TI VE LO AN TAM

Mi thenkhatin, ‘Tunlaiah hetiang te chu heti’n an ti ngai hlei nem, supply tur zat chiah chiah an supply ngai hlei nem. A lo dawngtu emaw, a Officer emaw biak chuan a kim teh biai lova dahin bill a lak theih tho alawm,’ an ti a. Office tam taka bungraw leitirtu turten a kim lovin an dah a, a lo dawngtu Staff emaw, Officer-in emaw a kim angin an ziak a. A huaisar deuhvin an ti nasa deuhva, a inthlahrung deuhvin an ti nasa lo deuh mai niin mi thenkhat chuan an sawi a. Mahse mi zawng zawng tihdan leh tunlai tihdan anga sawi pawl an awm. Social Welfare Department a ka thawh ve lai khan ka hriat chinah chuan kan Department khan chutiangin bungraw kim lo, kim anga dawn kan nei lova, kan tihdan phung a ni lo kumkhua thin. Hmanni-ah Secretariat-ah Tender kan chhang a, Supply order min pe a, kan Tender chhanna ang angin fel takin kan pe mai a. A kim lova pe tur leh insiamrempui tumin tuman engmah an sawi lo. Chuvangin hetianga hlemhle taka titute hi mi zawng zawng an ni lova, Office a thawk zawng zawng te hi an rinawm lo hauh lo.

Thenkhat chuan, ‘Tunlaiah a thei theiin mahni thiamdanin sum an hai lut mai a, chiahpuam lo tak tak leh a remchan chuan khehpuam lo tak tak an awm lovang,’ ti tein an sawi. Mahse remchang elkhenah pawh khehpuam ve duh hauh lo leh chiahpuam duh hauh lo hi tam tak an awm mai ni lovin a ti duh hi tlemte zawk an ni a, an tawng tuitam mai mai a ni. Khehpuam duh lo leh chiahpuam duh lo tan, ‘Kei chu ka duh ve lo,’ tih thu sawia vah kual vah kual thu a awm lova, a khehpuam duh leh chiahpuam duh, midang rilru hmin tum tan sawi a remchang em mai a, an vak kual ruai zawk a ni. Remchang eltiang mah se han ngaihtuah a sum thianghlim lo it duh hauh lo hi Mizo zingah tam tak an la awm a. Heng avanga vawiina dinhmun thaa ding tam tak anga lang te hi miin an ngaichang reng a, an hmuingil em? An vannei chhunzawm em? tih te hi rin ai takin hriat a awlsam. Mahse hetiang thu tha lo leh thu chhia hi miin an sawi mai mai duh lo nain pindan ril titiah chuan hetiang mi te hi an vannei ziktluak duh lo khawp niin a lang. Sum thianghlim lo laka insum thei hi an tam khawp mai. A tam zawk daih an ni a, tih tak takah chuan sum thianghlim lo hmanga hausak tum te hi tlemte chauh an ni zawk. Dik tak chuan thawhrimna leh rinawmna avanga hmuingil, chhungkaw ziktluak te hi a ni vawiina mi awhawm te chu.

Politics thilah pawh a chak lam tur bel thiam, sorkar inthlak dan azira mahni thusawi leh tanhmun thlak zak zak te hi mi thenkhat chuan, ‘Tunlaiah chuan....’ tiin mipui mimir nunphung angin an sawi thin. Mahse chutianga zuang lawr chi chu veng khatah mi tlemte chauh an awm a, chuti takin miten an ngaisang lo tih pawh i hria ang. Zuang lawr ve lo, mi rilru nghet, an tanna lam pawl an lo chak loh pawha dawl chuang lo, mahse thinrim leh phuba lakna rilru pu chuang lo mite chu veng khatah pawh lehlam pawl pawhin an ngaisang zawk mah tih i hmu ang. He khawvelah hian sual leh tha a awm kawp a, khawiah pawh, eng eizawnnaah pawh a awm. Rorelna a that chuan thatna a chungnung a, rorelna a that loh chuan that lohna a chungnung mai thin a. Chutianga thatna chungnun tamna chu ram nuam a ni a, that lohna leh dik lohna tamna ram chu ram hrehawm, ram hmasawn thei lo a ni mai. Roreltute dik lo mah se mi tha te chu an awm reng thova, thatnain par a chhuah hun an nghak reng a, anmahni-ah erawh dikna leh thatna chu a awm reng a, eng ang dinhmunah pawh mi zawng zawng hi an sualin an dik lo vek ngai lo. Chutih rual vek chuan mi dik leh tha tam tak zingah mi dik lo leh tha lo erawh an awm ve ziah bawk a, mahse tlemte chauh an ni thin. Mihring pianphungah thatna leh dikna hi a chungnung zawk zel a, dik lohna erawh thuneitu dik lo hmanga vulh len a nih chauhvin a pawngpawrh ve ngam thin.

Mi thenkhatin kan Mizoramah hian dikna leh rinawmna awm ta lo ang hialin an ngai a. An thlirna tlang aṭang chuan he ngaihdan hi thil awm thei tak a ni. Sa tha zuar tam tak zingah vawkpui sa, sanghal sa zawrh a lo zuar duh te, phai sangha te, Mizoram lui nghate zawrh a lo zuar duh tawk te, vote nei zali zanga zingah mi sawmhnih sawmthum, mahni vote lo hralh duh ta mai tawk te an awm thin. Mahse chung mite chu mi tlem te zawk an ni. Vote hralh duh anga kan ngaih tam tak hian an hralh tih an inhriat loh vang te leh an pawimawhna hre lo khawpa an indah hniam vang a ni.

Thatna hi a awm reng a, a awm reng ang. Kan pi leh pu te hunlai ata tawh hnam huaisen leh hnam rinawm anga inhmu kan ni a, kan zingah hian tha zawk duhna leh ngaihsanna chu a awm reng dawn a ni.