THINGSAI LEH S.VANLAIPHAI KAWNG

Tun kar kalta (October ni 14-20 2018) khan Thingsai leh S.Vanlaiphai kan han tlawh a. Thingsai kawnga kan han kal zet chu kan Chief Minister-in, ‘Mizoramah kawng chhia a awm lo.....’ a tih kha kan hre chhuak vang vang mai a. Rilru a na duh khawp mai. Thingsai leh Cherhlun kawng inthenna aṭanga Thingsai panna kawng siam nan chuan Rural Development aṭangin cheng nuai 20 an lo hmang ni awm tak bawk a ni. Cheng nuai 20 hman thu tarlanna lungphun te pawh kan hmu a. Mahse a chhiatzia leh a kal hrehawmzia chu sawiin a siak lova, tunhma Reiek kawng ang kha a ni. A bumboh a, a nal tho bawk si a, motor a khawngaihthlak ngat ngat hle mai. Kan kal hma hian an kawng chu a chhiat em avangin Thingsai khawtlang tangrualin thawhkhawmin, Aizawl lam aṭang tea thawhlawm khawnin an khaw kawng chu an lo hnawh mam ve ni awm tak a ni a. Chuti chung pawhin ‘Mizoramah kawng chhia a awm lo....’ titu ngei mai han zawhpui a, ‘Ka pu, hei hi hman aṭanga kan dinhmun chu a ni,’ han tih a chakawm khawp mai.

Thingsai khua hi Mizorama khaw langsar pawl tak, mithiam tam tak chhuah tawhna a ni a, Nurse phei chu an khaw lalnu fel vangin a chhuah hnem pawl tak an ni hial ang. Chuti chunga hetiang kawng an la nei hi a lungchhiatthlakin an tan pawh a tlawmthlak ngat ngat hlein a lang. Tun ang khawvel, kan Chief Minister ber pawhin, ‘Mizoramah kawng chhia a awm lo....’ ti a inthlan dawn thlenga a sawina Mizoram chhunga hetiang kawng lo awm hi a mak a. Dawithiam te hi han ni thut ila, Thingsai kawngah hian kan Chief Minister hi kal turin han dawi chhuak thei ila ka ti ngawt mai. Ram hruaitu berin hetia a sawi laia hetiang kawng zawh lova mahni khua luh theih ta lo chu Thingsai khaw tan chuan FIR thehluh hial awm a ni. Kawng chhiaah hian FIR thehluh ngai a ni chiah em phei chu ka hre law.

Thingsaia cheng ni ta ila, inthlan dawn te a ni bawk a, politics-ah Chief Minister awmna Party-ah hian awm ta lo ila, Chief Minister awmna Party lam tantute zingah pawngpawrh deuh awm ta se kut inthlak mai te pawh thil hlauhawm a ni thei ang a. Khawtlang tangrual tak ni ta ila ‘Kawng chhia a awm lo....’ ti a sawitu ram hruaitu lam tang chu khua aṭanga hnawhchhuah te pawh rawt ut ut mai te pawh thil awm thei a ni. Khawtlangin kan duh loh mihring tam tak, kan khuaah awm ve lo se kan tih te pawi khawih nge nasa ang hetiang kawnga min kaltirtuten kan khaw mipui pawi an sawi hi tih ngaihtuah tham a awm. Thingsai khaw panna kawng chhiain Thingsai mipui leh he kawng hmang vetu, Bualpui khua te a sawisak retheih dan leh an hrehawm phahzia hi kawng hrang hrang ngaihtuahin a nasa tham khawp mai. Kan khaw kawng hetiang hi a fur a thala kan zawh tawh hnuah, ‘Kawng chhia a awm ka hre lo,’ tiin Mizoram lalberin sawi ta se, kei chuan, ‘Mizoramah min chhiar ve lo em ni?’ te pawh ka ti he haw duh mai awm e.

Khawtlangin pawisa thawhkhawm a theihtawpa beih tawh hnu pawha hetiang kawng chhia zawh a la ngai ta hi a mak a. Khawtlangin pawisa an thawhkhawm hi nuai chuang lai niin an sawi a, chutiang chuan siam ta lo phei se eng ang fakauvin nge a awm ang a, tlawh pawh theih loh khawpin Thingsai khua hi a awm mai ang em tih palh awl tak a ni. A thenawm khua, Ngharchhip te, New Ngharchhip te hi eng tak ang maw. Bualpui leh Thingsai kawng zet chu a manganthlak hle mai.

S.Vanlaiphai lamah lah chuan Darzokaiah motor lianin lei a zawh ve thei lova, an va han hautak bik tak em. Aizawl leh Silchar aṭang tein motor lianin bungrua leh in sakna hmanrua te an han la ve bawk a, leiah motor a tlan kai thei tawh si lova, vaukam lehlamah an han hlang thla vek a, Pick-up motorin a’n thiar kai te te a, vaukam lehlamah an lo changin motor lianah chuan an hlangkai tha leh a. Motor lian phur khat chu Pick-up motor vawi sawmpanga phur lai te a lo nih avangin zing lama Darzokai an thleng hi an han inphurh chhuah leh theih meuh chuan tlai lam a lo ni tawh a, lui pakhat kan nan ni khat el euh hman a ngai ta thin a. Hmanraw man a tam phah a, hun a duh rei bawk a. Darzo, Muallianpui, S.Vanlaiphai leh Sangau zawng zawngin he motor lian kal theih lohna lei hi an tuar kumtluan tlawk tlawk mai a. A hahthlakin a hrehawm tih sawi leh chuan a ngai lo.

A saptawnga ‘road infrastructure’ an tih teh fo thin hi a pawimawh tih sawi a ngai lo. Thingsai te leh S.Vanlaiphai leh a chheh vel khaw tan hi chuan therhlo politics dang zawng zawng aiin kawng politics khelh a tul zawk a. An tan lam Party chu eng pawh lo ni se, an khaw kawng hi hei aia awlsam a nih hma loh chuan mi khua aiin an harsa bik reng dawn a ni tih chu eng lehkhabu mah rawn lo pawhin a chiang reng mai.

Kan Mizoram politics-ah hian khelh hmasak tur leh hnuhnun tur te hi awm vein ka ring thin a. Kan khua a zirin heng kawng politics te hi chu khelh hmasak tur chi a ni. Kan sorkar pawh hian, ‘Chumi khami khaw kawng chu siam a ngaih avangin nangni chuan in lo nghah deuh a ngai,’ te pawh hi ti hial se khaw dang tan pawh hriatthiam ve mai tur a nihna chin awmin ka hria. A buaithlak lai ber chu kan Chief Minister hmuhdan leh mipuite hmuhdan hi a inpersan lulai em mai a. Kan Chief Minister ho hi chuan Mizoramin kawng tha chu kan nei lawk dawn lo tawp tih a chiang reng mai.