AIRPORT LEH A CHHEHVEL

Mizoramin Airport pakhat kan nei a, a lawmawm ngawt mai. Kan airport neih ve hmaa hmundanga zin thin te tan chuan airport kan neih hnua kan lo changtlun takzia leh a lawmawmzia hi a chiang lehzual a. Lengpui airport kan neih hma, Tuirial atanga thlawhna tê chi a zin chhuah te kha a buaithlak angreng a, duh hun hunah hian min thulhsan mai emaw tih tur kha a ni a, ticket neih vek tawh hnuah pawh ngaih kha a ngam chiah chuang lo. Chutiang hun lai leh Tuirial atang pawha kan thlawh chhuah theih hma hun te lo tawng ve hman tan chuan tuna kan dinhmun pawh hi lawmawm tak a ni.

Tuna kan awmdan hi tunhma ngaihtuah chuan thlawhna lam thuah chuan lawmawm viau mah se duhthu sam belh tur a la awm nual mai tih thu Pu K.Thanhliran a sawi a. Chung zinga thenkhat chu :

1. Aizawl leh Lengpui inkara bus tlantir chungchang : Tunah hi chuan Lengpui Airport a kal tur leh Lengpui airport atanga haw tur hian mahni motor emaw, Taxi emaw a kal a ngai a. Lengpui leh Aizawl inkar Taxi chuan man hi a to deuh chuan a lang. Keini ang duang chu kan chuang tha ngam meuh lo. Taxi leh a chhehvelah hian thil eng eng emaw a la awm zui lehnghal a, a zialo hle pawhin ka hre bawk. Kan Taxi rate hi sorkar pawmpui a ni nge ka lo hre pek lova, sorkar rate a nih pawhin a to deuh chuan a lang. Taxi driver thenkhat chuan mi thenkhatin Airport atanga an duhsak zawng te leh an lainat zawng te pawh an private motor a phurh haw te an phal lo hial tih ka mitin ka hmu a. Zia lo leh zahthlak tak a ni. Eng pawh ni se hetia man to tak maia Lengpui airport atanga Aizawl pan ngai tura kan awm hi mi tam tak tan a hautak hle mai a. Thlawhna a chuang zawng zawng hi neih viau vanga chuang an ni vek lova, tam tak chu mamawh ngawih ngawih vanga chuang an ni. Chuvangin tlawm zawka Lengpui atanga Aizawl thlen theih dan tur hi ngaihtuah a tha khawp mai. Mimal tu emaw hian taima deuh leh tuarchhel deuhvin (a hlawk hun hma a awm ngei dawn a), Hunthar leh Lengpui inkar Bus service hi siam sela a thain a lang. Bus service a awm tih mipuiin kan hriat fuh hunah leh rin tlak a ni tih kan hriat hunah chuan zin tur inthlah buai kher emaw, a hmun atanga inlam kher emaw hi a ngai lo thei ang a, thlawhnaa chuang te tan a thawventhlak hle ang a, mipui tan a hlawk hle ang tih a rinawm. Tuna kan awmdanah hi chuan zin hi Lengpui leh Aizawl inkar avang hian a la hautak lehzual deuhve.

2. Inthiarna : Lengpui Airport pawnah bazar angreng a awm a, inthiarna a awm mumal leh vak lova, hei pawh hi ngaihtuah a tha khawp mai. Airport hmun thenkhatah pawh inthiarna a awm mumal lo ve maithei a, mahse hmun dang nen inan lohna kan nei. Hmun dangah chuan hetiangin Airport kawt, Airport huamchhung bak chiah chiahah thingpui dawr te, thlai zawrhna te a intlar ve thep thup lo. Keini chu leicharah nen, dawrte bathlarah nen bazar kan han din leh mai a. Lehlamah chuan a tha hle pawhin a lang. Mi airport huamchhung leh a pawn vel nen kan inang tlat lova, chuvangin mipui inthiarna tur hi chu a awm a ngai a ni. Mi airport ang khera siam ve tum pawh a tul chuang lova, kan tihdan ang pangngai hi thianghlim leh nelawm takin siam mai ila kan thatpuiin a rinawm.

Theih phei ni se a pawna dawr te hi felfai deuh leh inang (uniform) deuhva sak ni nghe nghe sela, kan airport a cheimawiin a nuam sawt ang. Bank nena tangkawpin emaw, tihdan felfai deuh zawk ngaihtuah a ngaiin a langa, thil tih theih tur niin a lang bawk. Chuti ni lova mimal duhdan dana tih mai hian changkan hun chu amahin a rawn her chhuak mai lovang. Inthiarna phei chu fai taka vawn, tha taka enkawl hi awm ngei sela, chutiang chu din ve thiam turah inngai mai ila kan din thei maiin a lang.

Airport chunglama chhohna tur cheng vaibelchhe man siam te kan tum ni awm takin a lang a, chung ai chuan a pawnlam enkawl felfai te leh enkawl thianghlim te hi kan mawipui zawk tur leh midang tan pawh tingaihawmtu zawk a nih a rinawm. Airport building chung lama lawn chhohna tur kailawn ropui tak siam tumna phei hi chu a hmunah ka la hmu ve lo bawk a, a awmzia ka hre ve thiam chiah lova. Kan airport timawi tur hian stainless steel te, marble te leh granite lam te ai chuan Mizoram tualto hnim hnah leh thing te ngaihtuah ila kan lo tih laiin vairam atanga lak luh lam kan ngaihtuah niin a lang a. Ngaihdan zawng a inang lo hle zawng a ni.

Kan airport luh dawna puitling zung lai hmel kan hmuh fo chhung chuan kan airport huamchhung hi chu engemaw ti tiin han cheibawl ve pawh ni ila kan nalh tak tak mawh viau dawn a, chuvangin airport pawnah hian inthiarna fel tak ngaihtuah a tul khawp mai. Mi hmuhah kan Lengpui airport hi mawi takin lang se kan duh a, mahse chu a mawina chu vairam atanga eng thil thil emaw chah luh tam leh vuah belh tamah innghat lovin kan remhriatna te, kan thawhrimnaah te a innghat zawk ang.

Kan Tourism Deptt. lamin Tourist resort leh chawlhbuk sak nana vairam thil leh tlereuh kan lawm dan atang hian Tourism lama kan hlawhtlin vak hi chu a rinawm lova, kan hlawhtling lo reng bawk a. Anthurium pangpar kan han hre thar ve a, Chapchar Kut leh Pawl Kut aia dah chungnun tum ni awm taka Anthurium Festival kan han ti ngawt te hian bih chian a dawl tak tak thei lo. Anthurium zawhah Dragon Fruit kan han hmelhriat leh a, Dragon Fruit chingtute chu kan duat bik emaw tih turin kan sorkar Deptt. lam an han awm leh mai a. Mahni neih sa chawisan lam ai chuan lakluh thil kan ngaisang tih chu en lo pawhin a lang reng mai. Kan airport cheimawina a ni emaw, kan Tourism ngaihtuahna a ni emaw, kan nihna ang leh kan ram thil hi ngaihsan a, hman thiam a that tehlul nen kan ngaihtuah dan hi a saptawng deuh tlat thinin a lang.

Lengpui leh Aizawl inkara man tlawm zawk leh awlsam zawka khualzin an kal theihna tur te, airport pawnlama inthiarna felfai deuh leh kan zahawmna tipung thei tur neih a tul thu te hi chu kan sorkar hian ngaihven sela a duhawm mang e.