BAWNGKAWN PENG THUAM

Bawngkawn peng thuam, kan sawi luih luih kha a lo zau ta huau mai a, Sairang lam kalna leh Chaltlang lam chhohna inkar zingzuma in ding kha a lo bo ta daih a, a hmunah kawng a awm ta. Mipui tan a thawventhlak ta hawk a, tunah chuan kan sawi kan sawi thin kha hmanlai a chang zo ta a, thangtharin helai kawng thawnthu hi an theihnghilh ang nge theihnghilh lovang tih chu zawhna lian tak a ni.

Helai kawng chungchang hi Mizorama thil mak engemawzat zinga pakhat chu a ni ve ngeiin a rinawm. MNF Ministry hunlaiin sorkarin a laksak angin kan hria a, mahse an laih fel hmain an sorkarna an hloh ta a. Kan han hriat leh meuh chuan chu ram, MNF President hminga landlease a awm chu midangin an lo nei daih tawh mai a. A neitu chuan midang, landlease a hming chuang ve lo daih hnen atangin cheng nuai 150-in a lo lei reng mai a.

Sorkar ram te, pawlin ram a neih te lo hi chu landlease a tih ngai a ni meuh lova, Aizawl khawpui lun lai taka kawng sawi hlawh tak leh mipui vantlangin a mamawh em em ram zim tak kha landlease a phalna pek a nih chuan sorkar ram ni ngei turah kan lo ngai hmak kha a ni a. Mahse a neitu anga kan ngaih reng reng loh tur mimal hnen atangin mimal dangin an lei ta daih a. Mipui rilru a phawklek zova, ‘Engtizia mai nge ni’ kan ti luai luai a.

Chutihlai chuan a kaikuang zinga pakhat ni ngeia ngaih, Pu Zoramthanga, he ram neih hunlaia MNF President leh Chief Minister ni bawk chuan fiah kelh kawlhin, “Chawlhkar lo awm turah hian a document nen kan rawn sawifiah ang,” tiin Press mite hmaah a puang ta kalh a. Kan lo ngaichang ran hlawm a. Chu thu a sawi atanga thla tam tak hnuah pawh chuan engmah a sawi ta lo vang vang a, vawiina he thu ziah lai thleng pawh hian chiang taka mipui hmaa, “Kan ti ang,” a tih kha a la ti ta reng reng lova. Dik tak chuan vawiin thleng hian a hrilhfiahna hi kan la ngaichang a, kan la nghak reng a ni. He ram awmdan leh a neitu inthlak kual dan hi chhun khaw enga ngaihtuahna fim hmang chunga thleng, mipuite mithmuh leh ngaihchan thuap a nih avang hian ngaihven awm tak pawh a ni.

Tuna hetia kawng a lo awm theih nan hian tuna sorkar (Ministry ti ila) hian helai kawng hi mipui mamawh a ni tih hriain a neitu mimal hnenah chuan a hma lam thu buaipui zui lovin cheng nuai 150 a pe ni awm takin kan lo hria a. Pek mai tawh loh chuan tihngaihna a awm lo tih chu a lang reng mai a, pek fel a, hetia kawng a lo piang ta hi a lawmawm takzet a. Mipui tan a thawventhlak bakah inpuhna thubuai awm reng chunga mipui chhawr theih si loh kha a ngaimawhawm lehzual a ni.

Mahse, ‘A tha mai alawm,’ tih ngawt theih a ni mang hauh lo. Sorkarin cheng nuai 150 hi a ram neitu hnenah a pe a, a ram neitu chuan cheng nuai 150-in a lei a ni a, a leina pa chu a ram neitu anga ziah a ni ta tlat si lova, chubakah a ram chu landlease pass a nih avangin engtinnge mimalin a hralh theih mai Chu cheng nuai 150 kal zel chu tu hnenah tak nge a tawp tak a, engtia cheng nuai 150 hi lo piang nge

Hnam fing apiang an kherkhiap a, thil an ngaihtuah chik thin a. Kan tuallaiah, kan hmuh phak rengah sorkar pawisa ni ngeia lang engtin emaw mimal kutah a thamral nge, ram heti zah man hi a neitu anga ngaih lohvin engtinnge a hralh mai He thila inhnamhnawih hi mi naran ni lovin Mizoram Chief Minister a ni tlat a, mipui tan ngaihven a tul tlat a ni. Ram changkang zawk ni se kawng zawhna tham a ni a, Assembly House a rorel thei lova intawnna tham a ni. Hetiang ram leilung chungchang hi heti ngawta thamral tur hi a ni thei lovang. Hemi hre fiah lova awm hi engmah hre tak tak lova intih mitak tumna te pawh a ni thei mai awm e.

Kawng lo awm ta te, mipui thawvenna te chu a tha ngei mai, mahse awmphung fel lo leh nihdan fel hlei lova mipui pawisa cheng nuai 150 inlar nawlh, bo leh ta daih si hi inrelbawlna lam ngaihven mite tan ngawihpui mai chi a ni lovang. He cheng nuai 150 hi sorkar nena inkaihhnawih lo, mipui pawisa ni hauh lo, mimal thahnemngai pawisa emaw ni se chu kan sawi tur a awm kher lovang, mahse mipui pawisa a nih miau chuan hetah, kan vengah, kan khuaah cheng nuai nga lek pawh khawtlang ‘develop’ nana min pek chuan vawk talhin kan lawm lo chauh a ni si a, engtinnge nuai 150 teh ringawt hi kan ngawihbopui theih ang Tunah kan veng kawng alkatra luan khawk leh pawh kan tuar a, rawn thuam tha se kan ti ngawih ngawih a, alkatra barrel khat te chu khawtlangin nei hlawm ila veng hrang hranga mi thahnemngaite hian thawh belhin mahni veng kawng khuar leh bumboh hi kan thuam tha sup sup peih ang, engmah nei lo chung pawhin thawhkhawm hlawm ringawt pawhin kawng kan siamtha sup sup alawm. Chutih laia cheng nuai 150 teh meuh mai pilpak ringawt buaipui loh mai mai hi pa remhre hna a ni lovin ka hria.

Kawng tha ta chu a lawm ber zinga mi ka ni a, nuai 150 erawh ka la zawng reng mai.