SAWLENG PIAH LAM SIKUL

Aizawl aṭanga Sakawrdai pan tura i kal chuan Seling thlen hmain i peng ang a, Mizoram a kawng tha rei ber pawl, Tantia Con­struction kutchhuak kawngah i tlan ang a. He kawng aia tlo hi Mizoramin kan la hmu lo niin a lang. Sesawng tlan pelin Tuirini i kan ang a, Khawruhlian i thlen hnuah tlan zelin Hmunnghak, Khanpui, Pehlawn, East Phaileng te i tlan pel ang a, Kepran te pawh i tlan pel ang a, chutah Sawleng i lo thleng ang.

Congress Party Media Cell-in a tarlan dan chuan Sawlengah hian Govt. Sawleng Middle School a awm a, chu sikul chu a hlui tawh deuh avangin a tukverh te thlak thar a, a kawngkhar te thlak a, a pindan bang te pawh thlak a, a bang te pawh zut mam that leh a, a chung rangva te thlak a, a sikul rawng te pawh hnawih that a ngaih tawh avangin Mizoram sorkar chuan cheng nuai sawm tehmeuh senga chung thil chu ti turin pawisa a dah a. Kan han sawi duah na a, chung zawng zawng tihna tur chu cheng nuai nga chuan daih vek awm tak a ni a. Mahse pawisa renchem lem lovin thawk ta ila cheng nuai sarih lai te pawh kan hmang mial maithei. Han chhut thuak thuakin kawngkhar pathum siam nan hian cheng sing thum lo dah ta ila, a tukverh siam nan hian cheng singthum bawk, a pindan bang thlak nan cheng singhnih, a bang zut that nan cheng sing thum, a chung rangva thlak nan cheng singthum bawk a nih pawhin a vai hian cheng nuai khat leh singli chauh a la ni. A pawisa lamin a daih tehreng nen tukverh te, kawngkhar te chu thlak lovin, chokut thenkhat chu a tluan tling lovin an thlak a, pindan bang siam a ni lova, a zut mam ngai lai a tam awm tehreng nen fit sawm bial vel chauh an zut mam a. Sikul chung rangva erawh an thlak a. Zirtirtu dawhkan tur derdep tak takin an siam a. Office chung rawng hnawihin Tanky awm sa an thawm tha nual a. Cheng nuai sawm an la a, an kal ta daih a.

Darlawn Higher Secondary sikul chu a bang zut mam, leirawhchan rem that, rawng hnawih a, kawng­khar leh tukverh te thlak a, inchung rangva pawh thlak tur a ni. Inchung rangva thlak a ni lova, zut mam hna thawh a ni lova, mak tak maiin a kawngpui chhawng lam bang chiah rawng an han hnawih a, cheng nuai 8 an la a, an kal ta daih a.

Govt. Darlawn High Sikul pawh cheng nuai riat senna ve si a beitham khawp mai. Mak tak maiin sikul hnung lam rawng an han hnawih tel lo leh mauh a.

A pawisa lam ngaihtuah hi chuan Palsang Primary School te hi an vannei ngawt mai. Cheng nuai hlira chhiar a nuai sawmhnih leh pakua leh sing riat leh sangkhat ngawt hmanga sak that tur a ni a. Fit 59 laia seia sak tur kha fit 45 chauh a seiin an han sa phawt mai a. Staff room tur a bo hmak a. Aizawl Civil Hospital a in chhawng bo te pawh a hriat chhuah uai uai theih. Khaw lum hnuaia naupang an hrehawm loh nan ceiling siam nan ringawt cheng nuai li chuang dah a nih lai leh Ceiling atan pawh engemaw mai mai hmang lova Resin bonded fibre glass wool ngat hman tur a nih laiin ceiling chu an han siam lo ngawt a.

A sei lutuk dawn, a tawi zawngin, Sawleng aṭanga Vaitin inkar, Paslsang te, Thingsat te leh Sakawr­dai te thlengin sikul 15-ah sikul hrang hrang siamthatna tur pawisa NABARD aṭanga cheng nuai 3500 zet kan puk aṭangin cheng nuai 362.59 hman a ni a. Khawi sikulah mah a nihdan tur anga hman a awm lo ni ngeiin a lang. Ceiling atana hman tura estimate awmsa an hmang lova, rangva pawh Dyna Roof hman turah rangva pangngai an hmang a, tihtura inziak tih kim loh deuh vek a ni a. Chu chauh ni lovin sikul rawng hnawih ve ta cheng a, a hnunglam han hnawih tel loh lehzel hi a mak hle a ni.

Mak tak maiin pawisa sanction zat hi a hnathawktu tak tak te kut thleng lovin sikul panga sakna tur aṭangin cheng nuai 57.23 a'n bo pil phawt a.

Kan sorkar hnuaia heng hna hmutute hian a pawisa sanction zat chiah an pawm a, a sikul sak dan tur leh chei that dan tur dang chu engahmah an ngai lo ni ngeiin a lang. Education Minister bial a ni a, hetianga an ti ngam a nih chuan Education Minister leh hna hmutu te hi an innelin an inngamtlak lutuk deuh em ni ang tih ngaihtuah loh theih a ni lova.

Heng hna hmutu ni ve lo leh a thawktu ni ve lo Darlawn tlang­dung mipui tan chuan he thil hi a lawmawm lo hle mai a. Ceiling atan khawlum vawng dai thei tur, (thermal insulation) Resin bonded fibre glass wool ngat hman tura duan a niin a estimate pawhin a san phahin pawisa pawh a tam phah ni ngeiin a lang a. Mahse hna hmutute chuan silpaulin te, plywood te hlir an hmang a, an sawi ang khawlum vawng dai thei ceiling chu khawi sikulah mah an vuah ta lo a ni.

Tuna kan sawi chin hi Darlawn tlangdung sikul 15 chungchang chauh a ni a, sikul 172 sak that tur a ni a. Chhiarkawp mawl tak hmanga han chawh mai mai hian sikul 15-ah a pawisa faia sikul sakna atana hman loh hi cheng nuai 57 a nih chuan sikul 172-ah chuan a bo thlau tur chu nuai 653 angin a chhut theih. Anih loh vek leh sikul 15 sakna atana nuai 362 aṭangin nuai 57 a bo chuan sikul 172 sakna tur cheng nuai 3500 aṭang chuan cheng nuai 550 vel a bo ang. Hetia kan han chawh chhuah hi a dik lo maithei, a chhan pawh a inang vekin an hisap lo maithei a.

He pawisa, nuai 3,500 lai mai (vaibelchhe sawmthum leh panga) hi Mizoram sorkarin a puka a puk ni si, a tir phat aṭangin a thawk tha tur apiang ten an hmuh theihna tur leh thuneitute laka intiamkamna fel tak leh bat an neih ngei theihna tura Tender pangngaia hna hi zuar lovin duhsak zawng te pek theihna turin 'Restricted Tender' an han ti phawt a. Heta tang hian a dik dawn lo tih hi a lang thei nghalin a hriat.

Hna hmanhmawhthlak vut vut emaw, midang tana thawh ve hleih theih loh tura hna khirhkhan ni si lo kha mi tlemte (an duhsak zawng mite) hnenah chauh thawh remchang turin an han duang phawt a. An duhsak zawng mi pahnih te chuan an han insem ta phawk mai a. A pawisa chang tlem zawk chan pawh hi nuai sang chuang a'n ni ngawt phawt a. Heta tang hian a dik dawn lo tih chu a rin theih nghal.

He pawisa tam tak mai, Mizoram pawisa aṭanga rulh leh vek tur hi heti hian Education lama thuneitute hian an han siksawm ta chu a nia. He cheng nuai 3500 hi Mizoram mipuiin kan budget aṭanga kan rulh leh tur a nih avangin mipui pawisa tihna a ni. Kan pawisa hi fimkhur tak leh daihzai thei ang bera hman hi kan duhdan mai a ni lo, a nihdan tur a ni. Sorkar pawisa zawng zawng hi mipui pawisa a nih avangin fel tak leh daihzai taka hman hi thuneituten an bat a ni a. A puka kan puk lehnghal, hetianga felfai lo taka thiltih hi a dik thei lovang.

Sorkar laipuiin a thlawna min pek pawh ni tehreng se Mizoramin mamawh kan ngahzia leh kan sikul ten thawm that a mamawhzia ngaihtuahin kan pawisa hmuh chhun ang ang hi tangkai tak leh hlawk taka hman hi Kristian sorkar, mipuite hamthatna tura bei tura ding sorkar hruaitu leh sorkar hnathawkte bat a nih ngawih ngawih laia a hranpaa kan rulh leh vek tur pawisa, hmang fimkhur lo anga an sawi hi chuan rilru a tina ngawt mai.

He nuai 3500 hmanna hian State Referral Hospital (tunah MIMER kan tih tak) sak dan kha min hriat chhuahtir.