in tuipui ve lova, chuvangin hriattir in ni ve lo,” tih ang a ni a.

Sorkar pawisa ni lo, Congress Party pawisa chu ni se he chhanna hi a mak lova, mahse sorkar pawisa a nih si chuan he chhanna hi a ngeiawm a, a dik lo hle a. Kan rorel lai sorkar hian mipui min zah lova, min tham lo hle tihna angah kei chuan ka ngai.

Eptu Leader khan Session kal mekah, ‘Kan Budget hi inthlan a chakna tura siam a ni a, hmasawnna tura siam a ni lo,’ ti ang deuh khan kan Budget hawi zawng hi a sawi chhuak a. NLUP chhunzawm nana vaibelchhe 80 kan sorkarin a dah hi an mi duhzawng te hnena Congress MLA ten an sem atan an dah tihna a ni ta ber a. Chu pawh chu thup tum buai tawh lovin khati khan Assembly House-ah meuh an sawi chhuak ta tihna a ni a. Kan Mizoram pawisa, mitin hmasawnna tura hman tur vek atang chuan Congress Party chuan an tamna chhuangin cheng vaibelchhe 80 (cheng vaibelchhetak riat, chu chu cheng nuai sangriat) zet chu an duhsak zawng zawng te sem kual turin an nei ta tihna a kawk raih mai a. Hemi hmu thiam ve hauh lo tur emaw, hemi ngaimawh hauh lo tur emaw a mipui mimir hi min beisei a nih chuan kan inhmuh tawn dan hi a mak hle dawn a ni.

Tunhma zawng kha chuan, ‘In induhsak bik em mai,’ tih te kha tawngkam dengkhawng tak leh House chhunga inhauhna tawngkam a ni ngai a. Tunah zet chuan kan House chhungah, mi zawng zawng hriat theih tur leh kumkhuaa ziaka awm turin, ‘Keini Congress chu sorkar pawisa hmangin kan invulh ang a, inthlan leh tikah pawh mipui hi pawisain lei kan tum,’ kan ti lo chauh a ni ta ber mai. Kan sorkar hrawn mek hian sorkar pawisa, mipui pawisa hi engti tihin nge an nawm an mak a hmang a, mipui hian ngawi renga thlir tlawk tlawk ringawt tura min beisei tak mai chu le?

NLUP a ni emaw, sorkar hnathawk hlawh a ni emaw, tui bill a ni emaw, sorkar sum bawma mi zawng zawng hi sorkar pawisa a ni vek a, a enkawltu chu sorkar a ni a, kalphung neiin an enkawl tur a ni a. Mipui zingah a bika enkawlna dawng an awm tur a ni lo. Presbyterian an duhsak bik thiang lova, Ralte an duhsak bik thiang lova, Congress an duhsak bik thiang lo. Mahse sorkar fawng vuantu an nih avangin thiam tak leh sawisel hleih theih lohva thil an tih chuan sawisel a buaithlak a, finfiah a har fo thin a, an duhsak zawngte chu rorelna fawng vuantu apiangin an vulh thin tih kan hria. Mihring kan nih a, a hma lama min lo duhsak tawhtute duhsakna chhan letna te a nih chuan a hriat pawh kan hrethiam a, uchuak lutuk leh hleih nei langsar lutuk a an ti te a nih loh chuan khawvel mipui pawhin an pawmpui thin. Amaherawhchu mihring rilru (moral standard) a hniamna hmun apiangah an roreltute an zakthei lovin an huangtau a. Hmun thenkhatah phei chuan an duhdan apiang tihlawhtling turin a sawiseltute thlengin an vau bet a, kut an thlak thin a.

Kan Assembly House-ah meuh khatia kan sorkar hnarkaituten an ti ngam a, an ti duh a, an tih ngei tawh bawk si chuan Mizoram mipui chuan Congress nih ve vek tum mai loh chu pawisa kan duh ve a nih si chuan hmabak kan nei ta lo. Mahse Congress lo vek chuan na taka kan do a ngai ta hle mai tihna a ni mai em? Luhkapui tlangsang atangin a hnuaia mipui thukhawm chu kan khaw tlangval sual huai te chuan min rawn zunkhum a nih tak ber hi. An zah loh avang ringawtin an thiltih hi a mualphothlak lo tihna a ni lova, ngawi renga kan lo tuar ta a nih pawhin rilru erawh neih a hun viau. Pawisa chu an duh ang tak chuan zak hlek lovin han theh vir kual teh se, a tawpah chuan mi taima leh remhria te kutah bawk a lut leh ang a, mahse an khawsak dan erawh kan hre ve reng tawh thung ang.

Hetiang em em hian kan ram hruaitute hian Mizo mipui hi min zah lovin min tham lo thei ang tih hi ka lo suangtuah pha lova. Thiam takin, fing takin an ti ang a, sawisel pawh a invenna nei tlat chunga an tih chuan sawiseltu nih pawh a buaithlak tlat ang tih te ka lo suangtuah a. Mahse khaw eng leh mipui hmai eng zahna nei hlek lova hetia kan mipui pawisa, an duhsak zawngte chauh hnena sem tura an inpeih fel tak viau si-ah chuan an rilru leh khawsak chu a langtlang ta vek a. Chuvangin ngaihdan neih pawh mi nawlpui tan chuan a awl ta viau zawk e.