KAN TUAR CHHUAK TEP TAWH ANG

Engemaw ti zawng tak chuan tuna kan hripui do mek hi thil do nuam angreng tak a ni! A hring a hrana hmuh tur a awm loh avangin khawilai emawa han kal emaw, mahni ina han tawm emaw a han hlauh viau tur lai hi a awm lova. Raldo ta rau rauah chuan a nawlpuiin kan thlamuang angreng viau a. Ngaihtuah chian a, a hlauhawm theihdan han chhut vang vang hi chuan a hlauhawm thei nangiang mai a, mahse Pathian zarah a nawlpui hi chuan a kai tawh hmel emaw kan la hmu hauh lova, fimkhur loh lansarh vanga han vei a, han tuar viau ta pawh kan hmu hek lo. Mahse ngaihtuahna fim pangngai nei chuan kai palh ta ila a buaithlak dan tur te chu kan suangtuah thei a, kai palh lo awm ta se a darh chak dan tur leh a darh vek vek tawh chuan rin aia a lai laklawh a inven a harsat dan tur pawh kan hrethiamin a rinawm.

Kan hnam inchhuanna ber pakhat chu intawiawm hnam kan nihna hi a ni a. Hei tak mai hi kan hri do mek khawsazia nena han ngaihtuah chuan a tihlauhawmtu leh kan buai nasat dan tur min suangtuah thiamtirtu a ni bawk. Chutih laiin keini aia intawiawm ching lo zawk keini aia hnam fing, keini aia intlawh pawh leh intlat pawlh lo zawk te zingah pawh ramchhe kang ang maiin a darh vut vut mai si a, kan dinhmun chu hisap a harsa lo khawp mai.

Hei chawlhkar ruk vel lai chu kan inkharkhipin he hri hi kan lo do ta a, kan sorkarin chawlhkar hnih dang do leh turin ruahmanna a’n siam a. Chawlhkar riat do turah chawlhkar ruk kan do ngat ngat tawh a, chawlhkar hnih dang han do leh chu a huphurhawm tawh vak lo. A lo kalna lam tura ngaih te hian an lo la do ang a, keini lam hi kan lo zalen ve rawk ang a, kan chesual palh ang tih a hlauhawm khawp mai. Hetiang thilah chuan a inthlahdul lam hi chu a insat tet awlsam dawn tih a hriat reng mai si a, chawlhkar ruk kan thawhrimna kha chawlhkar hnih dang kan inthlahdul vang hian a thlawn palh ang tih a hlauhawmzia han ngaihtuah ila, chawlhkar hnih dang han insanmar leh hi kan tan a huphurhawm lo sawt awm e.

Tawng khawlo ni suh se, kan do rei tawlh tawlh a, chanchin lawmawm deuh deuh hriat tur a tam tawlh tawlhin a hriat lehnghal a. Kan awmna veng theuhah hian mi harsa leh tanpui ngai tanpui var tuma inkau ru reng hi rin ai takin an tam hialin a rinawm. Mahni veng chauh pawh ni lo, hmun dang leh khaw danga tanpui ngai tanpui tur melh ru reng pawh hi an tam tham viauin a rinawm bawk. Tunah hian mi tam takin midang tanpuina kawnga thawm an neih loh nachhan chu chutiang hun remchang chu an la hmuh mai loh vang niin a lang. Tanpui ngai dik tak han hmu fuh chiah hlawm ila eng ang taka inphal nge kan nih a la lang chhuak dawn chauh ni te pawhin a hriat.

Thingtlang khaw hrang hrangin Aizawl lama an Mizo pui te tan tha an thawhin an ram chhunga chawhmeh leh ei tur chi hrang hrang an han thehchhuak a. Rin phak bakin Mizo kan nihna a lo lang chhuak a, a ropui ngawt mai. Hetianga rawn pen chhuak ve lo khaw tam takah hian hetianga pen chhuah ve duh mi tam tak an awm ngei ang a, an boruak a la invawrh chhuak lo mai mai te pawh niin a lang. Chutih laiin Aizawl khawpuia veng tam tak hian he hun atana mi inpe zual deuh hnen atanga an thawhlawm dawn te chu thingtlang hmun khawimaw lai, a tulna hmun taka hmanna tur remchang hre ngat se an ui a rinawm lo hle a ni. 

Vanneihthlak takin Mizoram chhungah he hri hi tuna a vei tawh pakhat kan kawl bak hi chu a chambang lo niin a lang a. Tuna a avei mek lah hi a fihlim tan tawh niin a lang bawk a. Heti chunga mi tam tak rilrua inkharkhip la tula hriat nachhan ber chu mi pakhat pawh hi a enkawl kawngah kan damdawi lam thawktute tan a hautak em mai a, hei aia tam hi a vei awm palh ta hlauh ila kan buai turzia hi sawithiam harsa khawp ni tlata an hriat vang a ni. Mi state thenkhat te angin mi sawmin vei palh ta hlauh se a enkawl lam hi a sorkar ang emaw, a State pumpui angin emaw kan tlin loh mai te pawh a hlauhawm em vang a ni. Damlo reng reng chu hnatlanga enkawl ngawt theih a ni lova, thiamna nei, sorkarin a pawm mite ngeiin an enkawl a ngai a. Chutiang mi tlemte kuta kan innghah chu a ngai tlat a. Chu chauh ni lovin a enkawlna tur hmun bik hautak taka buatsaihah ngei enkawl a ngai lehzel a ni.

He hripui danglamna langsar tak pakhat chu inkai chhawn a awlsam em em mai leh hritlang satliah ang mai a nih hauh lohna hi a ni. Natna dang te chu inkai chhawn mai hleih theih loh te a ni a, he hripui hi chu inkai chhawn a awlsam tlat avang hian kan natna hriat dangte aiin a danglam ta deuh bik a ni. Chutih laiin a enkawlna damdawi an la hmu chhuak lova, a natna lah hi thihpui mai awlsam tak a ni tlat hi a ni. 

He hripui hi inkai chhawn awlsam tak, inkai chhawn palh chuan keini Mizo zingah chuan darh chum chum tura ngaih a nih tlat avang hian kan hotute thu zawmin kan thiam tawpin chawlhkar hnih chhung chu i han fimkhur leh teh ang u le.