MIZORAM MAWINA

A tha zawnga hming lan hi mawina a ni. Mawi kan duh avangin Idol te, Icon te, Comedian Search te, Sports hrang hrang te bawhin a tum ruh zual deuhvin India lairil te an thleng pha a. Mahni kawtkaia sam hai thur ringawt leh inchei dan uchuak deuhva inchei vanga hriat hlawh tum mai lovin kan nula-tlangval thenkhat chu hnamdang nena inelna tualzawlah an chuang chhuak ve ta nual mai a, a lawmawm ngawt mai.

Hmanni lawkah Cardinal Choir (Mizo Zaipawl) kha ramdang (Sri Lanka hmun) a inelnaah pahnihna emaw ni kha an ni a. Keini a mawl pawl chuan zaipawl inelna te hi ramdang dang huap hian an lo ti thin tih pawh kan lo hre lova. An chhuanawm ngawt mai. Hetianga ram pum huap inelnaah emaw, intihsiaknaah emaw kan Mizo hming a lan chang hi chuan mahni hmasial tak hian ka hnamdang thiante hi ka ngaihtuah chhuak vat thin a. An lo hre ve ang em? An lo lawm ve ang em tih ka ngaihtuah vat vat thin. Chutiang bawkin khawilai emawah ruihhlo avanga Mizo nula emaw, tlangval emaw an han man te hian ka hnam dang thiante bawk ka ngaihtuah a, an lo hre vein Mizo min hmuhdan a tidanglam ang em tih ka ngaihtuah fo thin. Kan chanchin tha lam hi chu ka thian te khan lo hre ve hlauh thin se ka ti ru thin a, a chhe lam hi chu lo hre ve lo mial se ka ti thin.

Chanchinbuah khan Mizo Zaipawl pakhat kha India Got Talent-ah inlan ve turin an tling tih a lo lang a. Tha tak maiin han ti se, sang tak thleng se kan lo ti ngawih ngawih mai. Mi te hian ngaihlu se, Mizoram hming hi a tha zawngin National Paper-ah te hian chhuak chuai chuai se, chutiang thlentir tur chuan kan Mizo nula-tlangvalte hi khaw lum leh khaw vawt hnuaiah pawh kum tam tak tak inbuatsaihin chhel takin bei ngat ngat se kan ti hle zawng a nih hi. Mahni’n engmah kan ti thei lova, kan thiam leh kan theihnain a tlin lul lova, eng International competition-ah mah hian dam chhungin kan lang dawn ta lo tih a chiang thawkhat a. Chutichung chuan Mizo kan nih avangin kan Mizoram lan mawina tur chuan kan nula-tlangvalte zingah a thei thei chu engemawti talin intat lut se, tangkapui emaw, chawimawina emaw hlawh chhuak hram se tih hi mitin duhdan a ni ngei ang.

Tunhnaiah Football lamah Tetea Hmar hian a chek thuk ve viau mai a, a lawmawm ngawt mai. AIFF-ah Committee member a ni pha a. India aiawhin World Cup en pahin an zu Committee a ni awm a. A ropui lai leh a hlu lai tak ni a ka hriat chu a zu zahpuiawm bik lovang tih ka ring hi a ni. Mizote zinga World Cup en kan tlemzia leh thenkhat World Cup en phei chu sawi lan hauh loh te pawh a that zawk a rinawm thu te ngaihtuah chuan Tetea zu en ve dan hi chu a ngaihsanawm khawp mai. Mizoram Football Association, tunhmaa chanchin sawi tur nei tlem tak si, inthlan dawna boruak lian fu si atang khan dam thlapin a lo chawr chhuak a, chutah AIFF-ah ziaka exam awm hauh lovin a inhlangkai a. Kan MP thenkhat, anmahni kan hmuh chang chauhva MP an ni tih kan hriat chhuah leh thin te, an Fund khawilai emawa an sih chhuah atanga kan hriat chhuah leh thenkhat te dinhmun leh nihna ai hi chuan mahni inhai veng chawp a sang tak thlen hi a ngaihsanawm khawp mai. Pawl sum leh pawl a tel vanga hamthatna chang ta viau thenkhat te hi chu ngaihsan an harsat thu pawh hi sawi sawitu nih a nawm tak lovah chuan Tetea te ang chi hi chu ngaihsanawm tak an ni.

Pathianin talent a pek hmang tangkai a, taima taka Exercise lak avang te, ruih theih thil leh inthlahdahna kawng hrang hrang atanga inthiarfihlim chunga Training that peih avanga India ram chhungah na na na chuan hawi ve valh valh thei tur Mama (Football) te, Jeje-a (Football) te, Lalremsiami (Hockey) te, Zoramthanga leh Jenny Lalremliani (Boxing) te hian Mizo hming an timawi a. Mizoram timawitu pawimawh tak an ni.

Rimawi hmanga hmun dangah pawh inhlawhfa pha engemawzat kan nei a, a lawmawm. Hla (poetry) lamah pawh sulhnu eng eng emaw hnut­chhiah a, chutiang ti mi te inhmuhkhawmna, Mizoram pawn lamah te pawh inthlahrung hauh lova tualchai thei kan nei bawk. College tha tak mai, Pachhunga University College kan han nei ve te hi chhuanawm tak a ni a, Library kha hal lo phei se chu tun aiin a chhuanawm ril lehzual tur!

Kan inkal pawhna kawng te hi hei aiin han tha lehzual se, mipuite hi sem nghak lovin mahni thawhchhuahah innghat phei ila chu Kristian ram nih kan inhmeh sawt ang maw le!