RESTRICTEDSINGLE TENDER LEH ONE TIME RELAXATION

Ramri chungchangah kan buai a, a kal a kal a, a tawpah chuan bungrua leh chakkhai mamawh kan tlakchham thuah kan lut a. Kan chak lakna kawngpui dan an han phelh chuan a ramri pawh ngaihtuah tawh mang lovin kan han thawveng deuh huai mai a. A nihna takah chuan ngai kan awh chuan kan lawm viau te pawh ti ila, ngaihthlak a nuam vak lo nain kan awmdan dik tak chu a ang angreng viau a ni. Chutih laiin mi tam tak thinlung a na a, ramri chungchanga kan tang rei thei lo lutuk leh kan tlin rei thei lo hi a thanatthlak a. Mahse tlin rei tur chuan kan awmdan hi rei tak ata tawh a dik a lo ngai. Chhungkaw inrelbawlna fel lo, hnathawh mumal nei lova awm huai huai, hun inher ang zela mi duh ang zel duh ve si, mahse pawisa lakluhna nghet emaw, hnathawh hunbi nei fel si lo tan engtikah emaw harsatna a lo awm mai ang hi kan ni thei. Anih loh leh in hlui rawp tawh tak a khawsa, chei tha chuang lem lova a la chim loh avanga awm mai mai, thli na deuhvin a rawn chhem tak avanga buai thar ta te pawh kan ang thei ang. A awmzia berah chuan keimahni lam chhungkaw inrelbawl a fel lova, kan tihtur ti lovin khawvel hmasawnna lo thleng thar apiang a chunglangah kan zuan ve zel a, bul leh bal nghet kan nei lo tlat a ni. Chu bul leh bal nghet kan tih chu a saptawngin ‘economy’ an tih, ei leh bara intodelhna emaw, ei leh bar kher lova ram intodelhna kawng emaw tihna a ni. Chu kalphung tel lo chuan Central sum min pek ringin kan awm der der a, a lo thleng thar apiang kan chuk zo zel a, kan leiba a pung a, kan mamawh ngaihtuahin kan siam chhuah leh kan thar chhuah a pung chak ve si lova, kan awm mai mai hian intihbuai kan tlin lova, thenawm state nena inchemhar kan tling lo. Thenawm state nena thubuai nei tur chuan kan awm mai mai hi inbuatsaih sa anga kan awm reng a tul. 

Japan khaw pakhat sikul naupang lam ka hmu fuh hlauh mai a. A hmuhnawmin a ropui hle mai. Mahse lungchhiatthlak tihna tak ka nei. Khang sikul naupangte kha kan State sipaite hian an tluk meuh pawh ka ring lo. Khatianga lam thei sikul naupang nei chuan sipai lam thiam chu an nei tha dawn tih a chiang. Khatianga an tih theihna phenah khan thawhrimna te, inthununna te, taimakna te a tel vek tih a chiang a ni. Ngawrh taka lehkha zir chunga khatianga an lam thei a nih chuan an hnam chu hnam namai an ni dawn lo tih a hriat. Keini chu kan sorkarin zing sikul tan hma a’n ti chhin a, mi thenkhat zing thawh hun nen a induh ta lova, an sawisel an sawisel a, a tawpah chuan a ngaiah kan let leh mai. Mahni tihdan thin tihdanglam ai chuan a ‘system’ pui, tha zawk tura ngaih pawh hnawl rup duh khawpa thawkrim thei lo kan ni tihna a ni em? 

Kan sorkar Office-ah hian nikhatah darkar riat thawk tura ngaih kan ni a. Tunhma zawng khan zing dar 10-ah Office tanin inrinni chuan chawhnu dar 1.30-ah ban theih a ni a. Inrinni chawlh kan duh avangin kan Office chu zing dar 9-ah tanin tlai dar 5.00 ah ban ni se chuti chuan chawlhkar khata kan darkar thawh hun chhung a ngai reng ang a, inrinni-ah sorkar hnathawkin mahni mimal pawipang kan khawih thei ang tiin tihdan thar siam a ni a. Mahse zing dar 9 a Office tan chu Mizoramah hmuh tur tih tham kan awm lo. Zing dar 9.30 a Office dawr tura kal pawh finthlak loh tak a nihna Office a tam mai. Kan inthununna a pachhe em a, kan dan zam sa anga kal lovin tute tlin tawk emaw hi danah kan neih mai a ni. Heng hian intodelh lohna a hring. 

Kan sorkar hian dan a zah tawk lova, dan zah lohna a piang hlen mai ang tih a hlauhawm khawp mai. Bungraw lei chungchangah duhsak bik te inpek awlsamna dan, ‘Restricted Tender’ a uar a. Bungraw danglam bik, mamawh si leh hun tepter si lei nana hman tur ‘Restricted Tender’ hmangin thil a lei chiam chiamin hna tam tak a ruk a ral titihin a thawk a. Hei hi thil pawi tak a ni. A nihna takah chuan an duhsak zawng te leh anmahni (a nih ngei a rinawm) kut atanga bungraw lei a, sorkar pawisa hlawkpui tum vanga he ‘Restricted Tender’ hi tih a nih ngei a rinawm. Hetianga tih nachang hriat hi finna ropui lo tak a ni. Engtikah emaw chuan heng ‘Restricted Tender’ te hi a item mal malin, a hmanhmawhthlak dan leh a tulna chhan tak te chhui chiangin miin a buin an la chinglet kual mahna. Chutiang ti peih chu awm se ka ti ngawt mai. 

Mau chi supply phei chu ‘single tender’ an han ti lehnghal a! A chhangtu mi pakhat chauh an awm pawh a lei theih tho turin an han ruahman a. Sorkarin Tender hmanga thil a lei nachhan chu mimal duhdan ringawta rate bithliah lova, sorkar hlawk theihna ang ber tura rate siam a nih theihna tur a ni a. Mahse chu Tender ‘spirit’ chu he Single Tender hi chuan a chawkchhe vek a ni. Mahse heng thu hi chu tlem lai khan kan sawi chiam tawh avangin sawi nawn thui lo mai ila. 

Tunlai tak hian ‘One Time Relaxa­tion’ (tun tum chauh chu ngaih­hnathiam ila) tih a awm leh. Sorkar hnathawk lak dan, ‘Recruitment Rules’-ah ‘one time relaxation’ hi awm thiang a ni lova, phuahchawp a ni. 

Thil mak ve tak pakhat chu heng, restricted tender te, mau chi supply te leh one time relaxation tih vel zawng zawng hi mi pahnih khat kut chhuak ni a a lang hi a ni. 

‘Tui hi a hnar a fim chuan a luang fim mai a, a hnar a nut miau chuan a luang fim mawh teh a nia aw!’