SILCHAR KAWNG

Aizawl aṭangin i tlan chhuak a, Sihphir aṭangin kawng mam lem lo takah i insawh thla char char a, Kawnpui i thlen chuan kawng a lo zau var ta huau a. Kawng zau chu a nawm tehreng nen Aizawl aṭanga Kawnpui panna chu i zawh ngam chuang lo. Kawng chhiat vang a ni. Silchar hi Aizawl aṭangin km 180 vel a ni a, Mizoramin motor hmanga State dang kan kal pawhna kawng upa ber leh chak lakna kawngpui ber a ni a, darkar khata km 40 a chakin tlan thei la chu darkar li leh a chanve vela thleng tur i ni a, mahse chutiang a ni lo, darkar rukah pawh i thleng lovang a, darkar sarih vel hun i hman a ngai ang. Chutia i thlen theih nachhan pawh Silchar lam kawng, Lailapur aṭanga Silchar thleng, vaihovin an siam that em vang a la ni ta chauh mai. Tunah tak chuan Bilkhawthlir leh Vairengte inkar, km 30 emaw vel tlan nan khuan darkar hnih tal i mamawh ang.

Hetia kan kawng lo chhe ta bik chungchangah hian ngaihtuah tur tam tak a awm. Bilkhawthlir leh Vairengte inkar, khuti em em a chhia khu engtia lo awm mai nge ni? Kawng chhia hi zawi zawia chhe hret hret a ni hlawm a, a chhiat chhung zawngin kan en ngar ngar a, a tawpkhawk a lo thlenah kan ngaihtuah ta chauh a ni awm mang e tih tur a ni.

Ngaihtuahnaa thil awm pakhat chu kan Mizoram kawng siamtu Company te hian min nel riau zel ni hian a lang a, a mak riau zel. Kawngpui hi siam a nih chuan a siamtu Contractor/ Company te hian chumi khami chhunga a chhiat chuan mawh an phur ang, tih indelhkilhna te hi a awm ve thlip thlep ngei tur a ni a. Mahse kan Mizoram kawng chhia kan tawrhna tam ber chu a siamtu Company/ Contractor apiang hian an enkawl hun tur chhung (warranty period) hi an vawng tha lo em ni tih a ngaihtuah theih. Hmun dangah chuan keini lo ngaihdan chuan kawng siamtute hian Warranty period a an buai loh nan uluk takin an thawk ni ngeiin a rinawm a. Mahse Mizoramah chuan kan kawng siamtute hian min nel tlat mai a, a chhiat hun hmaa a chhiat leh emaw, a that rei loh emaw hian hmun danga an tawrh thin ang hi an tuar ve lo a ni mai awm mang e a tih theih rum rum mai.

Kan phun leh kan ânna tam ber hi chu han en vang vang pawhin Company pangngai leh Contractor lian tham tan chuan thawm harsa khawp a ni lem lovin a lang fova. A kawng chhuat zawng zawng kaih phawh vek a, a chhe lo kan tih lai pawh design thara thlak vek tur, hna lian leh ropui elkhen ni se hrehawm ti chung chung pawha lo nghak ve fan fan awm tak kan ni a. Mahse a chhe lai siam zeuh zeuh tur an ni a, kawng enkawlna thuah chuan khulai hna khu hna lian lutuk pawh a ni lo. Mahse tuna a kal hrehawm dan leh a chhiat nasat dan chu nasa tak a ni. Kan Construction Company rawih te hian Mizo mipui hmai eng zah vang chauh pawhin khu aia ziaawm deuh hlek a ni hnih ni thum emaw, chawlhkar hnih khat pawh a awm theihna tur pawh ngaihtuah duh lovin khuti khawpa kawng chhiaah khuan min han kaltir a, min ngamtlak hle zawng a ni.

Silcharah motor siamtir turin ka kal a, kan kawng hi tha pangngai chu ni se darkar ngaah ka tlan thleng ang a, darkar thum chhungin motor ka siam zawhtir ang a, darkar nga dangah ka lo thleng leh ang a, nikhatah ka tihtur ka zo thei tur. Mahse kan kawng a chhiat avangin zan riah a ngai a, Hotel thlen man ka chawi a ngai a, kan motor-in fuel a hman tam phah a, hmun tam takah kawng vangtan zawng tea kal luih tlat a ngai a, kan motor te chuan engemaw ti takin chhiat hma phah emaw, chhepchher engemaw hlawh chhuak ngei tur a ni a, chaw ei man ka chawi a ngai a, chubakah kawng chhiaa ka kal chhung zawngin ka zahawmna ka hlohvin ka hria a, Mizoram ka ngaihsanna a bo zova, hun tam tak ka sen belh bawk a. Hetiang chiah hian keimah mai ni lo, Mizo tam tak an awm a, kan kawng chhiat man hi kan chawi nasa teh zawng a nih hi.

Silchar kawng kan sawi hi thudik, entirna atana kan han theh chhuah chhun mai a ni. Silchar kawng bik heti a nih lai hian Mizoram hmun dangah kawng tha tur, tha si lo hi a tam hle mai a, a lungchhiatthlak vawng vawng ngawt mai. Ka hriat chian tak kawng pakhat, Maite kawng phei chu MNF Ministry (kum 10) chhung zawng khan a chhe tluan thak a, a dawt Congress Ministry kum 10 chhung a chhe leh a, keimah ngeiin a chhiat chhung khan ka zawh a, Mualpheng leh Maite inkar km 18 kha darkar thum chhung kan tlan a. Chu kawng, kum sawm hmalama chuti taka chhia chu kumin furah pawh chirhdiak kara motor nam lai thlalak te an la rawn tarlang ta chuai chuai mai a. Kan Mizoram kawng zet hi chuan lung a tichhe ngawt mai. Heng ka han sawi tlemte hi a chhe awm chhun a ni hauh lova, kawng dang tam tak hi a chhe hle mai a. Zofate kan khawngaihthlak ngawih ngawih mai.

Khawthlang lamah khuan sipai an awm a. An awmna aṭangin Kanhmun chu km 10 a ni. Lehlamah chuan Tripura khaw pakhat, km 35 a hlaah a awm thung a. An awmna hmun aṭanga Kanhmun km 10 a ATM aṭanga pawisa va lak chhuah aiin Tripura khaw lam km 35 a hlaa ATM Booth va pan chu an tan a nawm zawk avangin an va hmang nal nal thin. Kawng chhia leh kawng tha chu chutiang chuan a inthlauva, hla zawk fe pawh ni se kawng a that miau chuan a pan a hahdamthlakin a nuam zawk thin. Heti chung hian kan ram hruaitute chu mualphovah an inngai chuang hauh lova, mipui pawhin inthlan dawn pawhin kawng that leh that loh te chu tehfungah hmang lovin therhlo leh thildang dang kan la hmang daih mai.

Kan hotute hian kawng hi an vei tak tak lova, a siamtu Department enkawltu nih erawhchu nuam an ti hle a ni tehchek ang chu kawng enkawltu chu kan sorkarah chuan duhsakna dawng Minister an nih a ngai. Mahse kan kawng a chhe si. Kawng chhia hian chhungkaw tin leh mimal ipte a rawk a, kawng hi tha taka siam a tul ngawih ngawih a. Kawng a chhiat chuan kal man a tova, kal man a to chuan bungraw phurh man a tova, bungraw phurh man tovin a nghawng loh chhungkua a awm theih loh. Mipuiin sorkar kan tehna hi kawng ni sela hei aiin kan kawng a tha ngei ang.