KUM TAWP

Kum tawp chu kan lo thleng leh a ni ta mai a. Kan vannei hle zawng a ni. Pu K.Zolianan, “Zun zawh apiang hian lawmthu sawi zelna tham a ni,” a ti a. Zun theih loh hrehawmzia a hriat chian tawh vang leh a tawn tawh vang a ni a. Chutiang deuh chuan kum tawp kan han thleng a, kumin chhung zawnga ni kan han chhiar chhuak kha lawmawm tak a ni. Kan mi ngaih leh duh tak tak, vawiin min hmuhpui pha ta lo te han ngaihtuah phei chuan hnuk lam lam te pawh a ulh a. Chhungkaw tam tak tan phei chuan, ‘Chhungkim dar ang lenlai ni kha ngai zualin,’ tih hla te kha a dik vawng vawngin ngaihtuah loh theih a ni lo.

Hetia kum tawp a lo hnaih takah chuan kawng hrang hrangin kum kan hman liam tur hi a thlir theih ang a. Hmasawn tum te thlirna te, dam khaw chhuah ve hram tum te thlirna te, lawmna tur zawnga thlirtu te leh vanduaina pumpelhtute thlirna te, vanduaina chhiar mi te thlirna te, ngai awh reng tum mite thlirna te a dang nuai thei ang. Ram pum huapa thlirna neitute thlirna pawh a dang bawk ang.

Krismas lawm tura a hmanrua nia kan ngaih pakhat chu naupan lai chuan thawmhnaw thar neih te a ni a. Nia, kan tlakchham langsar tak kha thuamhnaw kha a ni a. Keini ang rual, kekawr mawng tet ha thin, pheikhawk bun tur nei ngai lo naupang tan kha chuan thuamhnaw thar kha Krismas nghahhlelhna chhan a tling ve thin a nih kha. Kan nu leh pa te kha chuan ruai sa nghak a Pathian fakna hla, chhun lawnah pawh inthlahrung hauh lova sak theihna hun te kha an thlahlel te pawh a lo ni ta ve ang. Thlarau lama tuihalte tan chuan Lal Isua lo piang lawmawmzia leh Krismas sermon te kha a nghahhlelhawm em em bawk ang. Mihring hian kan duhzawng kan zawng a, kan taksa duhzawng leh kan thlarau lam mamawh thlengin kan zawng a. Tunhma lama kan mamawh kha chu tunah chuan kan mamawh tawh chiah lo te pawh a ni ang e.

Tunlai tlangval thenkhat hi chuan eng tih khawm emaw, danglam deuh hlek te an beisei hialin ka ring. Tih khawm satliah te hi chu kan hne tawhin a lang hial law maw ka ti. Kan thalai tam tak hi chu duh hun huna an mut a, duh hun huna an thawh a, mi pangngai an nih miau tawh chinah hi chuan an thil thlirdan leh an thil nghahhlelh tur hi keini ang chuan kan hriatpui ve pha ta meuh lo niin ka hria. Eng thil pawh lo thlengin eng ti pawhin awm ila, Social Media lama lungawi tur tawk hi kan awm nual niin a lang. Mi hnatlang se, thla latu tur hi kan awm mai zel a. Mi hnatlang lai thla en a, lungawi viau mai hi kan awm zel a. Zing lama tih chi reng reng chu tih loh tawp a, zan lama tih dan zawn hram hi kan nunphung a nih tak chinah hian engtin nge thil hi kan beisei tih hriat a har a. Thalaite zingah chuan inelna dang siam lovin Whatsapp bih peih lawmman te hi siam ta ila kan tunlai tawng takin a ‘hit’ zawk mah mah awm mang e! Engnge a tangkaina tur phei chu ka hre hlei law. Kan Krismas beisei dan hi a rual ta chiah lova. Kum tawpa kan inbih letna tur pawh hi a inang lo viau ang.

Mipui vantlang chuan ruaitheh leh theh loh te kan thlu deuh a. Khawlai chei lam hi kan uar viau bawk. Helai chhehvel hi tam tak chuan Krismas laimu ber emaw pawh kan ti hial tawh niin a lang. Mahse hei zawng, pumpelh hleih theih pawh a ni lo. Mi fate leh ram changkang zawk rengin an ti nasa ve mai. Nikum leh kumin ngat phei chu hripuiin min tihbuai avangin inkhawm lam leh ruaitheh lam hi a mumal hlei thei lova, kum dang nen chuan inthlau tak a ni thei ang a, vui that ngam mang lohva thi ta chhungkaw tam tak tan phei chuan Krismas te hi a Krismas hlawl lovang tih a rinawm.

Krismas kan ngaihtuah dan hi a inpersan hlawm viauin a rinawm a. Mi ngaihdan sawisel ngawt hleih theih pawh a ni lo. Hriatdan leh ngaihdan lovin tumah kan awm thei lova, hriatdan leh ngaihdan ber a danglam tlat tawh chuan tihdan dang chu vang tak a ni.

Krismas kan lawm dan zinga mi tam takin an sawi lem loh, kan ziaa bet tlat pakhat chu Krismas chawlh hi a ni ve awm e. Mi tam tak Krismas chawlh hi a rei viau. December ni 15 hnu lamah chuan hna thawh tum tawh mang lo awm theih a nia. Chutah Krismas leh Kumthar inkara hna thawk thei chu kan tlem viau bawk a. Krismas rim a nam deuh tawh chuan Mizo inhlawhfa te chu kan kal mumal lo duh viau tawh thin a. Pisa lama thawk te pawh kan pangchang chho thin. Chu chauh ni lovin pisa lamah Advent Christmas hmanga kan han tih tawh chuan hna hi a lang lo zui duh hle a. Pisa thenkhat phei chuan he Advent Christmas hi an nei hma viau lehnghal. He chanchinbu ngei pawh hi a chhuahtu lamin an tlin chen hi a semtu lamin an tlin ta thin lova, chanchinbu chhuah loh chhung hi hmun dang leh ramdang aiin a rei fo.

Kan hnathawh hun chhung te, kan hnathawh darkar te, kan hna lak ngawrhdan a zir te hi kan hnam din chhuah leh din chhuah lohna hriltu pawimawh tak a ni tih erawh kan hriat a ngai. Krismas laia chawl tam viau, hun danga chawlh leh tum tho si te pawh kan awm thei bawk ang.

Mi ram inkhel te hi han en ila, Krismas chawlh teh vak pawh hi an nei lova, sorkar laipui lam hian chuti takin Puja chawlh leh Krismas chawlh tih vel hi an hmang rei lo. Ram changkang lam hian chawlh hi chuti takin an la urhsun lova, hnathawh darkar tihtam hi an uar zawng a ni tih kan hriat a ngai viau mai.