TWO-WHEELER TAXI KAN NEI

Mipui tan leh kan awm­phungin a ṭangkaipui bei­seiin sorkarin Two-Whee­ler Taxi a tlantir a. Kawng tam takah chuan a ṭangkaiin mi tam tak tan awlsamna thlentu a ni ngei ang a, mi tam takin eizawnna an neih phah ngei bawk ang.

A duh apiang chuan theihna tur lirthei, man chawia hman theih chi reng reng chu sorkar khuahkhirhna hnuaiah a awm tur ni awm tak a ni a. Awmtir phal theitu chuan awm lohtir theihna dan a nei ang tih chu awlsam tea hriat mai theih a ni. Chu chauh ni lovin heng mite khawsak dan bik hian kan ram (State) hmel a tilang a, kan hriat loh hlana min timualphova, min chawimawitu an ni sam bik em em a ni.

Hmanah ka vai ṭhianpa lo zinin Airport aṭanga Taxi a hman thu leh a Taxi hman chuan a chuanpui chhuk ta Mizovin a man a lo pek tawh avanga a man a lak a ngaih loh thu a hrilh a ni awm pek a. A kalna hmun hrang hrangah ka ṭhianpa chuan a sawi a, Mizoram nawmzia sawi nan a hmang ṭhin. A ngaihthlak a nuamin kha Taxi Driver kha a fakawm ngawt mai.

Hmanni lawkah ka nupui hian Two-Wheeler Taxi a hmang a, nidanga a chuanna thin aṭangin a chuang a, nidanga a chhukna thinah a chhuk a, nidangah cheng 40 a pekna ṭhinah khan chu Two-Wheeler Taxi pu chuan cheng 17 chauh a ṭhing a. Kan nu mak tiin a’n zawh nawn leh pawh chuan dan dik taka a chhut thu a hrilh a. Khatiang kha chu ni vek se mahni two-wheeler dahin two-wheeler taxi hlirah pawh chuan mai a chakawm rum rum mai.

He thu ziah hma chawlhkar khat velah hian kan ṭhenawmnuin two-wheeler taxi a hmang a, Aizawl Civil Hospital aṭanga Khatla South YMA hall-ah cheng 70 a chawi a. Chutianga chawi tur chuan hemi inkar hi kilometre 6 a hla a nih a ngai (the first kilometre 20 rupees, subsequent kilometer 10 rupees), mahse kilometre thum aiin a hla thei lova, a chawi tur dik tak chu cheng 40 a ni. Ka nupui phurtu taxi kha chuan phur se cheng 30 aiin a tam hauh lovang.

Kan nau Buh­ban tlangvalin Bawngkawn aṭang­in Durtlangah two-wheeler taxi a hmang a, a phurtu chuan cheng 100 a chawi­tir a. Khaw khat chhuak, inhmel­hriat hnaivai tho an la ni zui. Bawngkawn leh Durtlang inkar hi km 2 aia a hlat ka ring lo.

Ṭumkhat chu Khatla kawn aṭanga Khatla South YMA Hall thleng kal man cheng 30 an chhiar a, Taxi pangngai chuan man nen a intluk deuh reng thu ka’n sawi chuan, “Keini chuan passenger dang lak belh ve a rem si lova,” tiin min chhang. Kan thil thlirdan leh ngaihdan chu mak angreng tak a ni.

Two-wheeler taxi a lo chhuah khan lawmawm ka ti hle mai a. Thil tha zawk a her chhuahpui te ka beisei a (Taxi chuan man to deuh te a tlakhniam phah ka ring a, Taxi driver te pawhin rim zawka thawkin an eizawnna an ngawr zawk ang a, mipuiin awlsam zawk leh tlawm zawkin two-wheeler taxi kan hmang thei ang tih te ka lo beisei a ni). Mahse tuna a lan dan hi chuan chutiang chiah chu kan thlen phak hmel ta lo riau mai.

Kan sorkar hian hetianga tualchar a dan dik lova lirthei chuan man inlaksak vak vak hi a remti a nih chuan a rate hi bithliah lo law lawin, ‘A chuangtu leh a phurtu inremsiamna ang a ni ang,’ ti mai sela. Rate bithliah ve si, a hmangtu tur ten hmang tha duh si lova chhun enga hetia thil a thleng ngar ngar mai hi chu a mak ve tho mai. Tuizem hluihlawn ṭhiah man cheng nuai 60 aṭanga two-wheeler taxi chuan man cheng sawmhnih khat thleng hian a ti hian thil kan ti mai zel a, a ti lo hian kan ti lo mai mai vel ni hian a lang a. Hei hi kan awmdan tur angah kan ngai nghet ta mai em ni? Vaibelchhe tel man lei a chim rup a, mihring an thih hmak pawhin, ‘A dawhtuten mawh an phur lova, chuvangin tumah kan hrem lovang,’ kan ti a. Mihring nunna a riral pawh a mawhphurtu an awm si loh chuan two-wheeler taxi a cheng 20 vela lo chawi tamtirtute hi kan inthunun thei ang em tih hi ngaihtuah a ngai khawp mai.

Dan hi chu kahpathir ang a ni a, a khawngin a khauh tur a ni. Chutiang chu khawvel ram dang zawng zawngah dan kalhmang a nih laiin ram tha lovah chuan dan te chu kahpathir, tlak lei bana char khawm ang maiin roreltuten an kengkawh a. An huat zawng lakah a kahpathir lai an hmachhuan a, an duhsak zawng lakah a charna tlak lei ban chu kutin an tuaifai leh mai niin a lang. Dan chu a duhin zawm a, a duh lovin zawm loh tur ni lovin mi zawng zawng zawm tur a ni.