HAWI THAWVENNA TUR A AWM RIH LO

Tunhnaiah thu mak angreng tak mai kan hre deuh thut a. Mipui mimirin kan lo ngaihtuah reng reng loh leh kan lo hriat reng reng loh, Sakawrhmuituai tlang a hawi thaw­venna hmun danglam bik tak siam tur, siam fumfe lova a awm thu kan han hre thut a. Kan han hriat ve meuh chuan a lo tlai fe tawh a ni tehchek ang chu an hnathawh pamtulna sulhnu han en pawhin a lo tuiek bur tawh mai a. Mahse thir te hi chu pawn ruah nan theih leh nisa em theih a a awm hi chuan chawlhkar khat chhung lekin a tuiek mai zel a, chuvangin a chin chhuak a thil hre ve lem lo tan chuan engtik a mi nge, an pamtul hlen dawn ta nge an la chhunzawm leh dawn tih pawh kan hre lo. Chutiang deuh bawk chuan Cable Car station tur emaw ni, Chaltlang Tourist Lodge bula hmana sorkar hmasa hunlaia an laih kha an chhilh leh tawh niin a lang bawk a. A dang an laih leh thawm leh Cable Car chu khawiah emaw an bun a, an hman tangkai tak thawm kan hre bawk si lova. A bangbothlak deuh zawng a ni. Tunhnaiah heng thil hi pawisa tam tham deuh mai nen a inzawm a ni tih an sawi a, awih loh ngaihna pawh keini ang duang tan chuan a awm lo.

Eng pawh ni se he thil hi kan lo hriat lem loh a nih lai mekin keima mimal chuan ka lo ngaihtuah ve deuh reuh thin a ni a. Ka lo ngaihtuah venaah chuan khawilai emaw, hmun sang deuh, a hnuai ruam thuk deuh takah hian (ka mitthla chuan Hmuifang kham, Chamring hnaih, Sialsuk lam ep te saw a hmu a) engemaw va dawh filawr ringawt mai ila, a hmun san avang leh a hnuai ruam thuk avangin va kal a, va hawi thawven chu thil tihbaiawm tak si, mahse a ngam tan chuan thil tawn ropui tak ni ve thei tur a ni a, kan Mizoram danglamna lai tak mai hi zin mite hip nan leh tualchhung mi te intihhlim nan emaw hmang ila tiin ka lo ngaihtuah ve mai mai thin a. Siam chawp thil lamah chuan kan neih ve theih tur thil danglam tak pakhat ni vein ka lo ngai bawk a. Chuvangin tunhnua hetiang thil hi tih tumna a lo awm a ni tih han hriat chhuah takah chuan rilru a luah ta riau a ni.

Ka ngaihtuah dan ang (hmun sang leh thengthaw a thil dawh filawr) chu a ni tehchek ang chu maw saptawngin, ‘Skywalk’ an han ti a. Chutiang thil chu siamna tur pawisa a lo awm reng tawh a ni tih tunhnaiah an sawi a. A pawisa lah chu a tam tham em em mai lehnghal a, cheng za note tel phei ni se pa naran tana phurh zawh loh tur chiang sa, cheng zanga note pawh ni tehreng se nghawngkawla khirh zawh loh tur, nuai hlir a chhiar a sangkhat aia tam tih vel a ni. Keini ang pawisa tam tham hre ve tak tak lo leh la hmu tak tak lo tan hi chuan nuai hlir za chin chunglam te hi chu thil ropui tak tih theihna turah kan ngai mai a. Nuai hlir sangkhat te a pelh tawh lek phei chuan nasa lutuk a tichingpentu an lo awm a nih chuan a tichingpentu chu ramhuai nen hian kan han hmuh pawlh deuh ngawt mai a. Hetiang ngaihdan kan han nei mai te hi kan sual vang em em pawh ni bik lovin kan retheih vang leh pawisa tlemte hmang pawh a thil tha tam tak a tih theih tih kan lo hmuh ve tawh vang a ni mah mah ang.

Kan pawisa chingpen thenkhat hi chu a tam tham riau mai a, maktih tham hi a chingpen ta thinin uiawm ngawih ngawih tham hi a chingpen ta thin a. Mi sawi kan lo hriat danin pawisa kha nuai hlira chheh a, chheh 1200 lai niin an sawi a. Tuna kan hmuh theih anga lang, social media lama lo lang chu sakawrhmuituai tlang chhip khawimaw laia steel structure, cheng singhnih sing thum (a tam berah - chu pawh a phurh thlenna te nen vek) ni maiin a lang a. A thlalak a lo kimchang lova, kan lo hre kim lo a nih chuan min ngaidam se, khiti ringawt te chuan a pawisa dang kha khawiahnge a awm tak ang tih hi zawhna lianpui mai a ni lo thei lova. A pawisa tamzia leh kan hnuhma hmuh theih inhen lohdan hi a mak lutuk a, a awihawm lo hial zawk. Khawilaiah hian emaw a pawisa nawlpui kha chu lo la awm rengin Congress sorkar khan an tlaksan ang a, tha takin a lo la awm ngei ang tih a ngaihtuah theih viau. Chutiang chu a nih ngei pawh ka rindan a ni, a hnuhma leh a pawisa tam zawng hi a intuha lo lulai lutuk em mai. Hmalakna muang hi pawisa bo angin kan sawi ta mai nge, he thil hi heti ngawt a nih chuan engtinnge a pawisa rawn petu lam lakah pawh hian kan insawi fiah dawn? Ngaihtuah tur a tam hle mai.

Mahse kan han thlaphanna bul ber chu kan sorkarna chelhtu kan hotu kal tawh leh awm mek te hi hetiang thilah hian rin ai hian an huaisen leh tlat mai thin ve bawk a. Thil tih awm loh taka kan ngaih hi an ti mai thei zel niin a lang. Dihmunzawl a in ruak vuak thiahna man te kha cheng nuai 62 a’n ni thei mai a. Kha in kha cheng nuai 62 chuan sak turin ka contract ngam zan mai. Thil awihawm loh pui pui hi kan mithmuhah a thleng a, a tak tak a ni miau thin si. Mizorama lungalhthei phur lut anga an insawina pawisa te kha a makin a tam lutuk tlat mai a. Thenkhat phei chuan motor thenkhat chuan Meghalaya leh Mizoram inkarah khan nikhatah motor thenkhat chuan tum hnih lungalhthei a rawn phur thleng e an ti a. Chutiang thlen­tir ngam chuan Skywalk siamna tur cheng nuai 1200 lai mai pawh hi engtin tin emaw an ching bo thei mai tak tak awm mang e tih te kan ngaihtuah ve ta tlat a nih chu. Thil mak tak tak kan hmuh leh kan hriat avangin kan ngaihtuahna pawh hi a mak ve zo ta te pawh a ni ta ve ang.

Hetihlai hian tun sorkara Sports minister-in engemawtia rinhlelhna awka a’n chhuah dek dek khan sorkar hmasa lam thalai te khan, ‘Chhuitir ngei rawh se,’ an han ti salh salh mai a. Chhui chian chu an cho hle ni te pawhin a lo lang ve leh a. Keini ang duang, a pawisa awmna hre tak tak lo, thil chinchang hre lo, ralkhat atanga lo ngaihventu tan chuan, ‘Uai, hei a vawtu hian ek a cheh theihna lai a awm a ni mai awm mang e, lehlam pawl hian an va cho ve maw le,’ tihna rilru te kan lo nei ve leh mai bawk a. A chhuitir tumtu, chuti taka an cho let tak lam lah chu phal loh chung chunga fehna lam atanga haw hlim hlawt, Stadium chhawng sak a nih tur thu sawitu kha a lo ni ve leh zel a. Mipui tan chuan anmahni pahnih (Sum dawngtu Congress sorkar leh tuna Congress sorkarna thlaktu MNF) -ah chuan a khawi zawk nge dik ang tih ngaihdan siam a har ta khawp mai. Kan buaina erawhchu he pawisa cheng nuai 1200 lai mai hi kan dawng tawh a, tunah hian a chhunzawmtu tura ngaih sorkar chuan CBI koh luh lam an ngaihtuah ta tlat bawk si lai hi a ni.

Keini pawisa chunga thu nei ve ngai lo, pawisa tam tham la khawih ve ngai lovin thil tih awm loh hul hual, khaw eng leh sorkar dan leh pawisa hmandan bung leh chang avanga a tiha tih ngeih loh tawpa kan ruat te hi kan hotute hian an ti leh mai thin te hian kan hria a. Mipui thlavang hauhtu Pi Vanramchhuangi te, Pu M.Lalmanzuala te leh midang thenkhat hi awm lo phei se chu kan ram hruaitute hian eng hi nge an tih ngam loh ang tih ngaihtuah tham tak a ni a. Hetia mipui thlavang hauhtu awm chung pawh hian kan sorkarna vuantute hian tih ngam loh tak tak pawh an nei meuh lovang a, khaw eng hi chu tlemin an zah phah ve deuhvin chhete chuan an fimkhur phah ve mai awm e tih lekfang a ni.

Skywalk leh Cable Car siamna tur pawisa, cheng nuai sang chuang hi kan dawng tawh a nih si chuan engtinnge a awm tak zel tih hi kan chhui fiah a ngai a, Mizoram sorkar hian a dinhmun dik tak hi min hrilh sela. Engemaw ti mai maia a lo chingpen ral vek te a nih phei chuan a mawhphurtu hi zawn chhuah ngei a tul khawpin a lang.