MNF SORKARIN AN THILTUM AN TIHLAWHTLING EM?

MNF Party rorelna sorkar, Mizoram sorkar a Minister pakhat chuan MNF sorkar chuan an thil tum leh an policy te chu tihlawhtling deuh vek tawh angin a sawi tih thu chanchinbu lamah a lo lang a. He thu hian ngaihtuah a tithui hle mai.

Kan lo pawm dan tlangpui ni a langah chuan Covid19 vangin Mizoram sorkar chu engmah ti hlei thei lo, Central sorkar pawhin a pawisa pek tur ang pawh pe thei lovin a awm a. Mizoram sorkar ngei pawh hian he hripui hi chhuanlamah a hmang fai vek mai awm mang e tih hial khawp a kan lo ngaihtuah laiin Minister Robert Romawia Royte chuan sorkar chuan a tih tum tam zawk chu a tihlawhtling tawh angin a sawi ta mai a. He thu ngaihtuah a ngai ka tih nachhan chu tunhma atang tawhin sorkarna changtu Party te hian ngampa takin mipui hi dawt min hrilh fova. Kawng siam zawh loh tawp te hi siam zawh tawh angin an sawi a, hmalakna awm mang hlei lo te hi thawh zawh tawh angin an sawi chawk a. Mipui hi duh aiin min nel mah mahin ka hre thin.

Hnaivai takah pawh Hortoki a bye-election dawnah amah Robert Romawia ngei hian October thla chhung ngeia zan lama inkhelh theihna tur Volleyball Court a tiamna video te kha kan lo hmu a. Khati khawpa chianga intiamna kha chu an tifel daih tawh ang chu kan lo ti mai a. Mahse a thusawi dan dang ngaihtuahin an tifel ta meuh em tiin ka’n ngaihven a, November ni 15-ah chuan chhun leh zan lama inkhelh theihna chu siam awzawng lovin a Volleyball Court ber pawh chu a hmunhma tur an lo la tihfel loh thu ka dawng a. Chutianga thutiam duh, chutiang mai maia thu tiam ching Minister chuan MNF sorkarin a manifesto te a tipuitling anga a sawi ta mai hi awih a har hle mai.

He Minister vek hian Stadium chhawng siam a nih tur thu a sawi a nih kha. Tunah hian an hun chanve an hmang tawh a, Stadium chhawng chu khawia siam tur nge ni a, a ban phun a ni tawh em? A hmunhma ruat fel a ni tawh em? A senso tur pawisa te hmuh tawh a niin dah fel diam a ni tawh em? He Minister vek hian Hortoki a campaign phal tawh loh hnu a rairuang buk kara a zu bihruk vel hnu khan tunhnaiah, ‘Inkhelah pawh pet goal tur chuan offside deuh a ngai,’ ti ang deuhvin thu a sawi a. Minister ve meuh daia ei tur pek ngaia a awm tawh hnuah pawh a la zak lo hle zawng ni ngei tur a ni. Mizoram hi a zak thei lo apiang leh a pamham apiang lalna rama kan chhuah dawn a nih loh chuan heng thil hi kan ngaihven tur a ni. A inkhelh dan hriat leh a politics hriat dan hi khawvelin a ngaihsan vak loh chi ni tlatin a lang.

Nikum leh kuminah hian mipuiin kan hmuh danah chuan Covid19 avangin kan sorkar tan hian hmalak a harsa awm mang e, state danga thil chi hrang hrang an tih lai pawh hian keini state bikah chuan Covid19 avang hian kan inkhuahkhirh nasain sorkar pisa pawh a mumal hlei thei lova, eng teh vak kan ti lo mai awm mang e kan ti a. Covid19 hrik enna khawl tha RT-PCR khawl ringawt pawh kan sorkarin Lungleiah a bun hlei thei lova, mipui leh pawl insiam chawp thlenga nawr ngaiin a awm a. Covid19 dona kawngah pawh chuti khawpa kan tuanfum lai chuan Sports Minister hian MNF Party Manifesto chu tihhlawhtlin teuh tawh angin a rawn sawi ta mai a, dawt hrilh tawka inngai lo tan chuan a thusawi hi ngaihtuah chhunzawm a ngai tlatin a lang.

Inthlan dawn a intiamna awihawm loh te hi tha lo kan lo ti a. Kei lek phei chuan Political Party ten inthlan dawn a an manifesto a thil an ziak tlar nasa lutuk leh tam lutuk ringawt mai te hi tu Party tih mah hi tha ka ti lova. An sorkar huna tihhlawhtlin an tum tak tak chin chauh tur te hi ziah tha ka ti a. Manifesto a thu pakhat ziak a, inthlan fel hnu a thudang vawrh leh daih te pawh tha ka ti lo. Hna dang chu lo thawk chhunzawmin thil tha dang pawh lo ti se inthlan dawna an tihtur anga an sawi chu ngawrh takin an bawhzui turah ka ngai a. Chutia inthlan dawn a thu thehdarhah pawh kan duh fir viau lai chuan inthlan zawh tawh hnu, sorkarna chan tawh hnu pawh a dawt ni ngeia ngaih loh theih loh, Party ruihchilh tan chauh lo chuan a awih a awih chi hauh loh sawi chhunzawm zel phei chu a hnam pum anga inzah lohna a tlingin ka hria.

Keini lo ngaihdanah chuan cheng nuai thum sem hi MNF Party policy-ah chuan a langsar ber zinga pakhat a ni a. Cheng nuai thum sem thawm hi kan kan hre ta lova, sem chu sawi loh, sawi rik pawh a awm ta lova. Tun hnaiah chhungkaw lam hawi zawng a SEDP kalpui tum a nih thu an puang leh ta feih feih lek a. Sports Minister thusawi hi ngaithiam a, awih deuh tur chuan Mizoram a chhungkaw 70,000 vel tal hian cheng nuai thum hi dawn tawh awm kan ni. Dik tak chuan NLUP dawng tawh zawng zawng pawhin an chan tur cheng nuai thum hi Mizo mipuite lakah he MNF sorkar hian a ba tlatin kan hria — Mizoram Chief Minister lo ni ta hian a sawi chiang em alawm. Nuai thum dawng hi Mizoram chhungkaw hmun thuma hmun hnih emaw, hmun thum emaw tal an awm loh ngat chuan he MNF sorkar hian a Manifesto chu a tipuitling ti ang lam hawi zawnga sawi theih a ni lovang.

Chumi bakah chuan vai buhfai ei lova intodelh te kha sawi a ni a. Kum nga chhunga vai buhfai ei lova min intodelhtir an tum a nih chuan tunah an term chanve an hman tawh hnu hian intodelhna tura an hmalakna chu hriat tham a awm tawh tur a ni. Tunah hian a hectare a zawngin kan intodelhna tura hmalakna thawnthu pakhatmah kan la hre lo niin ka hria a. Chutiang chu thil awmdan a nih mek laiin kan Sports Minister chuan sorkarin a tih tum chu ti zel angin emaw, tifel zel ang maiin emaw a sawi tlat a. Chutia sawitu chu Offside ngaina, Hortoki khaw volleyball court chungchangah pawh intiamna tihlawhtling lotu kha a ni.

MNF Party siam sorkarah chuan mau hmang a Mizoram intodelhna emaw, hmasawnna kawng zawh emaw hi mipuiin beisei ila tih awm tak a ni, Chief Minister berin nasa takin a sawi a. Mipui tam tak rilruah pawh Covid19 hri len laia Mizoram sorkarin mau a buaipui kha thil tih awm loh a ni. Hripui ngaihsak tawk lo ang hiala miin an ngaih phahna mau pawh chu kan hmuh ve phak chinah chuan a hlawhtling lo em em a, sawitu thenkhat phei chuan, ‘Mual khatah pakhat a nung,’ te an ti a. Chuti khawpa mau chu din chhuahpui tur anga a lan loh lai chuan Sports Minister thusawi han ngaihthlak thuak chuan mau te pawh hlawhtling hle anga ngaih theih a ni.

Vaibuh ei tawh lova buh a intodelh te, Traffic Jam awm lohna Aizawl khawpui te, Kawng chhawng te, Leiverh te, cheng nuai thum sem te hi mipuiin he MNF Party siam sorkar-in min tiam anga kan ngaih theih, anmahni kan tehna tur a ni. Kan Chief Minister hian a sawi chiang kelh kawlh bawk a, kan traffic jam te hi tihziaawm satliah pawh a ni lo, India rama traffic jam awm lohna khawpui awm chhun Aizawl min tiam a nih kha. Chuti chung chung pawhin traffic jam awm hauh lo tak tak ni lem lovin hmuh theihin ziaawm kawk sela chu kan Sports Minister thusawi te hi kan enghelh lo mahna. Buh leh bala intodelh chungchangah lah he MNF sorkar hmalakna chhuan tham tak avanga tuna lo neitute buhseng mek hi lo pung ta hluai leh sawi hat hat tling khawp ni sela, ngaihdan a thiam theih. Mahse chutianga sorkar hmalakna avanga kan buh thar a pun hluai kan hre si lo. Buh thar tam deuh an lo awm a nih pawhin mimal vanneih vang te, thlawhhma lak zauh vang te a ni ang. Tun kum hnih leh a chanve kal ta chhung hian sorkar hmalakna avangin leilet hectare engzah nge kan neih belh a, tlangram lo neih an phur phahna turin sorkarin engnge a tih tih te chu kan tehna tur a ni. Chief Minister berin an sorkar vanduaina chu Job-a vanduaina nen a tehkhin lauh lauh laiin a Minister pakhat chuan an sorkar chuan tha takin hna a thawk zar zar angin a sawi ve thung a.

Heng zawng zawng ngaihtuah a, Hortoki volleyball court te han ngaihtuah a, Stadium chhawng (Sports Minister hian sak tura a sawi) te han ngaihtuah kai zel a, a politics khelh thiamdan, ‘Offside deuh chung hian kan pet goal duh nge nge,’ a tih te nena kan ngaihtuah khawm hian kan Sports Minister thusawi hi chu pawm zam mai a harsa hle mai a. Mizo mipui hi min zah lo hle ni te pawhin a lang.